കണ്ണൂര്‍ സ്‌ക്വാഡിലെ പുതിയ ഗാനം പുറത്ത്. ലിറിക്കല്‍ വിഡിയോ ആയിട്ടാണ് പുതിയ ഗാനം റിലീസ് ചെയ്തിരിക്കുന്നത്.
‘മൃദുഭാവേ ദൃഢകൃത്യേ’ എന്ന ഗാനമാണ് മമ്മൂട്ടി കമ്പനിയുടെ യൂട്യൂബ് ചാനല്‍ വഴി റിലീസ് ചെയ്തിരിക്കുന്നത്. സുഷിന്‍ ശ്യാം ആണ് സംഗീതം. സുഷിന്‍ ശ്യാം തന്നെ ആലപിച്ച ഗാനത്തിന്റെ വരികള്‍ വിനായക് ശശികുമാറിന്റേതാണ്.
മമ്മൂട്ടി നായകനായി റോബി വര്‍ഗീസ് രാജ് സംവിധാനം ചെയ്യുന്ന കണ്ണൂര്‍ സ്‌ക്വാഡ് നടന്ന സംഭവങ്ങളെ ആസ്പദമാക്കിയുള്ളതാണ്. ചിത്രം നാളെ തിയേറ്ററുകളിലെത്തും.
കേസന്വേഷണത്തിന്റെ ഭാഗമായി പ്രതികളെ പിടിക്കാന്‍ ഇന്ത്യയൊട്ടാകെ സഞ്ചരിക്കുന്ന എ.എസ്.ഐ ജോര്‍ജ് മാര്‍ട്ടിനും സംഘത്തിന്റെ കഥയാണ് കണ്ണൂര്‍ സ്‌ക്വാഡ്.
2180 പ്രവര്‍ത്തകരാണ് ഈ ബിഗ് ബഡ്ജറ്റ് ചിത്രത്തിന് പിന്നില്‍ പ്രവര്‍ത്തിച്ചത്. ചിത്രത്തിന്റെ കഥ ഷാഫിയും തിരക്കഥ ഡോക്ടര്‍ റോണിയും ഷാഫിയും ചേര്‍ന്നൊരുക്കുന്നു.
മമ്മൂട്ടിയോടൊപ്പം കിഷോര്‍കുമാര്‍,വിജയരാഘവന്‍, അസീസ് നെടുമങ്ങാട്, ശബരീഷ്,റോണിഡേവിഡ്,മനോജ്.കെ.യു തുടങ്ങി നിരവധി താരങ്ങള്‍ അഭിനയിക്കുന്ന ഇന്‍വെസ്റ്റിഗേഷന്‍ ത്രില്ലെര്‍ ചിത്രം ബിഗ് ബഡ്ജറ്റില്‍ ഒരുങ്ങിയ ചിത്രമാണ്.ചിത്രത്തിന്റെ എക്‌സിക്യൂട്ടീവ് പ്രൊഡ്യൂസര്‍ എസ്സ് ജോര്‍ജാണ്. ദുല്‍ഖര്‍ സല്‍മാന്റെ വേഫേറെര്‍ ഫിലിംസ് ആണ് ചിത്രത്തിന്റെ കേരളത്തിലെ വിതരണക്കാര്‍.
