ജോജിക്ക് വീണ്ടും അന്താരാഷ്ട്ര അംഗീകാരം; വെഗാസ് മൂവി അവാര്‍ഡില്‍ മികച്ച നരേറ്റീവ് ഫീച്ചര്‍ സിനിമ വിഭാഗത്തില്‍ പുരസ്‌കാരം
എന്റര്‍ടെയിന്‍മെന്റ് ഡെസ്‌ക്
Thursday, 21st October 2021, 12:15 pm
മലയാളത്തിന്റെ സ്വന്തം ‘ജോജി’ക്ക് വീണ്ടും അന്താരാഷ്ട്ര അംഗീകാരം. വെഗാസ് മൂവി അവാര്‍ഡില്‍ മികച്ച നരേറ്റീവ് ഫീച്ചര്‍ സിനിമ വിഭാഗത്തിലാണ് പുരസ്‌കാരം ലഭിച്ചത്.
സിനിമയിലെ നായകനായ ഫഹദ് ഫാസിലാണ് ഇക്കാര്യം അറിയിച്ചത്. തന്റെ ഒഫീഷ്യല്‍ ഫേസ്ബുക്ക് അക്കൗണ്ടിലൂടെയാണ് പുരസ്‌കാരം ലഭിച്ച വാര്‍ത്ത താരം ആരാധകര്‍ക്കായി പങ്കുവെച്ചത്.
വെഗാസ് മൂവി അവാര്‍ഡ് 2021ല്‍ ഫീച്ചര്‍ വിഭാഗത്തില്‍ മികച്ച സിനിമക്കുള്ള അവാര്‍ഡ് ലഭിച്ചതില്‍ അഭിമാനിക്കുന്നുവെന്നാണ് ഫഹദ് ഫേസ്ബുക്ക് പോസ്റ്റില്‍ പറഞ്ഞത്. ഐ.എം.ഡി.ബിയുടെ അംഗീകാരമുള്ള അന്തര്‍ദേശീയ ചലച്ചിത്രമേളയാണ് വെഗാസ് മൂവി അവാര്‍ഡ്.
അതേസമയം, സ്വീഡന്‍ അന്താരാഷ്ട്ര ചലചിത്ര മേളയിലും(SIFF 2021) ഇന്റര്‍നാഷണല്‍ ഫീച്ചര്‍ ഫിലിം വിഭാഗത്തിലെ മികച്ച ചിത്രമായി ജോജി തെരഞ്ഞെടുക്കപ്പെട്ടിരുന്നു.
