എട്ടുവര്‍ഷക്കാലത്തെ ഒബാമ ഭരണം സൃഷ്ടിച്ച വിഷമകരമായ സാഹചര്യത്തെ ഉപയോഗപ്പെടുത്തിയാണ് നവയാഥാസ്ഥിതിക ശക്തികള്‍ ട്രംപിന് അനുകൂലമായ വിധിയെഴുത്ത് ഉണ്ടാക്കിയെടുത്തത്. കോര്‍പ്പറേറ്റ് മൂലധനവും ആംഗ്ലോസാംസണ്‍ വംശീയതയും ചേര്‍ന്നാണ് ട്രംപിനെ അധികാരത്തിലേക്കെത്തിച്ചിരിക്കുന്നത്.
എല്ലാ സര്‍വെ ഫലങ്ങളെയും അസ്ഥാനത്താക്കിക്കൊണ്ട് തീവ്രവലതുപക്ഷത്തിന്റെ രാഷ്ട്രീയ പ്രതിനിധിയായ ഡൊണാള്‍ഡ് ട്രംപ് അമേരിക്കന്‍ തെരഞ്ഞെടുപ്പില്‍ വിജയം നേടിയിരിക്കുകയാണ്. അത്യന്തം സംഘര്‍ഷഭരിതവും വിവാദകലുഷിതവുമായ അമേരിക്കന്‍ തെരഞ്ഞെടുപ്പുമായി ബന്ധപ്പെട്ടു നടന്ന മൂന്ന് ദേശീയ സംവാദങ്ങളിലും ഹിലരി ക്ലിന്റന് വ്യക്തമായ മേല്‍ക്കൈ ലഭിച്ചിരുന്നു. അതിന്റെ അടിസ്ഥാനത്തിലാണ് എല്ലാ സര്‍വെ ഫലങ്ങളും ഹിലരിയുടെ വിജയം പ്രവചിച്ചത്.
ആകെയുള്ള 538 ഇലക്ടറല്‍ കോളേജില്‍ 288 പേരുടെ വോട്ട് ട്രംപിന് ലഭിച്ചതോടെ വിജയം ഔദേ്യാഗികമായി തന്നെ ഉറപ്പിക്കപ്പെട്ടു. ഏറ്റവും ഒടുവില്‍ ലഭ്യമായ കണക്കുപ്രകാരം ട്രംപിന് 48%വും ഹിലരിക്ക് 47% വോട്ടുകളുമാണ് കിട്ടിയത്. ശ്രദ്ധേയമായ കാര്യം കഴിഞ്ഞതവണ ഡെമോക്രാറ്റിക് സ്ഥാനാര്‍ത്ഥിയായിരുന്ന ഒബാമ മേല്‍ക്കൈ നിലനിര്‍ത്തിയ ഇടങ്ങളിലെല്ലാം ട്രംപ് മുന്നേറി എന്നതാണ്. സെനറ്റിലും യു.എസ് ഹൗസിലും റിപ്പബ്ലിക്കന്‍ പാര്‍ട്ടിക്ക് മുന്‍തൂക്കമുണ്ട്. യഥാക്രമം റിപ്പബ്ലിക്കന്‍ പാര്‍ട്ടിക്ക് 49 സീറ്റും ഡെമോക്രാറ്റിക് പാര്‍ട്ടിക്ക് 47 സീറ്റും ഉണ്ട്. 232-ഉം 175-ഉം സീറ്റുകളും.
തീവ്ര വലതുപക്ഷ താല്പര്യങ്ങളെയാണ് ഡൊണാള്‍ഡ് ട്രംപ് സ്വയം പ്രതിനിധീകരിക്കുന്നത്. കോര്‍പ്പറേറ്റുകള്‍ക്കു വേണ്ടി കോര്‍പ്പറേറ്റ് പ്രതിനിധികള്‍ ഭരണം നടത്തിക്കൊണ്ടുപോകുന്ന സംവിധാനമാണ് അമേരിക്കന്‍ ഭരണകൂടമെന്നത്. ലിബറലിസത്തിന്റെയും ജനാധിപത്യത്തിന്റെയും സ്വതന്ത്ര സമൂഹത്തിന്റെയും മാതൃകയായി പലരും ഉയര്‍ത്തിക്കാണിക്കുന്ന അമേരിക്കയുടെ രാഷ്ട്രീയവും ഭരണകൂട സംവിധാനവും മൂലധനാധിപത്യത്തിലും ആംഗ്ലോസാംസണ്‍ വംശീയതയിലും അധിഷ്ഠിതമാണ്.
