കൊച്ചി: നടന്‍ പൃഥിരാജ് പങ്കാളിത്തം പിരിഞ്ഞ ശേഷം ഓഗസ്റ്റ് സിനിമാസ് ആദ്യമായി നിര്‍മ്മിക്കുന്ന പുതിയ ചിത്രം “കളി”യിലെ രണ്ടാമത്തെ പാട്ടും പുറത്ത് വിട്ടു. നടന്‍ ടോവീനോ തോമസിന്റെ ഫേസ്ബുക്ക് പേജിലൂടെയായിരുന്നു “കിണ്ണം കട്ട കള്ളനാണെ” എന്നു തുടങ്ങുന്ന രണ്ടാമത്തെ പാട്ട് പുറത്ത് വിട്ടത്.
പിഎസ് റഫീഖിന്റെ വരികള്‍ക്ക് രാഹുല്‍ രാജിന്റേതാണ് സംഗീതം. കഴിഞ്ഞ ദിവസം പൂ പൂത്തുവോ എന്നു തുടങ്ങുന്ന ആദ്യ ഗാനം അണിയറ പ്രവര്‍ത്തകര്‍ പുറത്ത് വിട്ടിരുന്നു. കെ എസ് ഹരികുമാര്‍, രാധികാ നാരായണന്‍ എന്നിവര്‍ ചേര്‍ന്നായിരുന്നു പൂ പൂത്തുവോ എന്ന് ഗാനം ആലപിച്ചത്.
നിരവധി ശ്രദ്ധേയ ചിത്രങ്ങള്‍ക്ക് തിരക്കഥ ഒരുക്കിയ നജീം കോയ ആദ്യമായി സംവിധായകനാകുന്ന ചിത്രമാണ് കളി. പുതുമുഖ താരങ്ങളാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നത്.
ലിജിന്‍ ജോസ് സംവിധാനം ചെയ്ത ഫ്രൈഡേ, അപൂര്‍വ്വ രാഗം എന്നീ ചിത്രങ്ങളുടെ തിരക്കഥയും ദിലീപ് നായകനായ ടു കണ്‍ട്രീസ് എന്ന് ചിത്രത്തിന്റെ കഥയും നജിമായിരുന്നു രചിച്ചത്. ബിജു മേനോന്‍ നായകനായ ഷെര്‍ലക്ക് ടോംസ് ആണ് നജിം തിരക്കഥയൊരുക്കി തിയേറ്ററില്‍ എത്തിയ അവസാന ചിത്രം.