ഏറെ പ്രതീക്ഷയോടെ കാത്തിരിക്കുന്ന പാൻ ഇന്ത്യൻ ചിത്രങ്ങളിലൊന്നായ കാന്താര ചാപ്റ്റർ 1, അടുത്തവർഷം ഒക്‌ടോബർ 2ന് റിലീസ് ചെയ്യാൻ ഒരുങ്ങുന്നു.
ഹോംബാലെ ഫിലിംസിൻ്റെ ബാനറിൽ വിജയ് കിരഗണ്ടൂർ നിർമിക്കുന്ന അടുത്ത പാൻ ഇന്ത്യൻ സിനിമ എന്ന നിലയിൽ, പ്രേക്ഷകരെ ഒരിക്കൽ കൂടി ആകർഷിക്കുവാൻ ഒരുങ്ങുകയാണ് കാന്താര ചാപ്റ്റർ 1.
ആഗോളതലത്തില്‍ കളക്ഷന്‍ റെക്കോഡുകള്‍ തിരുത്തിക്കുറിച്ച ചിത്രത്തിന്റെ രണ്ടാം ഭാഗത്തിന്റെ റിലീസ് പ്രഖ്യാപിച്ചുകൊണ്ടുള്ള അപ്‌ഡേറ്റ് വീഡിയോ സോഷ്യല്‍മീഡിയയിൽ തരംഗമായിരിക്കുകയാണ്. നേരത്തെ ഇറക്കിയ ഇതിന്റെ ഫസ്റ്റ്‌ലുക്ക് ടീസര്‍ വന്‍ ഹിറ്റായിരുന്നു. ഏഴ് ഭാഷകളില്‍ എത്തിയ ടീസർ പങ്കുവെച്ചുകൊണ്ട് ചിത്രത്തിന് തുടര്‍ച്ചയുണ്ടാവുമെന്ന് അണിയറപ്രവര്‍ത്തകര്‍ വ്യക്തമാക്കിയിരുന്നു.
കാന്താരയുടെ പ്രീക്വലായിരിക്കും ചിത്രമെന്നും റിപ്പോര്‍ട്ടുണ്ടായിരുന്നു. ഇത് വെറും പ്രകാശമല്ല, ദര്‍ശനം തന്നെയാകും എന്നാണ് ഹോംബാലെ ഫിലിംസ് പുറത്തുവിട്ട അനൗണ്‍സ്‌മെന്റ് വീഡിയോയിലുള്ളത്. കാന്താരയില്‍ ഋഷഭ് ഷെട്ടി അവതരിപ്പിച്ച ശിവ എന്ന കഥാപാത്രത്തിന്റെ “ഭൂതക്കോലം” കെട്ടുന്ന പിതാവിന്റെ കഥയായിരിക്കും വരാനിരിക്കുന്ന ചിത്രമെന്നാണ് റിപ്പോര്‍ട്ട്.
കാന്താര പ്രോജക്റ്റിന് ചുക്കാൻ പിടിക്കുന്ന നടനും സംവിധായകനുമായ ഋഷഭ് ഷെട്ടി തൻ്റെ റോളിനായി തയ്യാറെടുക്കുകയാണ്. തൻ്റെ കഥാപാത്രത്തെ ആധികാരികമായി അവതരിപ്പിക്കാൻ, കേരളത്തിൽ നിന്ന് ഉത്ഭവിച്ച ഏറ്റവും പഴയ ആയോധന കലകളിലൊന്നായ കളരിപ്പയറ്റിൽ ഋഷഭ് കഠിനമായ പരിശീലനവും നേടിയെടുത്തു.
കൊങ്കൺ നാടോടിക്കഥകളുടെ സമ്പന്നതയെ ലോകത്തിന് പരിചയപ്പെടുത്തിയത് കാന്താര ഒന്നാം ഭാഗമാണ്. ചിത്രത്തിൻ്റെ റിലീസ് തീയതി നിർമാതാക്കൾ പ്രഖ്യാപിച്ചതോടെ ‘കാന്താര’ ചാപ്റ്റർ 1 നെ ചുറ്റിപ്പറ്റിയുള്ള ആവേശം ഇരട്ടിയായി. ഈ സിനിമ മറ്റൊരു സിനിമാറ്റിക് നാഴികക്കല്ലായി മാറാനുള്ള കാത്തിരിപ്പിലാണ് ആരാധകർ. പി.ആർ.ഒ മഞ്ജു ഗോപിനാഥ്
Content Highlight: Kanthara Chapter 1 release Date