വെട്രിമാരന്റെ അടുത്ത ചിത്രത്തില്‍ നായകനായി കമല്‍ ഹാസന്?; സിനിമയാകുന്നത് ജനപ്രിയ നോവലെന്നും റിപ്പോര്‍ട്ട്
എന്റര്‍ടെയിന്‍മെന്റ് ഡെസ്‌ക്
Friday, 2nd July 2021, 5:00 pm
ചെന്നൈ: വെട്രിമാരന്‍ സംവിധാനം ചെയ്യുന്ന പുതിയ ചിത്രത്തില്‍ കമല്‍ ഹാസന് നായകനാവുമെന്ന് റിപ്പോര്‍ട്ട്. തമിഴിലെ ജനപ്രിയ നോവലുകളില്‍ ഒന്നാണ് സിനിമയാകുന്നതെന്നാണ് പുറത്തുവരുന്ന റിപ്പോര്‍ട്ടുകള്‍.
ചില തമിഴ്‌സിനിമാ മാധ്യമങ്ങളാണ് ഇക്കാര്യം റിപ്പോര്‍ട്ട് ചെയ്തിരിക്കുന്നത്. കഥ കമല്‍ ഹാസന് ഇഷ്ടമായെന്നും നിലവില്‍ അഭിനയിക്കുന്ന വിക്രം സിനിമയുടെ ഷൂട്ട് കഴിഞ്ഞാല്‍ ഈ ചിത്രത്തിലായിരിക്കും കമല്‍ അഭിനയിക്കുകയെന്നുമാണ് റിപ്പോര്‍ട്ടുകള്‍ പറയുന്നത്.
ഗോപുരം ഫിലിംസ് ആണ് ചിത്രം നിര്‍മ്മിക്കുക. അസുരനാണ് വെട്രിമാരന്‍ സംവിധാനം ചെയ്ത് തിയേറ്ററുകളില്‍ ഒടുവില്‍ റിലീസ് ചെയ്ത ചിത്രം.
നൂറ് സിംഹാസനങ്ങള്‍ എന്ന ഏറെ ചര്‍ച്ചയായ നോവലിന്റെ രചയിതാവായ ജയമോഹന്റെ തുണൈവന്‍ എന്ന ചെറുകഥയെ അടിസ്ഥാനമാക്കി ഒരുക്കുന്ന വിടുതലൈയാണ് വെട്രിമാരന്റെ പുതിയ ചിത്രം.
