ഇന്ദിരാ ഗാന്ധിയുമായി എനിക്ക് സാമ്യമുണ്ടെന്നാണ് ആളുകള്‍ പറയുന്നത്: കങ്കണ റണൗട്ട്

ബോളിവുഡിലെ ഏറ്റവും മികച്ച അഭിനേത്രിമാരിലൊരാലാണ് കങ്കണ റണൗട്ട്. 2016ല്‍ പുറത്ത് വന്ന ഗ്യാങ്സ്റ്റര്‍ ആയിരുന്നു കങ്കണയുടെ ആദ്യചിത്രം. സിനിമ അഭിനയത്തില്‍ 16ാം വര്‍ത്തിലേക്ക് കടക്കുന്ന കങ്കണ തന്റെ എല്ലാ കഥാപാത്രങ്ങളും മികച്ചതാക്കാറുണ്ട്.

അഭിനയത്തില്‍ മുന്നില്‍ നില്‍ക്കുന്നത് പോലെ തന്നെ വിവാദങ്ങളുണ്ടാക്കാനും കങ്കണ മുന്നില്‍ തന്നെയുണ്ട്. പലപ്പോഴും കങ്കണയുടെ പ്രസ്താവനകള്‍ വിവാദമാകാറുണ്ട്. ഇന്ദിരാഗാന്ധിയുമായി തനിക്ക് സാമ്യമുണ്ടെന്ന് ആളുകള്‍ പറഞ്ഞിട്ടുണ്ടെന്ന് പറയുകയാണ് കങ്കണ. ഗലാട്ട പ്ലസിന് നല്‍കിയ അഭിമുഖത്തിലാണ് കങ്കണ ഇക്കാര്യം പറഞ്ഞത്.

‘എന്റെ കഥാപാത്രങ്ങളുമായി എനിക്ക് ഒരു ആത്മബന്ധമുണ്ടാകാറുണ്ട്. അവരുമായി എനിക്ക് സാമ്യങ്ങളുമുണ്ടാവാറുണ്ട്. അത് എന്നെ തന്നെ അത്ഭുതപ്പെടുത്തിയ കാര്യമാണ്. അങ്ങനെയാവുന്നത് ഒരു വിശ്വാസമാണ്. ഞാന്‍ വിശ്വസിക്കുന്നതിലേക്ക് എത്തുക എന്നത്. ഇത്രയധികം കഥാപാത്രങ്ങളുമായി സാമ്യമുണ്ടാവുക എന്നത് അസാധ്യമാണെന്ന് പല ആളുകളും എന്നോട് പറഞ്ഞിട്ടുണ്ട്.

ഇനി എമര്‍ജന്‍സി എന്ന സിനിമയാണ് ഞാന്‍ ചെയ്യാന്‍ പോകുന്നത്. എനിക്ക് ഇന്ദിരാ ഗാന്ധിയുമായി സാമ്യമുണ്ടെന്നാണ് ഇപ്പോള്‍ ആളുകള്‍ പറയുന്നത്,’ കങ്കണ പറഞ്ഞു.

റസ്‌നീഷ് ഗായി സംവിധാനം ചെയ്യുന്ന ധാക്കഡാണ് ഉടന്‍ പുറത്തിറങ്ങാനിരിക്കുന്ന കങ്കണയുടെ ചിത്രം. അഗ്നി എന്ന കഥാപാത്രത്തെയാണ് ചിത്രത്തില്‍ കങ്കണ അവതരിപ്പിക്കുന്നത്.

‘ധാക്കഡ് മെയ്ന്‍സ്ട്രീമിന്റെ ഭാഗമായ വാണിജ്യ സിനിമയാണ്. അതിനായുള്ള തയാറെടുപ്പുകളും വളരെ തീവ്രമായിരുന്നു. അഗ്നി എന്ന ഈ ചിത്രത്തിലെ കഥാപാത്രം ദേഷ്യക്കാരിയാണ്. നമ്മുടെ ഉള്ളിലുള്ള പ്രശ്‌നങ്ങള്‍ പുറത്തേക്ക് വരുന്നത് ദേഷ്യമായിട്ടാണ്. ഷൂട്ടിനിടയിലുള്ള അടി, പിടി, കുത്ത്, ബോംബിംഗ് അതെല്ലാം വളരെയധികം വയലന്‍സാണ്. അതെന്നെയും ബാധിച്ചിരുന്നു.

ഭൈരവിയുടെ ഒരു ഭാഗമാണ് ഈ സിനിമയിലെ അഗ്നി. ഭൈരവി പ്രപഞ്ചത്തിലെ സംഹാരത്തിന്റെ ഊര്‍ജമാണ്. എന്നെ സംബന്ധിച്ചിടത്തോളം അഗ്നിയിലുള്ളത് സംഹാരത്തിന്റെ ഊര്‍ജമാണ്. ആ ഊര്‍ജമാണ് കഥാപാത്രത്തിനായി ഉപയോഗിച്ചത്. എന്റെ കഥാപാത്രങ്ങളുമായി ആത്മബന്ധം വേണം ഇല്ലങ്കില്‍ അവരെ എനിക്ക് മനസിലാക്കാന്‍ സാധിക്കില്ല,’ കങ്കണ പറഞ്ഞു.

ആക്ഷന്‍ സ്‌പൈ ത്രില്ലര്‍ ചിത്രമായ ധാക്കഡ് മെയ് 27ന് തിയേറ്ററുകളിലെത്തും. ഹിന്ദിക്ക് പുറമെ തമിഴ്, തെലുങ്ക്, മലയാളം ഭാഷകളിലും ചിത്രം റിലീസ് ചെയ്യുന്നുണ്ട്. ജയലളിതയുടെ ജീവിതം പറഞ്ഞ തലൈവിക്കു ശേഷം കങ്കണയുടെ പാന്‍ ഇന്ത്യന്‍ റിലീസായി എത്തുന്ന ചിത്രം കൂടിയാണ് ധാക്കഡ്.

Content Highlight: Kangana Ranaut says People say I have a lot in common with Indira Gandhi