നിഷ്ഠൂരമായ ഹിംസയുടെയും ക്രൂരമായ അധിനിവേശങ്ങളുടെയും രക്തപങ്കിലമായ ചരിത്രമാണ് അമേരിക്കക്കുള്ളത്. റെഡ് ഇന്ത്യന്‍ വംശജരുടെ കൂട്ടക്കൊലയില്‍ തുടങ്ങി മധ്യപൂര്‍വദേശത്തെ നിഷ്ഠൂരമായ അധിനിവേശ ഭീകരത വരെ അത് നീണ്ടുകിടക്കുകയാണ്.
ഒരര്‍ത്ഥത്തില്‍ റിപ്പബ്ലിക്കന്‍മാരും ഡെമോക്രാറ്റുകളും അമേരിക്കയുടെ അധിനിവേശ താല്പര്യങ്ങളുടെ അധിനായകന്മാരാണെന്നതാണ് യാഥാര്‍ത്ഥ്യം. ചോംസ്‌കി നിരീക്ഷിക്കുന്നതുപോലെ ലോകത്തിലെ മറ്റ് രാഷ്ട്രങ്ങളും ഇതര ജനസമൂഹങ്ങളുമെല്ലാം തങ്ങളുടെ ഇച്ഛക്കുവഴങ്ങി ജീവിക്കേണ്ടവരാണെന്നാണ് അമേരിക്കന്‍ ഭരണകൂടം എന്നും കരുതിപോന്നിട്ടുള്ളത്.
ട്രംപും ഹിലരിയും ഒരേപോലെ അമേരിക്കന്‍ മൂലധനത്തിന്റെ അധിനിവേശ മോഹങ്ങളുടെ നിര്‍വാഹകരാണെന്ന കാര്യത്തില്‍ തര്‍ക്കിക്കേണ്ടതില്ല. പക്ഷെ ഡെമോക്രാറ്റുകളേക്കാള്‍ വംശീയവും മേധാവിത്വപരവുമായ രാഷ്ട്രീയ പ്രത്യയശാസ്ത്രമാണ് റിപ്പബ്ലിക്കന്‍മാരെ നയിക്കുന്നത് എന്ന കാര്യമാണ് അമേരിക്കന്‍ തെരഞ്ഞെടുപ്പിലെ ട്രംപിന്റെ വിജയം ലോകത്തിലെ ജനാധിപത്യവാദികളെയെല്ലാം അസ്വസ്ഥമാക്കുന്നത്.
2008ല്‍ ആരംഭിച്ച സാമ്പത്തിക പ്രതിസന്ധിയാണ് തീവ്രവലതുപക്ഷ രാഷ്ട്രീയങ്ങള്‍ക്ക് അമേരിക്ക ഉള്‍പ്പെടെയുള്ള വികസിത മുതലാളിത്ത സമൂഹങ്ങളില്‍ സ്വാധീനം ഉണ്ടാക്കിക്കൊടുത്തിരിക്കുന്നത്. ട്രംപാകട്ടെ ബിസിനസ്സില്‍ നിന്ന് പ്രസിഡന്റു സ്ഥാനാര്‍ത്ഥിയാകാന്‍ വേണ്ടി മാത്രം റിപ്പബ്ലിക്കന്‍ രാഷ്ട്രീയത്തിലേക്ക് പ്രവേശിച്ച ആളാണല്ലോ.
