ജലീല്‍ ചോദ്യം ചെയ്യലിന് ഒളിച്ചു പോയത് ശരിയായില്ല; എല്‍.ഡി.എഫിനെ അടിക്കനുളള വടിയല്ല സി.പി.ഐ എന്ന് കാനം രാജേന്ദ്രന്‍
ഡൂള്‍ന്യൂസ് ഡെസ്‌ക്
Thursday, 24th September 2020, 6:13 pm
തിരുവനന്തപുരം: സ്വര്‍ണ്ണക്കടത്തുകേസില്‍ എന്‍.ഐ.എ അന്വേഷണം സെക്രട്ടറിയേറ്റിന് ചുറ്റും മാത്രം കറങ്ങുകയാണെന്ന് സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍.
സംശയത്തിന്റെ നിഴലില്‍ സംസ്ഥാന സര്‍ക്കാരിനെ നിര്‍ത്താന്‍ ബി.ജെ.പി ശ്രമിക്കുകയാണ്. ബി.ജെ.പിയോട് കൂട്ടുചേര്‍ന്ന് സര്‍ക്കാരിനെതിരെ പ്രതിപക്ഷം നടത്തുന്നത് അക്രമ സമരമാണ്. ഇത് ജനങ്ങളോടുള്ള യുദ്ധപ്രഖ്യാപനമാണെന്നും അദ്ദേഹം പറഞ്ഞു.
സ്വര്‍ണ്ണക്കടത്ത് അന്വേഷണം ശരിയായ രീതിയില്‍ അല്ല നടക്കുന്നതെന്നും മന്ത്രി കെ.ടി ജലീല്‍ ചോദ്യം ചെയ്യലിന് വേണ്ടി ഒളിച്ചുപോയത് ശരിയായില്ലെന്നും അദ്ദേഹം പറഞ്ഞു. ജലീല്‍ അങ്ങനെ ചെയ്യാന്‍ പാടില്ലായിരുന്നെന്നും സര്‍ക്കാര്‍ കാറില്‍ പോകാമായിരുന്നെന്നും കാനം പറഞ്ഞു.
