കത്വ ഫണ്ട് കേസ്: പരാതിക്കാരന്റെ സ്വകാര്യ അന്യായത്തില്‍ യൂത്ത് ലീഗ് നേതാക്കള്‍ക്ക് കോടതി സമന്‍സ്
ഡൂള്‍ന്യൂസ് ഡെസ്‌ക്
Monday, 16th October 2023, 5:35 pm
കോഴിക്കോട്: കത്വ ഫണ്ട് തട്ടിപ്പ് കേസില്‍ യൂത്ത് ലീഗ് നേതാക്കളായ സി.കെ. സുബൈര്‍, പി.കെ. ഫിറോസ് എന്നിവര്‍ക്ക് സമന്‍സ് അയക്കാന്‍ കോടതി ഉത്തരവ്. പരാതിക്കാരനായ യൂസഫ് പടനിലം നല്‍കിയ സ്വകാര്യ അന്യായം പരിഗണിച്ചാണ്
കുന്ദമംഗലം ജുഡീഷ്യല്‍ മജിസ്ട്രേറ്റ് കോടതിയുടെ നടപടി. കേസിലെ ഒന്നാം പ്രതി സി.കെ. സുബൈറിനോടും രണ്ടാം പ്രതി പി.കെ. ഫിറോസിനോടും അടുത്ത വര്‍ഷം ഫെബ്രുവരി രണ്ടിന് കോടതിയില്‍ ഹാജരാകാന്‍ കോടതി നിര്‍ദേശിച്ചു.
കേസില്‍ യൂത്ത് ലീഗ് നേതാക്കള്‍ക്ക് അനുകൂലമായിട്ടായിരുന്നു 2023 ജൂണില്‍ കോടതിയില്‍ നല്‍കിയ പൊലീസ് റിപ്പോര്‍ട്ട്. ഇതിന്റെ കോപ്പി ഇന്ന് പുറത്തുവന്നിരുന്നു. രാഷ്ട്രീയ വൈരാഗ്യത്തെ തുടര്‍ന്ന് എതിര്‍കക്ഷികള്‍ക്കെതിരെ വെറുതെ പരാതി നല്‍കിയെന്നാണ് കുന്ദമംഗലം ജുഡീഷ്യല്‍ മജിസ്ട്രേറ്റ് കോടതിയില്‍ കുന്ദമംഗലം പൊലീസ് സമര്‍പ്പിച്ച റിപ്പോര്‍ട്ടില്‍ പറയുന്നത്.
