ബെംഗളൂരു: കര്‍ണാടകയില്‍ 15 മണ്ഡലങ്ങളിലേക്കായി നടക്കുന്ന ഉപതെരഞ്ഞെടുപ്പിന് മൂന്ന് ദിവസം മാത്രം ബാക്കി നില്‍ക്കെ ബി.ജെ.പിയ്‌ക്കെതിരെ കൈകോര്‍ക്കാന്‍ വീണ്ടും കോണ്‍ഗ്രസ്-ജെ.ഡി.എസ് ധാരണ.
ഉപതെരഞ്ഞെടുപ്പിന് ശേഷം കര്‍ണാടകയില്‍ ബി.ജെ.പിയ്ക്ക് ഭൂരിപക്ഷം നഷ്ടമായാല്‍ ജെ.ഡി.എസുമായി ചേര്‍ന്ന് സര്‍ക്കാര്‍ രൂപീകരിക്കാനാണ് ഇരു പാര്‍ട്ടികളും തീരുമാനിച്ചിരിക്കുന്നത്.
15 മണ്ഡലങ്ങളില്‍ ആറിടത്തെങ്കിലും ജയിച്ചാല്‍ മാത്രമേ ബി.എസ് യെദിയൂരപ്പയ്ക്ക് സര്‍ക്കാരിനെ നിലനിര്‍ത്താന്‍ സാധിക്കുകയുള്ളൂ. ഭൂരിപക്ഷം ലഭിക്കാത്ത പക്ഷം ജെ.ഡി.എസുമായി ചേര്‍ന്ന് സര്‍ക്കാരുണ്ടാക്കാന്‍ കോണ്‍ഗ്രസ് തയ്യാറാണെന്ന് കോണ്‍ഗ്രസ് നേതാവ് ജി. പരമേശ്വര വ്യക്തമാക്കിയിട്ടുണ്ട്.
വാര്‍ത്തകള്‍ ടെലഗ്രാമില്‍ ലഭിക്കാന്‍ ഇവിടെ ക്ലിക്ക് ചെയ്യൂ
അതേസമയം 15 ല്‍ 12 സീറ്റുകളിലും വിജയിക്കുമെന്ന് ആത്മവിശ്വാസമുണ്ടെന്നാണ് കോണ്‍ഗ്രസ് നേതാവ് സിദ്ധരാമയ്യ പ്രതികരിച്ചത്. അധികാരത്തില്‍ കോണ്‍ഗ്രസ് തിരിച്ചെത്തുമെന്നും അദ്ദേഹം പറഞ്ഞു. എന്നാല്‍ ഭൂരിപക്ഷം ലഭിക്കാത്ത സാഹചര്യം വന്നാല്‍ ജെ.ഡി.എസിനൊപ്പം ചേരുമെന്നും അദ്ദേഹം പറഞ്ഞു. 11 സീറ്റുകളിലെങ്കിലും വിജയിച്ചുകഴിഞ്ഞാല്‍ ജെ.ഡി.എസ് പിന്തുണയോടെ സര്‍ക്കാരുണ്ടാക്കിയിരിക്കുമെന്ന് കോണ്‍ഗ്രസ് എം.പി ബി.കെ ഹരിപ്രസാദും പറഞ്ഞു.