ശതകോടീശ്വരനായ ബിസിനസ്സ് മാഗ്നറ്റാണ് ട്രംപ്. ടെലിവിഷന്‍ പ്രൊഡ്യൂസറും പുസ്തകമെഴുത്തുകാരനും എന്നൊക്കെയുള്ള പരിവേഷമുള്ള ഇദ്ദേഹം ഓര്‍ഗനൈസേഷന്‍ എന്ന കോര്‍പ്പറേറ്റ് വ്യവസായ ശൃംഖലയുടെ ഉടമയാണ്. ആഗോള ഫൈനാന്‍സ് മൂലധനത്തിന്റെ ഊഹക്കച്ചവട മണ്ഡലങ്ങളില്‍ പണമെറിഞ്ഞു പണമുണ്ടാക്കുന്ന ചൂതാട്ട മുതലാളിയാണ് ട്രംപ്. റിയല്‍ എസ്റ്റേറ്റ്, റസ്റ്റോറന്റ് ബിസിനസ്സ് രംഗങ്ങളിലൂടെ ഊഹവ്യാപാരമൂലധനത്തിന്റെ അധിനായകനായി മാറിയ ട്രംപിന് അമേരിക്കന്‍ വംശീയവാദികളുടെ ദൃഢമായ പിന്തുണയുമുണ്ടായിരുന്നു.
എട്ടുവര്‍ഷക്കാലത്തെ ഒബാമ ഭരണം സൃഷ്ടിച്ച വിഷമകരമായ സാഹചര്യത്തെ ഉപയോഗപ്പെടുത്തിയാണ് നവയാഥാസ്ഥിതിക ശക്തികള്‍ ട്രംപിന് അനുകൂലമായ വിധിയെഴുത്ത് ഉണ്ടാക്കിയെടുത്തത്. കോര്‍പ്പറേറ്റ് മൂലധനവും ആംഗ്ലോസാംസണ്‍ വംശീയതയും ചേര്‍ന്നാണ് ട്രംപിനെ അധികാരത്തിലേക്കെത്തിച്ചിരിക്കുന്നത്.
അടുത്തപേജില്‍ തുടരുന്നു
സാമ്പത്തിക പ്രതിസന്ധി സൃഷ്ടിച്ച രൂക്ഷമായ തൊഴിലില്ലായ്മയും വിലക്കയറ്റവും വേതനം വെട്ടിക്കുറക്കലുകളും അമേരിക്കന്‍ സമൂഹത്തിലാകെ അസ്വസ്ഥത പടര്‍ത്തിയിരുന്നു. ഈയൊരു സാഹചര്യത്തെയും ഐ.എസ് ഉള്‍പ്പെടെയുള്ള ആഗോള ഭീകരവാദമുയര്‍ത്തുന്ന അമേരിക്കന്‍ സമൂഹത്തിന്റെ ആശങ്കകളെയും മുതലെടുത്താണ് ട്രംപ് വിജയത്തിനുള്ള വഴി തീര്‍ത്തത്.
2008-ലെ സാമ്പത്തിക പ്രതിസന്ധിയെ അതിജീവിക്കാന്‍ ഒബാമ പ്രഖ്യാപിച്ച രക്ഷാ പാക്കേജ് കോര്‍പ്പറേറ്റുകളെ മാത്രമാണ് സഹായിച്ചിട്ടുള്ളത്. യഥാര്‍ത്ഥത്തില്‍ 70,000 കോടി ഡോളറിന്റെ ബെയില്‍ഔട്ട് പദ്ധതി അമേരിക്കന്‍ ഭരണകൂടത്തിന്റെ കടപ്രതിസന്ധിയെ രൂക്ഷമാക്കുകയാണ് ചെയ്തത്. ജനങ്ങളുടെ ക്ഷേമത്തിനുപയോഗിക്കേണ്ട സര്‍ക്കാര്‍ പണം (ജനങ്ങളുടെ നികുതിപണം) കോടിക്കണക്കിന് ഡോളറുകള്‍ കോര്‍പ്പറേറ്റുകളുടെ രക്ഷക്കായി മാറ്റിവെച്ചതോടെയാണ് അമേരിക്കയിലെ സാമൂഹ്യക്ഷേമപദ്ധതികളെല്ലാം അവതാളത്തിലായത്.
