വല്ല്യേട്ടന്‍ സിനിമ 1880 തവണ സംപ്രേഷണം ചെയ്തുവെന്ന നിര്‍മാതാവിന്റെയും 1900 തവണ സംപ്രേഷണം ചെയ്തുവെന്ന സംവിധായകന്റെയും വാദം തെറ്റാണെന്ന് കൈരളി ചാനലിന്റെ സീനിയര്‍ ഡയറക്ടര്‍ എം. വെങ്കിട്ടരാമന്‍. കൈരളി ഈ സിനിമ 1880 തവണ കാണിച്ചു എന്ന നിര്‍മാതാക്കളുടെ അവകാശവാദം വസ്തുതാപരമല്ലെന്നും ആദ്യ വര്‍ഷങ്ങളില്‍ ഈ സിനിമ വിശേഷ ദിവസങ്ങളില്‍ മാത്രമേ പ്രദര്‍ശിപ്പിച്ചിരുന്നുള്ളൂവെന്നും അദ്ദേഹം പറഞ്ഞു.
ഗോഡ്ഫാദര്‍, വിയറ്റ്നാം കോളനി, മണിച്ചിത്രത്താഴ്, പഞ്ചാബി ഹൗസ് എന്നീ സിനിമകള്‍ ഏഷ്യാനെറ്റ് കാണിച്ചത് പോലെയേ വല്ല്യേട്ടനും സംപ്രേഷണം ചെയ്തിട്ടുള്ളൂവെന്നും അമിതമായി വല്ല്യേട്ടന്‍ കാണിക്കുന്നുവെന്നത് കൈരളിയുടെ ശത്രുക്കള്‍ ഉണ്ടാക്കിയ പ്രതീതിയാണെന്നും വെങ്കിട്ടരാമന്‍ കൂട്ടിച്ചേര്‍ത്തു.
സാമൂഹ്യമാധ്യമങ്ങളില്‍ ചിലര്‍ അവര്‍ക്ക് കാഴ്ചക്കാരെ കിട്ടാന്‍ വേണ്ടി വിളിച്ചു പറയുന്നതൊക്കെ വസ്തുതയായി എടുത്ത് കൈരളി 1880 തവണ വല്യേട്ടന്‍ കാണിച്ചുവെന്ന് നിര്‍മാതാക്കളും 1900 തവണ എന്നു സംവിധായകനും പറയുന്നത് ഖേദകരമാണെന്നും വെങ്കിട്ടരാമന്‍ പറഞ്ഞു.
ചിത്രത്തിന്റെ റീ റിലീസിങ് നടക്കാന്‍ പ്രധാന കാരണം കൈരളി ആ ചിത്രത്തെ ജനപ്രിയമാക്കി നിലനിര്‍ത്തിയ രീതിയും അതിനായി നല്‍കിയ പരസ്യങ്ങളുമാണെന്ന് വെങ്കിട്ടരാമന്‍ പറഞ്ഞു. അക്കാര്യം തിരിച്ചറിയാന്‍ അല്പമെങ്കിലും വിവേകം അണിയറപ്രവര്‍ത്തകര്‍ക്ക് ഉണ്ടാകേണ്ടതായിരുന്നുവെന്ന് വെങ്കിട്ടരാമന്‍ കൂട്ടിച്ചേര്‍ത്തു. ട്രോളന്മാര്‍ക്കൊപ്പം നിന്ന് അവര്‍ സ്വയം ട്രോള്‍ കഥാപാത്രങ്ങളായി മാറിയെന്നും റീ റിലീസിന്റെ പ്രൊമോഷന് വേണ്ടി ഒരു ദൃശ്യമാധ്യമത്തെ ഇകഴ്ത്തണമായിരുന്നോ എന്നും അദ്ദേഹം ചോദിച്ചു.
ചാനലിന് അബദ്ധത്തില്‍ സാറ്റ്ലൈറ്റ് റൈറ്റ്സ് കൊടുത്തതാണെന്ന നിര്‍മാതാവിന്റെ വാദവും കൈരളി തള്ളി. ചിത്രത്തിന്റെ സാറ്റ്ലൈറ്റ് റൈറ്റ് വകയില്‍ പല തവണയായി 40 ലക്ഷത്തോളം രൂപ നിര്‍മാതാവിന് നല്‍കിയിട്ടുണ്ടെന്നും അന്നത്തെ കാലത്ത് അത് വലിയൊരു തുകയായിരുന്നെന്നും വെങ്കിട്ടരാമന്‍ കൂട്ടിച്ചേര്‍ത്തു. കുറച്ചുകാലം കാത്തിരുന്നെങ്കില്‍ രണ്ട് കോടി വരെ കിട്ടിയേനെ എന്ന് നിര്‍മാതാവ് പറഞ്ഞിരുന്നെന്നും എന്നാല്‍ അത്രക്കൊന്നും കിട്ടാന്‍ സാധ്യതയില്ലെന്നും അദ്ദേഹം പറഞ്ഞു.
Content Highlight: Kairali TV senior director replied to Shaji Kailas and Baiju Ambalakkara’s statement about Valliettan movie