കൊറിയന്‍ ഡ്രാമകള്‍ പോലെ തന്നെ അതിലെ ഒ.എസ്.ടികള്‍ക്കും (ഒറിജിനല്‍ സൗണ്ട്ട്രാക്കുകള്‍) ആരാധകര്‍ ഏറെയാണ്. അത്തരത്തില്‍ കൊറിയന്‍ ഡ്രാമകള്‍ ഇഷ്ടപ്പെടുന്ന ഭൂരിഭാഗം ആളുകള്‍ക്കും പ്രിയപ്പെട്ട ഒരു ഗാനമാണ് ഗോബ്ലിനിലെ ‘സ്‌റ്റേ വിത്ത് മീ’. പല കൊറിയന്‍ ഡ്രാമ ആരാധകരുടെയും റിങ് ടോണ്‍ പോലും ഈ ഗാനമാണ്.
മിക്കവര്‍ക്കും ഇഷ്ടമുള്ള ഒ.എസ്.ടികളുടെ ലിസ്റ്റില്‍ ഈ ഗാനത്തിന് ഒന്നാമതോ രണ്ടാമതോ ആയി സ്ഥാനമുണ്ടാകും. അര്‍ത്ഥം മനസിലായില്ലെങ്കില്‍ പോലും റിപ്പീറ്റ് അടിച്ച് കേള്‍ക്കാന്‍ സാധിക്കുന്ന ഗാനമാണ് ‘സ്‌റ്റേ വിത്ത് മീ’. കെ-പോപ്പ് ഗ്രൂപ്പായ എക്‌സോയിലെ ഏറെ ആരാധകരുള്ള റാപ്പര്‍ പാര്‍ക്ക് ചാന്‍-യോളും (ചാനിയോള്‍) ഗായിക പഞ്ചും ചേര്‍ന്നാണ് ഈ ഗാനം ആലപിച്ചത്.
ഗോബ്ലിന്‍;
2016ലെ ഹിറ്റ് സൗത്ത് കൊറിയന്‍ ടെലിവിഷന്‍ ഡ്രാമയാണ് ഗാര്‍ഡിയന്‍ : ദി ലോണ്‍ലി ആന്‍ഡ് ഗ്രേറ്റ് ഗോഡ് അഥവാ ഗോബ്ലിന്‍. ഗോങ് യൂ (ഗോങ് ജി-ചിയോള്‍) നായകനായി എത്തിയപ്പോള്‍ കിം ഗോ-യൂണ്‍, ലീ യോവോക്ക്, യൂ ഇന്‍-നാ എന്നിവരും ഈ ഡ്രാമയുടെ ഭാഗമായി.
കൊറിയന്‍ കേബിള്‍ ടെലിവിഷന്‍ ചരിത്രത്തിലെ ഏഴാമത്തെ ഏറ്റവും ഉയര്‍ന്ന റേറ്റിങ്ങുള്ള ഡ്രാമയായിരുന്നു ഗോബ്ലിന്‍. ലോകവ്യാപകമായി ശ്രദ്ധനേടിയ ഈ ഡ്രാമയിലൂടെ 53ാമത് ബെയ്ക്സാങ് ആര്‍ട്സ് അവാര്‍ഡില്‍ എഴുത്തുകാരി കിം യൂന്‍-സൂക്ക് ഗ്രാന്‍ഡ് പ്രൈസ് അവാര്‍ഡും നടന്‍ ഗോങ് യൂ മികച്ച നടനുള്ള അവാര്‍ഡും നേടിയിരുന്നു.
Content Highlight: Kdrama Goblin’s OST Stay With Me Hit 500 Million In YouTube