ജൂനിയര്‍ എന്‍.ടി.ആര്‍, സെയ്ഫ് അലി ഖാന്‍, ജാന്‍വി കപൂര്‍ ചിത്രം ദേവരയുടെ ട്രെയ്ലര്‍ സെപ്റ്റംബര്‍ 22 ഞായറാഴ്ച പുറത്തിറങ്ങിയിരുന്നു. കൊരട്ടാല ശിവ സംവിധാനം ചെയ്ത ചിത്രം വെള്ളിയാഴ്ച (സെപ്റ്റംബര്‍ 27) തിയേറ്ററുകളിലെത്തും. ഹൈദരാബാദില്‍ നടക്കാനിരുന്ന ചിത്രത്തിന്റെ പ്രീ-റിലീസ് ഇവന്റിനായി ആരാധകര്‍ കാത്തിരിക്കുകയായിരുന്നു. എന്നാല്‍ നിരവധി ആരാധകരെ നിരാശരാക്കി ഞായറാഴ്ച പരിപാടി നിര്‍ത്തിവെച്ചന്ന വാര്‍ത്തയാണ് പുറത്ത് വന്നത്.
സുരക്ഷാ കാരണങ്ങള്‍ ചൂണ്ടികാട്ടിയും തിരക്ക് കാരണവുമാണ് ഹൈദരാബാദില്‍ നടക്കാനിരുന്ന ദേവരയുടെ പ്രീ-റിലീസ് ഇവന്റ് റദ്ദാക്കിയത്. പരിപാടിക്ക് മണിക്കൂറുകള്‍ മാത്രം ശേഷിക്കെയാണ് സംഘാടകര്‍ ഈ തീരുമാനമെടുത്തത്. തുടര്‍ന്ന് വേദിയില്‍ എത്തിയ നിരവധി ആരാധകരെ തിരിച്ചയച്ചതും സ്ഥിതി കൂടുതല്‍ വഷളാക്കി.
അവരില്‍ ചിലര്‍ നിര്‍മാതാക്കളുടെയും സംഘാടകരുടെയും മേല്‍ ശക്തമായി പ്രതികരിക്കാനും കുറ്റപ്പെടുത്താനും തുടങ്ങിയതോടെ ജൂനിയര്‍ എന്‍.ടി.ആര്‍ സോഷ്യല്‍ മീഡിയയിലൂടെ തന്റെ ദുഃഖം പ്രകടിപ്പിച്ചു. ഈ സാഹചര്യത്തില്‍ തനിക്കും നിരാശയുണ്ടെന്ന് തെലുങ്കില്‍ പറയുന്ന നടന്റെ വീഡിയോ ദേവരയുടെ സോഷ്യല്‍ മീഡിയ ഹാന്‍ഡില്‍ പോസ്റ്റ് ചെയ്തു.
‘ദേവരയുടെ പരിപാടി റദ്ദാക്കിയതില്‍ എനിക്ക് അതിയായ ദുഃഖമുണ്ട്, പ്രത്യേകിച്ചും ഞാന്‍ അത് വളരെയധികം പ്രതീക്ഷിച്ചിരുന്നതിനാല്‍. നിങ്ങളോടൊപ്പം സമയം ചെലവഴിക്കുന്നതും ദേവരയെക്കുറിച്ചുള്ള രസകരമായ നിരവധി കാര്യങ്ങള്‍ പങ്കിടുന്നതും വേണ്ടി ഞാന്‍ കാത്തിരിക്കുകയായിരുന്നു.
ദേവരയെ കുറിച്ചുള്ള പല വിവരങ്ങളും പങ്കുവെക്കാനും സിനിമയ്ക്കുവേണ്ടി നടത്തിയ പരിശ്രമങ്ങള്‍ വിശദീകരിക്കാനും ഞാന്‍ ആവേശത്തിലായിരുന്നു. എന്നാല്‍ സുരക്ഷാ കാരണങ്ങളാല്‍ പരിപാടി നടത്താനായില്ല. ഞാനും നിങ്ങളുടെ നിരാശയില്‍ പങ്ക് ചേരുന്നു. എന്റെ വേദന നിങ്ങളേക്കാള്‍ കൂടുതലാണ്. എന്റെ അഭിപ്രായത്തില്‍, പരിപാടി റദ്ദാക്കിയതിന് നിര്‍മാതാക്കളായോ സംഘാടകരെയോ കുറ്റപ്പെടുത്തുന്നത് തെറ്റാണ്,’ ജൂനിയര്‍ എന്‍.ടി.ആര്‍ പറയുന്നു.