മാന്ദ്യത്തില്‍ നിന്ന് സമ്പദ്ഘടനയെ രക്ഷിക്കാന്‍ ഒബാമ നടത്തിയ ഇടപെടലുകള്‍ അമേരിക്കന്‍ സമൂഹത്തില്‍ തൊഴിലില്ലായ്മയും ജനങ്ങളുടെ ദുരിതങ്ങളും കുറക്കുകയല്ല ചെയ്തത്. അത് രൂക്ഷമാക്കുകയായിരുന്നു. ഈയൊരു സാഹചര്യത്തെ കടുത്ത വംശീയ വാദികളായ ടീപാര്‍ടിക്കാരും റിപ്പബ്ലിക്കന്‍ പാര്‍ടിയിലെ വലതുപക്ഷക്കാരും ഡെമോക്രാറ്റിക് പാര്‍ടിക്കെതിരായി തിരിച്ചുവിട്ടതിന്റെ ഫലം കൂടിയാണ് ഹിലാരിയുടെ പരാജയകാരണം.
ട്രംപിന്റെ ആംഗ്ലോസാംസണ്‍ വെള്ളവംശീയതയിലധിഷ്ഠിതമായ പ്രചാരണങ്ങള്‍ അമേരിക്കന്‍ സമൂഹത്തില്‍ വലിയ ധ്രുവീകരണമുണ്ടാക്കി എന്നാണ് തെരഞ്ഞെടുപ്പ് ഫലങ്ങള്‍ സൂചിപ്പിക്കുന്നത്. കടുത്ത മുസ്‌ലീം വിരുദ്ധത പ്രചരണങ്ങളിലെങ്ങും അലയടിച്ചിരുന്നു.
കറുത്തവര്‍ക്കെതിരായി നടക്കുന്ന ക്രൂരമായ വംശീയാക്രമണങ്ങള്‍ക്കെതിരായ ചെറുത്തുനില്‍പ് അമേരിക്കന്‍ സമൂഹത്തില്‍ കറുത്തവര്‍ഗക്കാര്‍ക്കിടയില്‍ ശക്തമാണ്. കറുത്തവരുടെ ജീവന് പ്രസക്തിയുണ്ട് എന്നൊരു പ്രസ്ഥാനം തന്നെ അമേരിക്കയില്‍ ഇപ്പോള്‍ സജീവമായിരിക്കുകയാണ്. ആഫ്രോഅമേരിക്കക്കാര്‍ക്കിടയില്‍ ശക്തമായ അസംതൃപ്തി വളര്‍ന്നുവന്നിട്ടുണ്ട്.
അപ്പോഴും കോര്‍പ്പറേറ്റ് പിന്തുണയുള്ള അമേരിക്കന്‍ ഭരണകൂട വ്യവസ്ഥ കറുത്തവര്‍ക്കെതിരായ ആക്രമണങ്ങള്‍ക്ക് മൗനസമ്മതം നല്‍കുന്നതായിട്ടാണ് സമീപകാല സംഭവങ്ങള്‍ കാണിക്കുന്നത്. 65 ശതമാനത്തോളം വരുന്ന വെള്ളവംശജര്‍ക്കിടയില്‍ കടുത്ത വംശീയ വികാരം ഉദ്ദീപിപ്പിച്ചെടുത്തുകൊണ്ടാണ് ട്രംപ് അനുകൂലമായ വിജയം ഉണ്ടാക്കിയെടുത്തിരിക്കുന്നത്
ട്രംപില്‍ നിന്ന് വ്യതിരിക്തമായൊരു രാഷ്ട്രീയ വ്യക്തിത്വമായി അമേരിക്കന്‍ ജനമനസ്സില്‍ സ്വാധീനമുറപ്പിക്കാന്‍ ഹിലാരി ക്ലിന്റന് കഴിയുമായിരുന്നില്ല. ട്രംപിനെപോലെതന്നെ അവരും വന്‍കിട ബിസിനസ്സുകാരുടെയും പിന്തിരിപ്പന്‍ വിദേശനയ നിലപാടുകളുടെയും വക്താവാണല്ലോ.
