മനഃപൂര്‍വമായ ആക്രമണം നേരിടുന്നത് ഇതാദ്യമായല്ല; നേര് സിനിമയുടെ തിരക്കഥ മോഷ്ടിച്ചതാണെന്ന ആരോപണങ്ങളില്‍ പ്രതികരിച്ച് ജീത്തു ജോസഫ്
എന്റര്‍ടെയിന്‍മെന്റ് ഡെസ്‌ക്
Wednesday, 20th December 2023, 8:01 pm
പല ഓണ്‍ലൈന്‍ ചാനലുകളും നേര് സിനിമയുടെ കഥയാണെന്ന് പറഞ്ഞ് ഒരു വ്യക്തിയുടെ കഥ ആളുകളിലേക്ക് എത്തിക്കുന്നത് കാണാന്‍ ഇടയായെന്നും ഇത്തരം ആരോപണങ്ങളില്‍ എത്രമാത്രം കഴമ്പുണ്ടെന്ന് പ്രേക്ഷകര്‍ സിനിമ കണ്ട് വിലയിരുത്തട്ടേയെന്നും സംവിധായകന്‍ ജീത്തു ജോസഫ്.
ജീത്തു ജോസഫ് – മോഹന്‍ലാല്‍ കൂട്ടുകെട്ടില്‍ ഒരുങ്ങുന്ന ഏറ്റവും പുതിയ ചിത്രമാണ് നേര്. ശാന്തി മായാദേവിയും ജീത്തു ജോസഫും ചേര്‍ന്നാണ് ചിത്രത്തിന്റെ കഥയും തിരക്കഥയും സംഭാഷണവും നിര്‍വഹിച്ചത്.
ഡിസംബര്‍ 21നാണ് നേര് തിയേറ്ററിലെത്തുന്നത്. എന്നാല്‍ കഴിഞ്ഞ ദിവസം ചിത്രത്തിന്റെ തിരക്കഥ മോഷ്ടിച്ചതാണെന്നും അതിന്റെ റിലീസ് സ്റ്റേ ചെയ്യണമെന്നും ആവശ്യപ്പെട്ട് ഒരാള്‍ ഹൈക്കോടതിയില്‍ ഹരജി നല്‍കിയിരുന്നു.
ഇപ്പോള്‍ ഇതിനെ കുറിച്ച് ഫേസ്ബുക്കിലെ സിനീഫൈല്‍ ഗ്രൂപ്പില്‍ കുറിപ്പിലൂടെ പ്രതികരിച്ചിരിക്കുകയാണ് ജീത്തു ജോസഫ്. മനഃപൂര്‍വമായ ആക്രമണം താന്‍ നേരിടുന്നത് ഇതാദ്യമായല്ലെന്നും തനിക്ക് വിശ്വാസം പ്രേക്ഷകരെയാണെന്നും അദ്ദേഹം പറഞ്ഞു.