പാരീസ്: ഫ്രാന്‍സ് ആഭ്യന്തര മന്ത്രി ജെറാള്‍ഡ് ഡാര്‍മാനിനെതിരെ മാനനഷ്ടത്തിന് പരാതി നല്‍കി ഫുട്‌ബോള്‍ താരം കരിം ബെന്‍സെമ. മുസ്‌ലിം സംഘടനകളുമായി കുപ്രസിദ്ധ ബന്ധമുണ്ടെന്ന മന്ത്രിയുടെ ആരോപണത്തിനെതിരെയാണ് മുന്‍ റയല്‍ മാഡ്രിഡ് താരമായ കരിം ബെന്‍സെമ പരാതി നല്‍കിയിരിക്കുന്നത്.
പരാതിയില്‍ തനിക്ക് മുസ്‌ലിം സംഘടനകളായും അതില്‍ അംഗമാണെന്ന് അവകാശപ്പെടുന്നവരുമായും യാതൊരു തരത്തിലുമുള്ള ബന്ധവും അടുപ്പവുമില്ലെന്ന് കരിം ബെന്‍സെമ ചൂണ്ടിക്കാട്ടി. തനിക്കെതിരെയുള്ള പ്രചരണങ്ങള്‍ രാഷ്ട്രീയപരമായി എങ്ങനെയാണ് ഉപയോഗിക്കുന്നതെന്ന് നിരീക്ഷിക്കണമെന്നും കരിം ബെന്‍സെമ ആവശ്യപ്പെട്ടു.
‘സ്ത്രീകളെയും കുട്ടികളെയും ഒഴിവാക്കാതെ ഇസ്രഈല്‍ നടത്തുന്ന അന്യായമായി ഈ ബോംബാക്രമണത്തിന് ഇരയായ ഗസ നിവാസികള്‍ക്ക് ഞങ്ങളുടെ എല്ലാ പ്രാര്‍ത്ഥനകളും,’ ബെന്‍സെമ എക്‌സില്‍ കുറിച്ച വാക്കുകള്‍.
ഇതിനെ തുടര്‍ന്നാണ് ഫ്രഞ്ച് ആഭ്യന്തര മന്ത്രിയടക്കമുള്ളവര്‍ താരത്തിനെതിരെ ആരോപണങ്ങള്‍ ഉയർത്തിയത്. നിലവില്‍ സൗദി ക്ലബ്ബായ അല്‍ ഇത്തിഹാദിന് വേണ്ടിയാണ് കരിം ബെന്‍സേമ കളിക്കുന്നത്.
ഫുടബോള്‍ കരിയറിന്റെ ഭൂരിഭാഗം സമയവും റയല്‍ മാന്‍ഡ്രിഡിനൊപ്പം ചെലവഴിച്ച കരിം ബെന്‍സെമ നിരവധി ട്രോഫികള്‍ നേടിയിട്ടുണ്ട്. സ്പാനിഷ് ലീഗ്, സ്പാനിഷ് കപ്പ്, യുവേഫ ചാമ്പ്യന്‍സ് ലീഗ്, ഫിഫാ ലോകകപ്പ് ഉള്‍പ്പെടെയുള്ള നേട്ടങ്ങളാണ് താരം കൈവരിച്ചിരിക്കുന്നത്.
Content Highlight: Karim Benzema has filed a defamation complaint against the French interior minister