സ്വയം പ്രഖ്യാപിത ഇടതുപക്ഷ സ്ഥാനാര്‍ത്ഥിയായി രംഗത്തുവന്ന ബേണിസാന്‍സേഴ്‌സിന്റെ സ്വതന്ത്രവ്യാപാര കരാറുകള്‍ക്കും അമേരിക്കയുടെ പശ്ചിമേഷ്യന്‍ നയങ്ങള്‍ക്കുമെതിരായുള്ള നിലപാടുകള്‍ ഏറെ ശ്രദ്ധിക്കപ്പെട്ടതാണ്. സാന്‍സേഴ്‌സിന്റെ പ്രചാരണ ക്യാമ്പയിനു ലഭിച്ച ജനപിന്തുണ കണ്ടാണ് ഹിലാരി തന്റെ കടുത്ത കോര്‍പ്പറേറ്റ് നിലപാടുകളില്‍ അയവു വരുത്താന്‍ നിര്‍ബന്ധിതയായത്.
ജോര്‍ജിയ, യൂട്ടാ, ഫ്‌ളോറിഡ, ഐഡഹോ, വയോമിങ്ങ്, നോര്‍ത്ത് ഡക്കോഡ, സൗത്ത് ഡക്കോഡ, നബ്രാസ്‌ക്കാ, കാന്‍സസ്, ടെക്‌സസ്, അര്‍കന്‍സാ, വെസ്റ്റ് വെര്‍ജീനിയ, ഒക്ലാഹോമ, ടെലിസി, മിസിസിപ്പി, കെന്‍ഡഗി, ഇന്ത്യാന, സൗത്ത് കരാലീന, അലബാമ, യൂസിയാന, മൊണ്ടാന, ഒഹായോ, മിസോറി, നോര്‍ത്ത് കരാലീന, ഒഹായോ എന്നീ സ്റ്റേറ്റുകളിലാണ് ട്രംപ് മുന്നേറ്റം നടത്തിയത്. ഓറിഗണ്‍, നെഗാഡ, കാലിഫോര്‍ണിയ, ഹവായി, കോളറാഡോ, വെര്‍ജീനിയ, ന്യൂമെക്‌സിക്കോ, ഇല്ലിനോയ്, മേരിലാന്റ്, ടെലവെയര്‍, ന്യൂജേഴ്‌സി, റോഡ് ഐലന്റ്, കനക്ടികട്ട്, ന്യൂയോര്‍ക്ക്, വെര്‍മോണ്‍, മസാച്ചുസിറ്റ്‌സ് കേന്ദ്രതലസ്ഥാന മേഖലയായ ഡിസ്ട്രിക് കൊളംബിയ തുടങ്ങിയ സ്റ്റേറ്റുകളില്‍ ഹിലാരിക്കൊപ്പവും നിന്നു.
നവലിബറല്‍ പരിഷ്‌കാരങ്ങളുടെ ഫലമായ സാമ്പത്തിക പ്രതിസന്ധിയും അതിന്റെ ആഘാതമേറ്റുവാങ്ങുന്ന ജനസമൂഹങ്ങളെ സ്വാധീനിക്കുന്ന വലതുപക്ഷ രാഷ്ട്രീയത്തിന്റെ സ്വാധീനവുമാണ് അമേരിക്കയിലെന്നപോലെ 2014-ല്‍ നടന്ന യൂറോപ്യന്‍ യൂണിയന്‍ തെരഞ്ഞെടുപ്പിലും പ്രകടമായത്. യൂറോപ്യന്‍ പാര്‍ലമെന്റിലേക്കു നടന്ന തെരഞ്ഞെടുപ്പില്‍ വലതുപക്ഷത്തേക്കുള്ള രാഷ്ട്രീയ ചുവടുമാറ്റം വ്യക്തമായി കണ്ടതാണല്ലോ.