സ്പോര്‍ട്സ് ഡെസ്‌ക്7 min
രഞ്ജി ട്രോഫിയില്‍ കരുത്തരായ മുംബൈക്കെതിരെയാണ് കേരളത്തിന്റെ അടുത്ത മത്സരം. തിരുവനന്തപുരം സെന്റ് സേവ്യേഴ്‌സ് കോളേജ് ഗ്രൗണ്ടിലാണ് കേരളത്തിന്റെ മൂന്നാം മത്സരം അരങ്ങേറുന്നത്.
എലീറ്റ് ഗ്രൂപ്പ് ബി-യില്‍ ആദ്യ രണ്ട് മത്സരങ്ങളും വിജയിച്ച് പോയിന്റ് പട്ടികയില്‍ ഒന്നാം സ്ഥാനത്തുള്ള മുംബൈക്കെതിരെ നടക്കുന്ന മത്സരം കേരളത്തെ സംബന്ധിച്ച് ഏറെ നിര്‍ണായകമാണ്.
ബോണസ് പോയിന്റുകളടക്കം നേടി രണ്ട് മത്സരത്തില്‍ നിന്നും 14 പോയിന്റാണ് ഒന്നാമതുള്ള മുംബൈക്കുള്ളത്. രണ്ട് മത്സരത്തില്‍ നിന്നും രണ്ട് സമനിലയുമായി നാല് പോയിന്റോടെ മൂന്നാം സ്ഥാനത്താണ് കേരളം.
മുംബൈക്കെതിരായ മത്സരത്തില്‍ ക്യാപ്റ്റന്‍ സഞ്ജു സാംസണ്‍ ടീമില്‍ തിരിച്ചെത്തിയേക്കുമെന്ന റിപ്പോര്‍ട്ടുകളാണ് പുറത്തുവരുന്നത്. ബുധനാഴ്ച ബെംഗളൂരു ചിന്നസ്വാമി സ്റ്റേഡിയത്തില്‍ അഫ്ഗാനെതിരെ നടക്കുന്ന പരമ്പരയിലെ അവസാന മത്സരം കൂടി കഴിഞ്ഞാല്‍ സഞ്ജുവിന്റെ നാഷണല്‍ ഡ്യൂട്ടി അവസാനിക്കും. ഇതോടെ സഞ്ജു കേരള ക്യാമ്പില്‍ മടങ്ങിയെത്തുമെന്നും റിപ്പോര്‍ട്ടുകള്‍ സൂചിപ്പിക്കുന്നു.
ആലപ്പുഴയില്‍ ഉത്തര്‍പ്രദേശിനെതിരായ നടന്ന ആദ്യ മത്സരത്തില്‍ സഞ്ജുവാണ് കേരളത്തെ നയിച്ചത്. മത്സരം സമനിലയില്‍ കലാശിച്ചിരുന്നു. ഇതിന് പിന്നാലെയാണ് അഫ്ഗാനെതിരായ പരമ്പര കളിക്കാന്‍ സഞ്ജു നാഷണല്‍ ടീമിന്റെ ഭാഗമായത്.
എന്നാല്‍ പരമ്പരയിലെ ആദ്യ രണ്ട് മത്സരത്തിലും സഞ്ജുവിന് സ്ഥാനമുണ്ടായിരുന്നില്ല. ജിതേഷ് ശര്‍മയെയാണ് വിക്കറ്റ് കീപ്പര്‍ ബാറ്ററായി ടീമിലുള്‍പ്പെടുത്തിയത്.
മുംബൈക്കെതിരെ സഞ്ജു കളത്തിലിറങ്ങുമെന്ന സൂചനയാണ് കേരള ക്രിക്കറ്റ് അസോസിയേഷന്‍ നല്‍കുന്നത്. സഞ്ജുവിന്റെയും മുംബൈ നായകന്‍ അജിന്‍ക്യ രഹാനെയുടെയും ചിത്രങ്ങള്‍ പതിപ്പിച്ച പോസ്റ്ററുകള്‍ കെ.സി.എ പുറത്തിറക്കിയതോടെയാണ് സഞ്ജു ടീമിന്റെ ഭാഗമാകുമെന്ന റിപ്പോര്‍ട്ടുകള്‍ സജീവമായത്.
മുംബൈ സ്‌ക്വാഡ്
അജിന്‍ക്യ രഹാനെ (ക്യാപ്റ്റന്‍), ജയ് ബിസ്ത, ഭൂപന്‍ ലാല്‍വാനി, അമോഘ് ഭട്കല്‍, സുദേവ് പ്രകാര്‍, പ്രസാദ് പവാല്‍ (വിക്കറ്റ് കീപ്പര്‍), ഹര്‍ദിക് താമോറെ (വിക്കറ്റ് കീപ്പര്‍), ഷാംസ് മുലാനി, തനുഷ് കോട്ടിയന്‍,അഥല്‍വ അങ്കോലേകര്‍, മോഹിത് അവസ്തി, ധവാല്‍ കുല്‍ക്കര്‍ണി, റോയ്സറ്റണ്‍ ഡയസ്, സില്‍വെസ്റ്റര്‍ ഡിസൂസ, ഹിമാന്‍ഷു സിങ്. സര്‍ഫറാസ് ഖാന്‍, ശ്രേയസ് അയ്യര്‍.
കേരള സ്‌ക്വാഡ്
സഞ്ജു സാംസണ്‍ (ക്യാപ്റ്റന്‍), ആനന്ദ് കൃഷ്ണന്‍, രോഹന്‍ കുന്നുമ്മല്‍, സച്ചിന്‍ ബേബി, അക്ഷയ് ചന്ദ്രന്‍, ജലജ് സക്സേന, കൃഷ്ണ പ്രസാദ്, രോഹന്‍ പ്രേം, ശ്രേയസ് ഗോപാല്‍, വൈശാഖ് ചന്ദ്രന്‍, വിഷ്ണുരാജ് (വിക്കറ്റ് കീപ്പര്‍), വിഷ്ണു വിനോദ് (വിക്കറ്റ് കീപ്പര്‍), ബേസില്‍ തമ്പി, എം.ഡി. നിധീഷ്, എന്‍. ബേസില്‍, സുരേഷ് വിശ്വേശ്വര്‍.
Content highlight: KCA shares Sanju Samson’s poster before the match against Mumbai
