ന്യൂദല്‍ഹി: മഹാരാഷ്ട്രയില്‍ നാളെ വിശ്വാസ വോട്ടെടുപ്പ് നടത്തണമെന്ന സുപ്രീം കോടതി ഉത്തരവ് കര്‍ണാടകയില്‍ സംഭവിച്ചതിന്റെ തനിയാവര്‍ത്തനമാണ്. കര്‍ണാടകയില്‍ ഗവര്‍ണര്‍ അനുവദിച്ച സമയം വെട്ടിക്കുറച്ച് അന്ന് സുപ്രീം കോടതി വിധി പ്രഖ്യാപിച്ചത് ഏറെ ചര്‍ച്ചയായിരുന്നു.
കര്‍ണാടകത്തിലും ബി.ജെ.പി ഭരണത്തിലിരുന്നപ്പോഴാണു നിര്‍ണായകമായ ഉത്തരവ് സുപ്രീം കോടതി പുറപ്പെടുവിച്ചത്. കഴിഞ്ഞവര്‍ഷം മേയില്‍ ബി.എസ് യെദ്യൂരപ്പ മുഖ്യമന്ത്രിയായി സത്യപ്രതിജ്ഞ ചെയ്യുകയും അതിനെ എതിര്‍ത്തുകൊണ്ട് കോണ്‍ഗ്രസ്-ജെ.ഡി.എസ് സഖ്യം സുപ്രീം കോടതിയെ സമീപിക്കുകയുമായിരുന്നു.
കേസില്‍ രാത്രി വൈകി വാദം കേട്ട സുപ്രീം കോടതി ബി.ജെ.പി സര്‍ക്കാരിനോട് തൊട്ടടുത്ത ദിവസം തന്നെ വിശ്വാസ വോട്ടെടുപ്പ് നടത്താന്‍ നിര്‍ദ്ദേശിക്കുകയായിരുന്നു. എന്നാല്‍ വിശ്വാസ വോട്ടെടുപ്പ് നടത്തുന്നതിനു മുന്‍പേ യെദ്യൂരപ്പ രാജിവെച്ച് ഒഴിയുകയായിരുന്നു. ഭൂരിപക്ഷം തികയ്ക്കാന്‍ കഴിയാതെ വന്നപ്പോഴായിരുന്നു ഇത്.
വാര്‍ത്തകള്‍ ടെലഗ്രാമില്‍ ലഭിക്കാന്‍ ഇവിടെ ക്ലിക്ക് ചെയ്യൂ
അന്ന് ഗവര്‍ണര്‍ വാജുഭായ് വാല അനുവദിച്ച 15 ദിവസത്തെ സമയം വെട്ടിക്കുറച്ചുകൊണ്ടാണ് സുപ്രീം കോടതി ഇടപെട്ടത്. അതേസമയം മഹാരാഷ്ട്രയില്‍ നവംബര്‍ 30 വരെ ഗവര്‍ണര്‍ ഭഗത് സിങ് കോശ്യാരി അനുവദിച്ച സമയമാണ് വെട്ടിക്കുറച്ചിരിക്കുന്നത്.
