നാഷണല്‍ അവാര്‍ഡ് നേടിയതിന്റെ എല്ലാ മെച്ചുരിറ്റിയും അല്ലുവില്‍ കാണാന്‍ സാധിച്ചു: ജിസ് ജോയ്

ഇന്ത്യന്‍ സിനിമാലോകം ഏറെ പ്രതീക്ഷയോടെ കാത്തിരിക്കുന്ന സിനിമകളിലൊന്നാണ് പുഷ്പ 2. അല്ലു അര്‍ജുനെ നായകനാക്കി സുകുമാര്‍ സംവിധാനം ചെയ്ത് 2021ല്‍ റിലീസായ പുഷ്പയുടെ തുടര്‍ച്ചയാണ് ചിത്രം പറയുന്നത്. ആദ്യ ഭാഗത്തെക്കാള്‍ ഇരട്ടി ബജറ്റില്‍ വലിയ രീതിയിലാണ് സുകുമാര്‍ പുഷ്പ 2 അണിയിച്ചൊരുക്കുന്നത്. തെലുങ്ക് പ്രേക്ഷകരെക്കാള്‍ ചിത്രത്തിനായി നോര്‍ത്ത് ഇന്ത്യന്‍ സിനിമാപ്രേമികള്‍ക്കാണ് കൂടുതല്‍ ആകാംക്ഷ. ആദ്യ ഭാഗം ഹിന്ദി ബെല്‍റ്റില്‍ നിന്ന് ലഭിച്ച സ്വീകാര്യത ചെറുതല്ലായിരുന്നു.

പുഷ്പ 2വിന്റെ ആദ്യപകുതി ഡബ്ബിങ് പൂര്‍ത്തിയായെന്ന് പറയുകയാണ് ജിസ് ജോയ്. ആര്യ മുതല്‍ക്കിങ്ങോട്ട് എല്ലാ ചിത്രങ്ങളിലും അല്ലുവിന് ശബ്ദം നല്‍കിയത് ജിസ് ജോയ്‌യാണ്. ആദ്യപകുതിയെക്കുറിച്ച് ജിസ് ജോയ് പറഞ്ഞ വാക്കുകളാണ് ഇപ്പോള്‍ സോഷ്യല്‍ മീഡിയയില്‍ വൈറല്‍. ആദ്യഭാഗത്തെക്കാള്‍ ഗംഭീരമായ സംഭവങ്ങള്‍ക്ക് പുഷ്പ 2 സാക്ഷ്യം വഹിക്കുമെന്ന് ജിസ് ജോയ് പറഞ്ഞു. അല്ലു അര്‍ജുന്‍ എന്ന നടന്‍ പ്രേക്ഷകരെ ഒന്നടങ്കം വിസ്മയിപ്പിക്കുമെന്നും ജിസ് ജോയ് കൂട്ടിച്ചേര്‍ത്തു.

ആദ്യ ഭാഗത്തിലെ പ്രകടനത്തിന് അദ്ദേഹത്തിന് ദേശീയ അവാര്‍ഡ് കിട്ടിയതിന്റെ എല്ലാ പോസിറ്റീവും രണ്ടാം ഭാഗത്തില്‍ കാണാനാകുമെന്ന് ജിസ് ജോയ് പറഞ്ഞു. നാഷണല്‍ അവാര്‍ഡ് കിട്ടിയതിന്റെ എല്ലാ മെച്ചുരിറ്റിയും അല്ലുവിന്റെ പെര്‍ഫോമന്‍സില്‍ കാണാന്‍ സാധിച്ചെന്നും അദ്ദേഹത്തോടൊപ്പം ഫഹദും ഗംഭീരമാക്കിയിട്ടുണ്ടെന്നും ജിസ് ജോയ് കൂട്ടിച്ചേര്‍ത്തു. സുകുമാര്‍ എന്ന സംവിധായകന്‍ ഓരോ സീനും ബ്രഹ്‌മാണ്ഡമാക്കിയാണ് എടുത്തിരിക്കുന്നതെന്നും ജിസ് ജോയ് പറഞ്ഞു.

‘പുഷ്പ 2വിന്റെ ഫസ്റ്റ് ഹാഫ് ഡബ്ബിങ് അവസാനിച്ചു. ആദ്യഭാഗത്തിനെക്കാള്‍ വേറെ ലെവലാണ് സെക്കന്‍ഡ് പാര്‍ട്ട് ഒരുക്കിയിരിക്കുന്നത്. അല്ലു അര്‍ജുന്റെ ഫാന്‍സിന് ആഘോഷിക്കാനുള്ള ഒരുപാട് വകകള്‍ ഫസ്റ്റ് ഫാഫില്‍ തന്നെ ഉണ്ട്. അല്ലുവിന്റെ പെര്‍ഫോമന്‍സ് അതിഗംഭീരമെന്നേ പറയാനുള്ളൂ. നാഷണല്‍ അവാര്‍ഡ് നേടിയ ഒരു നടന്റെ എല്ലാ മെച്ചുരിറ്റിയും അല്ലുവില്‍ കാണാന്‍ സാധിച്ചിട്ടുണ്ട്. അതുപോലെ നമ്മുടെ ഫഹദ് ഫാസിലും പുള്ളിയുടെ ക്യാരക്ടര്‍ വേറെ ലെവലില്‍ പ്രസന്റ് ചെയ്തിട്ടുണ്ട്.

പാട്ടുകളും ആക്ഷന്‍ സീക്വന്‍സുകളും അടിപൊളിയായിട്ട് സുകുമാര്‍ സാര്‍ വിഷ്വലൈസ് ചെയ്തിട്ടുണ്ട്. രശ്മികയും അവരുടെ ക്യാരക്ടര്‍ ഗംഭീരമാക്കിയിട്ടുണ്ട്. ട്രെയ്‌ലര്‍ അധികം വൈകാതെ റിലീസ് ചെയ്യും. ഇന്ത്യന്‍ സിനിമയിലെ വലിയ നമ്പേഴ്‌സ് പുഷ്പ ബ്രേക്ക് ചെയ്യുമെന്ന കാര്യത്തില്‍ സംശയമൊന്നും വേണ്ട,’ ജിസ് ജോയ് പറയുന്നു.

Content Highlight: Jis Joy shares the update of Pushpa 2