എന്തുകൊണ്ടാണ് ഈ തീരുമാനം എടുക്കേണ്ടി വന്നതെന്ന് വിശദീകരിച്ച് ദേവാരയുടെ ടീം എക്സില്‍ പ്രസ്താവനയും പുറത്തിറക്കിയിരുന്നു.
‘വര്‍ഷങ്ങളായി ഞങ്ങള്‍ ഈ സിനിമയ്ക്കായി കഠിനാധ്വാനം ചെയ്തതിനാലും വലിയ തോതില്‍ ആഘോഷിക്കാന്‍ ആഗ്രഹിച്ചതിനാലും ഞങ്ങള്‍ ഈ ദിവസത്തിനായി ആകാംക്ഷയോടെ കാത്തിരിക്കുകയായിരുന്നു, പ്രത്യേകിച്ചും ഇത് ഞങ്ങളുടെ പ്രിയപ്പെട്ട മാന്‍ ഓഫ് മാസിന്റെ 6 വര്‍ഷത്തിന് ശേഷമുള്ള ആദ്യ സോളോ റിലീസായതിനാല്‍.
എന്നിരുന്നാലും, ഞങ്ങള്‍ നിരവധി വെല്ലുവിളികള്‍ നേരിട്ടു. ഗണേഷ് നിമര്‍ജനത്തിന് വളരെ അടുത്താണ് പ്രീ റിലീസ് ഇവന്റ് ഷെഡ്യൂള്‍ ചെയ്തിരുന്നത്, ഇതുപോലുള്ള വലിയ തോതിലുള്ള ഇവന്റുകള്‍ സാധാരണയായി ഒരാഴ്ചത്തെ തയ്യാറെടുപ്പ് ആവശ്യമാണ്. കൂടാതെ, കഴിഞ്ഞ കുറച്ച് ദിവസങ്ങളിലെ കനത്ത മഴയും നിരവധി വെല്ലുവിളികള്‍ സൃഷ്ടിച്ചു.
ബാരിക്കേഡുകള്‍ തകര്‍ന്നതിനാല്‍ ഞങ്ങള്‍ പരമാവധി ശ്രമിച്ചിട്ടും ആരാധകരുടെ വന്‍ തിരക്ക് നിയന്ത്രണാതീതമായി. എല്ലാവരുടെയും സുരക്ഷ കണക്കിലെടുത്ത്, പരിപാടി നിര്‍ത്തലാക്കാന്‍ ഞങ്ങള്‍ക്ക് ആ കടുത്ത തീരുമാനം എടുക്കേണ്ടി വന്നു. നിങ്ങളുടെ നായകനെ ആഘോഷിക്കാനും കാണാനും നിങ്ങളില്‍ പലരും രാജ്യത്തിന്റെ വിവിധ ഭാഗങ്ങളില്‍ നിന്ന് യാത്ര ചെയ്തിട്ടുണ്ടെന്ന് ഞങ്ങള്‍ മനസിലാക്കുന്നു. എല്ലാവരും സുരക്ഷിതരാണെന്നും സുരക്ഷിതമായി വീട്ടിലേക്ക് മടങ്ങിയെന്നും ഞങ്ങള്‍ പ്രതീക്ഷിക്കുന്നു. അസൗകര്യത്തില്‍ ഞങ്ങള്‍ അഗാധമായി ഖേദിക്കുന്നു. നിങ്ങളുടെ മനസിലാക്കുന്നതിനും പിന്തുണയ്ക്കും നന്ദി,’ ദേവര ടീം എക്സില്‍ കുറിച്ചു.
Content Highlight: Jr NTR reacts as Devara’s pre-release event in Hyderabad cancelled at the last minute
