മലയാളികള്‍ക്ക് ഏറെ പ്രിയപ്പെട്ട നടനാണ് കലാഭവന്‍ ഷാജോണ്‍. അദ്ദേഹം ആദ്യമായി സംവിധാനം ചെയ്ത് പുറത്തിറങ്ങിയ ചിത്രമാണ് ബ്രദേഴ്സ് ഡേ. 2019ലായിരുന്നു ഈ കോമഡി ആക്ഷന്‍ ത്രില്ലര്‍ ചിത്രം റിലീസിന് എത്തിയത്. പൃഥ്വിരാജ് സുകുമാരന്‍ ആയിരുന്നു ഈ സിനിമയില്‍ നായകനായത്.

മിയ ജോര്‍ജ്, മഡോണ സെബാസ്റ്റ്യന്‍, പ്രയാഗ മാര്‍ട്ടിന്‍, ഐശ്വര്യ ലക്ഷ്മി തുടങ്ങിയവര്‍ നായികമാരായി എത്തിയപ്പോള്‍ തമിഴ് നടന്‍ പ്രസന്നയും ഒരു പ്രധാനവേഷത്തില്‍ അഭിനയിച്ചു. ഇപ്പോള്‍ നാന സിനിമാവാരികക്ക് നല്‍കിയ അഭിമുഖത്തില്‍ താന്‍ ബ്രദേഴ്സ് ഡേ സംവിധാനം ചെയ്യാനുണ്ടായ കാരണം പറയുകയാണ് കലാഭവന്‍ ഷാജോണ്‍.

ദൃശ്യത്തിന് ശേഷം അഭിനയത്തില്‍ നിന്ന് ചെറിയ ഇടവേളകള്‍ കിട്ടിയിരുന്നുവെന്നും ആ സമയത്താണ് ബ്രദേഴ്സ് ഡേയുടെ തിരക്കഥയെഴുതി പൂര്‍ത്തിയാക്കിയതെന്നുമാണ് ഷാജോണ്‍ പറയുന്നത്. പൃഥ്വിരാജ് കഥ കേട്ടുകഴിഞ്ഞപ്പോള്‍ താന്‍ സംവിധാനം ചെയ്താല്‍ ഡേറ്റ് തരാമെന്ന് പറയുകയായിരുന്നുവെന്നും അദ്ദേഹം കൂട്ടിച്ചേര്‍ത്തു.

‘2009ലാണ് ഈ സിനിമയ്ക്ക് ആസ്പദമായ ഒരു ത്രെഡ് മനസിലേക്ക് വന്നത്. പിന്നീടത് വികസിപ്പിക്കാനുള്ള ശ്രമമായിരുന്നു ഞാന്‍. ഏതാണ്ട് 2013ല്‍ അതായത് ദൃശ്യത്തിന് ശേഷം ആക്ടിങ്ങില്‍ നിന്ന് ചെറിയ ഇടവേളകള്‍ കിട്ടിയിരുന്നു. നല്ല ക്യാരക്ടര്‍ റോളുകള്‍ കിട്ടിത്തുടങ്ങിയ നാളുകളായിരുന്നല്ലോ അത്.

ആ സമയത്താണ് തിരക്കഥയെഴുതി പൂര്‍ത്തിയാക്കിയത്. എഴുതിക്കഴിഞ്ഞപ്പോള്‍ കൊള്ളാമെന്ന് തോന്നി. അങ്ങനെയാണ് രാജുവിനോട് കഥ പറയാന്‍ പോകുന്നത്. കഥ കേട്ടുകഴിഞ്ഞപ്പോള്‍ രാജു പറഞ്ഞത് ഷാജോണ്‍ ചേട്ടന്‍ സംവിധാനം ചെയ്താല്‍ ഡേറ്റ് തരാമെന്നായിരുന്നു.

സത്യത്തില്‍ മറ്റൊരാളായിരുന്നു സംവിധായകനായി എന്റെ മനസില്‍ ഉണ്ടായിരുന്നത്. അദ്ദേഹവുമായി രാജു മറ്റൊരു പ്രോജക്ടില്‍ കമിറ്റഡായിരുന്നു. അതുകൊണ്ടാകാം രാജു ആ ദൗത്യം എന്നിലേക്ക് വെച്ചുനീട്ടിയത്.

രാജുവിനെ പോലൊരു അഭിനേതാവിന്റെ തീരുമാനമാണ്. തീര്‍ച്ചയായും അതൊരു ദൈവനിശ്ചയമാകാമെന്നും എനിക്ക് തോന്നി. അങ്ങനെയാണ് സിനിമ സംവിധാനം ചെയ്യാന്‍ ഞാന്‍ മനസുകൊണ്ട് തയ്യാറെടുക്കുന്നത്,’ കലാഭവന്‍ ഷാജോണ്‍ പറയുന്നു.

Content Highlight: Kalabhavan Shajon Talks About Why He Direct Brothers Day Movie With Prithviraj Sukumaran