കൊല്ലം: സിനിമ ജൂനിയര്‍ ആര്‍ട്ടിസ്റ്റിനെ എം.ഡി.എം.എയുമായി പിടികൂടി. സിനിമ- സീരിയല്‍ ജൂനിയര്‍ ആര്‍ട്ടിസ്റ്റ് നഷീബാണ് അറസ്റ്റിലായത്. കൊല്ലം അസിസ്റ്റന്റ് എക്‌സൈസ് കമ്മീഷണര്‍ക്ക് ലഭിച്ച രഹസ്യ വിവരത്തിന്റെ അടിസ്ഥാനത്തിലാണ് നഷീബിനെ പിടികൂടിയത്.
എക്‌സൈസ് സ്‌പെഷ്യല്‍ സ്‌ക്വാഡ് ഷാഡോ സംഘമാണ് 1.2 ഗ്രാം എം.ഡി.എം.എയും 20 ഗ്രാം കഞ്ചാവും ബൈക്കില്‍ കടത്താന്‍ ശ്രമിക്കുന്നതിനിടെ നഷീബിനെ പിടികൂടുന്നത്. ഓപ്പറേഷന്‍ സ്റ്റഫ് എന്ന പേരിലാണ് അന്വേഷണം നടത്തിയത്.
സിനിമ രംഗത്ത് നിന്നുള്ള പരിചയത്തിലാണ് നഷീബ് എം.ഡി.എം.എ ഉപയോഗിക്കാന്‍ തുടങ്ങിയത് എന്നാണ് എക്‌സൈസ് പറയുന്നത്. എറണാകുളത്തുള്ള ലഹരി മാഫിയകളില്‍ നിന്ന് വാങ്ങി കൊല്ലത്തുള്ള വിദ്യാര്‍ഥികള്‍ക്കും യുവാക്കള്‍ക്കും 0.5 ഗ്രാമിന് 2000 രൂപക്ക് വില്‍പന നടത്തിയിരുന്നുവെന്ന് പ്രതി പറഞ്ഞതായി എക്‌സൈസ് അറിയിച്ചു.
കേസിലെ ലഹരിമാഫിയയെ കുറിച്ച് വിശദമായ അന്വേഷണം നടത്താന്‍ തീരുമാനിച്ചതായി കൊല്ലം ഡെപ്യൂട്ടി എക്‌സൈസ് കമ്മീഷണര്‍ ബി.സുരേഷ് അറിയിച്ചിട്ടുണ്ട്. ഷാഡോ ടീം അംഗങ്ങള്‍ ആയ പ്രിവന്റീവ് ഓഫിസര്‍ എം.മനോജ് ലാല്‍, ബിനുലാല്‍, സിവില്‍ എക്‌സൈസ് ഓഫീസര്‍മാരായ ശ്രീനാഥ്, അജിത്ത്, നിഥിന്‍, ജൂലിയന്‍, വനിത സിവില്‍ എക്‌സൈസ് ഓഫീസര്‍ ശാലിനി എന്നിവരാണ് അന്വേഷണ അന്വേഷണ സംഘത്തില്‍ ഉണ്ടായിരുന്നത്.
Content Highlights: Junior artist arrested with drugs