കോഴിക്കോട്: ഉത്തര്‍ പ്രദേശിലെ നിരവധി മുസ്‌ലിം ഭൂരിപക്ഷ മണ്ഡലങ്ങളില്‍ ഇത്തവണ ബി.ജെ.പിയാണ് വിജയിച്ചതെന്ന് ബി.ജെ.പി സംസ്ഥാന പ്രസിഡന്റ് കെ. സുരേന്ദ്രന്‍.
മോദിയുടെ വികസനപദ്ധതികളില്‍ ഹിന്ദുവും മുസല്‍മാനും ക്രൈസ്തവനുമില്ലെന്നും എല്ലാവരുടെയു വികസനമാണ് ലക്ഷ്യമെന്നും സുരേന്ദ്രന്‍ പറഞ്ഞു. ഫേസ്ബുക്കിലൂടെയായിരുന്നു സുരേന്ദ്രന്റെ പ്രതികരണം.
‘ഉവൈസി വോട്ടൊന്നും ഭിന്നിപ്പിക്കാതെതന്നെ ഉത്തര്‍ പ്രദേശിലെ നിരവധി മുസ്‌ലിം ഭൂരിപക്ഷ മണ്ഡലങ്ങളില്‍ ഇത്തവണ ബി. ജെ. പിയാണ് വിജയിച്ചത്. ഇ.ടി.യും സമദാനിയും ചുമ്മാ കറങ്ങിത്തിരിച്ചു നടന്നതു മിച്ചം. മോദിയുടെ വികസനപദ്ധതികളില്‍ ഹിന്ദുവും മുസല്‍മാനും ക്രൈസ്തവനുമില്ല.
സബ് കാ സാഥ്, സബ് കാ വികാസ്, സബ് കാ വിശ്വാസ് എന്നത് മോദിക്കും ബി.ജെ.പിക്കും കേവലമൊരു പി.ആര്‍ ടാഗ് ലൈന്‍ അല്ല മറിച്ച് അതൊരു ആചരണമാണ്. ആത്മാര്‍ത്ഥമായൊരു ഉപാസനയാണെന്ന് ഓരോ തെരഞ്ഞെടുപ്പുകളും തെളിയിക്കുന്നു,’ സുരേന്ദ്രന്‍ പറഞ്ഞു.
അതേസമയം, ജാതിക്കും മതത്തിനും ഉപരിയായി ജനങ്ങള്‍ ചിന്തിച്ചുവെന്ന് കഴിഞ്ഞ ദിവസം പ്രധാനമന്ത്രി നരേന്ദ്ര മോദി കഴിഞ്ഞ ദിവസം പറഞ്ഞിരുന്നു.
