ഇത് ഞാൻ ചെയ്താൽ നന്നാവില്ലെന്ന് പറഞ്ഞ പൃഥ്വി തന്നെ ആ വേഷത്തിലൂടെ മികച്ച നടനുള്ള അവാർഡ് വാങ്ങി: കമൽ

മലയാളത്തിന് മികച്ച സിനിമകൾ സമ്മാനിച്ചിട്ടുള്ള സംവിധായകനാണ് കമൽ. വ്യത്യസ്തമായ ഒരുപാട് സിനിമകൾ ഒരുക്കിയിട്ടുള്ള കമലിന്റെ ഏറെ പ്രശംസ നേടിയ ചലച്ചിത്രമായിരുന്നു സെല്ലുലോയ്ഡ്.

മലയാള സിനിമയുടെ പിതാവായ ജെ. സി. ഡാനിയലിന്റെ ജീവിതത്തെ ആസ്പദമാക്കി ഒരുങ്ങിയ ചിത്രത്തിൽ പൃഥ്വിരാജായിരുന്നു നായകൻ. പൃഥ്വിരാജിന് മികച്ച നടനുള്ള സംസ്ഥാന അവാർഡ് നേടിയ ചിത്രം കൂടിയാണ് സെല്ലുലോയ്ഡ്.

പൃഥ്വിയോട് ആദ്യമായി സിനിമയെ കുറിച്ച് പറഞ്ഞ അനുഭവം പങ്കുവെക്കുകയാണ് കമൽ. ചിത്രത്തെ കുറിച്ച് പറഞ്ഞപ്പോൾ ജെ.സി. ഡാനിയലിനെ കുറിച്ച് തനിക്ക് ശരിക്കും അറിയില്ലെന്നും താൻ ചെയ്താൽ കഥാപാത്രം ശരിയാകുമോയെന്നും പൃഥ്വി ചോദിച്ചെന്ന് കമൽ പറയുന്നു. ജെ.സി. ഡാനിയലിന്റെ ജീവിതത്തിൽ ഇത്രത്തോളം സംഭവങ്ങൾ ഉണ്ടെന്ന് പൃഥ്വി മനസിലാക്കിയത് അന്നാണെന്നും കമൽ പറഞ്ഞു. കൗമുദി മൂവിസിനോട് സംസാരിക്കുകയായിരുന്നു അദ്ദേഹം.

‘ഞാൻ അന്ന് പൃഥ്വിരാജിനെ ഫോണിൽ വിളിച്ചിട്ട് പറഞ്ഞു, ഞാൻ ജെ.സി. ഡാനിയലിന്റെ ബയോപിക് ചെയ്യാൻ പോവുന്നു, നിങ്ങളാണ് അതിൽ പ്രധാന കഥാപാത്രത്തെ അവതരിപ്പിക്കുന്നത്.

അത് കേട്ടപാടെ പൃഥ്വിരാജ് പറഞ്ഞു, അയ്യോ അദ്ദേഹത്തെ കുറിച്ച് എനിക്കറിയില്ല. ഞാൻ കേട്ടിട്ടുണ്ട് എന്നല്ലാതെ എനിക്ക് നന്നായി അറിയില്ലായെന്ന്. ഞാൻ പറഞ്ഞു, ഞാൻ സ്ക്രിപ്റ്റ് ആയിട്ട് അടുത്തേക്ക് വരാമെന്ന്.

ഞാൻ ചെന്ന് സ്ക്രിപ്റ്റ് പറഞ്ഞു കൊടുത്തു. അത് കേട്ടപ്പോൾ രാജു പറഞ്ഞു, ഇദ്ദേഹത്തിന്റെ ജീവിതത്തിൽ ഇത്രത്തോളം സംഭവങ്ങളൊക്കെ ഉണ്ടായിരുന്നോയെന്ന്. അങ്ങനെയൊരു മനുഷ്യനാണോ ജെ. സി. ഡാനിയൽ. ഞാനിത് ചെയ്താൽ റെഡിയാവുമോയെന്ന് പൃഥ്വി ചോദിച്ചു.

ഞാൻ പറഞ്ഞു, നിങ്ങൾ ചെയ്താലേ ശരിയാവു. കാരണം ഇങ്ങനെയൊരു സിനിമയെടുക്കുമ്പോൾ അദ്ദേഹത്തിന് പത്തിരുപത്തെട്ട് വയസ്സേയുള്ളൂ. അന്ന് പൃഥ്വിരാജിനും അതേപ്രായമാണ്. അത്രയായിട്ടുണ്ടോ എന്നെനിക്കറിയില്ല. രാജുവിനെ പോലൊരു ചെറുപ്പക്കാരൻ തന്നെ വേണമായിരുന്നു ഈ കഥാപാത്രം അവതരിപ്പിക്കാൻ,’കമൽ പറയുന്നു.

പൃഥ്വിരാജ് അന്നും നല്ല പ്രതിഫലം വാങ്ങുന്ന നാടനാണെന്നും എന്നാൽ തനിക്ക് അത്ര നൽകാൻ കഴിയില്ലെന്ന കാര്യം തുറന്ന് പറഞ്ഞെന്നും കമൽ പറയുന്നു.

‘പൃഥ്വിരാജ് അന്ന് തന്നെ നല്ല പൈസ വാങ്ങിക്കുന്ന ഒരു നടനാണ്. വലിയ ഹീറോയായി കഴിഞ്ഞിട്ടുണ്ട്. രാജു ഇപ്പോൾ വാങ്ങിക്കൊണ്ടിരിക്കുന്ന പൈസ തരാൻ എന്റെ കയ്യിൽ ഉണ്ടാവില്ലായെന്ന് ഞാൻ പറഞ്ഞു.

കാരണം ഞാൻ ഈ സിനിമയുടെ നിർമാതാവാണ്. എനിക്ക് വേറേ നിർമാതാവില്ല. അതുകൊണ്ട് ഞാൻ തരുന്ന പണം വാങ്ങിക്കണം, അതിന് തയ്യാറാണോ എന്ന് ചോദിച്ചു. രാജു കുറെ നേരം ചിരിച്ചിട്ട് എന്നോട് ചോദിച്ചു, സാർ മൊത്തത്തിൽ എന്നെയങ്ങ് പൂട്ടുകയാണല്ലേയെന്ന്,’ കമൽ പറഞ്ഞു.

Content Highlight: Kamal Talk About Experience With Prithviraj In Celluloid Movie