പാലക്കാട്: കേന്ദ്ര -സംസ്ഥാന ഭരണകൂടങ്ങളുടെ അഴിമതിയിലും കെടുകാര്യസ്ഥതയിലും ജനദ്രോഹ നയങ്ങളിലും പ്രതിഷേധിച്ച് വിവിധ പാര്‍ട്ടികളില്‍ നിന്നും കോണ്‍ഗ്രസിലേക്ക് പ്രവര്‍ത്തകരുടെ കുത്തൊഴുക്കാണെന്ന് കെ.പി.സി.സി പ്രസിഡന്റ് കെ. സുധാകരന്‍ എം.പി. നാടിന്റെ നന്മയ്ക്ക് കോണ്‍ഗ്രസിനൊപ്പം തന്നെ നില്‍ക്കണമെന്ന തിരിച്ചറിച്ച് കൂടുതല്‍ ജനങ്ങളിലുണ്ടാകുകയാണെന്നും അദ്ദേഹം പറഞ്ഞു.
പാലക്കാട് വിവിധ രാഷ്ട്രീയകക്ഷികളില്‍ നിന്ന് രാജിവെച്ച് കോണ്‍ഗ്രസിലേക്ക് വന്നവര്‍ക്കുള്ള സ്വീകരണന്റെ ചിത്രം ഫേസ്ബുക്കില്‍ പങ്കുവെച്ചായിരുന്നു സുധാകരന്റെ പ്രതികരണം.
‘പാലക്കാട് ജില്ലയില്‍ ശ്രീ. പി ബാലചന്ദ്രന്‍, ശ്രീ. ആര്‍ പങ്കജാക്ഷന്‍, ശ്രീ. കേശവദേവ് എന്നിവരുടെ നേതൃത്വത്തില്‍ സി.പി.ഐ.എം, ബി.ജെ.പി, ജനതാദള്‍ തുടങ്ങിയ വിവിധ പാര്‍ട്ടികളില്‍ നിന്നും ആയിരത്തിലേറെ പ്രവര്‍ത്തകര്‍ കോണ്‍ഗ്രസ് അംഗത്വം സ്വീകരിച്ചു. ജില്ലാ കോണ്‍ഗ്രസ് കമ്മിറ്റിയ്ക്ക് അഭിനന്ദനങ്ങള്‍,’ സുധാകരന്‍ ഫേസ്ബുക്കില്‍ എഴുതി.
ചന്ദ്രനഗര്‍ പാര്‍വതി കല്യാണ മണ്ഡപത്തിലായിരുന്നു കണ്‍വെന്‍ഷന്‍. ജനാധിപത്യമൂല്യങ്ങള്‍ എന്നും ഉയര്‍ത്തിപ്പിടിക്കുന്ന ഒരേയോരു രാഷ്ട്രീയ പ്രസ്ഥാനം ഇന്ത്യന്‍ നാഷണല്‍ കോണ്‍ഗ്രസ് മാത്രമാണെന്ന് ഉദ്ഘാടന പ്രസംഗത്തില്‍ കെ. സുധാകരന്‍ പറഞ്ഞു.
