ജയറാം, ഭാവന എന്നിവരെ പ്രധാന കഥാപാത്രങ്ങളാക്കി ദീപു കരുണാകരന്‍ സംവിധാനം ചെയ്ത സിനിമയായിരുന്നു വിന്റര്‍. 2009ല്‍ പുറത്തിറങ്ങിയ ഈ ചിത്രം തിയേറ്ററില്‍ ഒരു വിജയമായിരുന്നില്ല.
വിന്റര്‍ സിനിമയുടെ പരാജയത്തെകുറിച്ചും പറയുകയാണ് ഇപ്പോള്‍ ജയറാം. മകള്‍ എന്ന തന്റെ പുതിയ സിനിമയുടെ പ്രൊമോഷന്റെ ഭാഗമായി ജിഞ്ചര്‍ മീഡിയ എന്റര്‍ടെയിന്‍മെന്റ്സിന് നല്‍കിയ അഭിമുഖത്തില്‍ സംസാരിക്കുകയായിരുന്നു താരം.
സിനിമകള്‍ പരാജയപ്പെടുന്നതിന്റെ കാരണം ആര്‍ക്കും കണ്ടുപിടിക്കാന്‍ സാധിച്ചിട്ടില്ലെന്നാണ് ജയറാം പറയുന്നത്.
”ഒരു സിനിമ നമ്മള്‍ ചെയ്യുമ്പോള്‍ അത് നന്നാവും എന്ന് വിചാരിക്കും, പക്ഷെ അത് പരാജയപ്പെടും. അതിന് നമുക്ക് ഒരു ജഡ്ജ്മെന്റ് കിട്ടില്ല. അതെന്ത് കൊണ്ടാണ് എന്നത് ഇതുവരെ ആര്‍ക്കും പ്രവചിക്കാന്‍ പറ്റിയിട്ടില്ല എന്ന് എനിക്ക് തോന്നുന്നു. ഒരു അഭിനേതാവിനും, സംവിധായകര്‍ക്കും, ടെക്‌നീഷ്യന്‍സിനും അത് പ്രവചിക്കാന്‍ പറ്റിയിട്ടില്ല.
കാരണം ഇതൊരു മാന്ത്രിക വസ്തുവാണ്. ഈ സിനിമകളുടെ അവസാന റിസള്‍ട്ട് ഒരു പരിചയവുമില്ലാത്ത ആളുകളെയാണല്ലോ കാണിക്കുന്നത്. ആ സമയത്ത് മാത്രം നല്ലത് അല്ലെങ്കില്‍ മോശം എന്ന് തോന്നിക്കുന്ന എന്തോ ഒരു റിഫ്ളക്ഷന്‍ അതിലുണ്ട്. ഓഡിയന്‍സിനെക്കുറിച്ച് അത് നമുക്ക് നേരത്തെ കണ്ടുപിടിക്കാന്‍ പറ്റാത്തത് കൊണ്ടാണ് സിനിമ പരാജയപ്പെടുന്നത്.
എന്റെ വിന്റര്‍ എന്ന സിനിമ അത് പോലെയായിരുന്നു. ഇപ്പോള്‍ ആ സിനിമ ടെക്‌നിക്കലി നന്നായി മൂവ് ചെയ്യുന്നുണ്ട്. ഭയങ്കര ത്രില്ലിംഗ് വിഷയമായിരുന്നു ആ സിനിമയുടേത്. അത് എടുത്ത് വന്നപ്പോഴും നല്ലതായിരുന്നു.
പക്ഷെ, അതിന്റെ റിലീസൊന്നും അന്ന് കറക്ടായി വന്നില്ല. അങ്ങനെ പരാജയപ്പെട്ട് പോയതാണ്. ആ സിനിമ ഇന്ന്് വന്നിരുന്നെങ്കില്‍ കുറച്ചുകൂടി നന്നാവുമായിരുന്നു, എന്ന് എനിക്ക് തോന്നുന്നുണ്ട്,” ജയറാം പറഞ്ഞു.
ജയറാമിനെയും മീര ജാസ്മിനെയും പ്രധാന കഥാപാത്രങ്ങളായി സത്യന്‍ അന്തിക്കാട് സംവിധാനം ചെയ്ത ഏറ്റവും പുതിയ ചിത്രം മകള്‍ ഏപ്രില്‍ 29ന് റിലീസിനൊരുങ്ങിയിരിക്കുകയാണ്.
ഇക്ബാല്‍ കുറ്റിപ്പുറമാണ് ചിത്രത്തിന്റെ രചന. സെന്‍ട്രല്‍ പ്രൊഡക്ഷന്‍സാണ് ചിത്രം നിര്‍മിക്കുന്നത്. സംഗീതസംവിധാനം രാഹുല്‍ രാജാണ്. ഗാനങ്ങള്‍ക്ക് ഈണം പകര്‍ന്നിരിക്കുന്നത് വിഷ്ണു വിജയാണ്. ദേവിക സഞ്ജയ്, സിദ്ദിഖ്, ഇന്നസെന്റ്, കെ.പി.എ.സി ലളിത, ശ്രീനിവാസന്‍, നസ്‌ലന്‍ കെ. ഗഫൂര്‍ തുടങ്ങിയവരും ചിത്രത്തില്‍ പ്രധാന വേഷങ്ങളിലെത്തുന്നുണ്ട്.
Content Highlight: Jayaram talks about the theatre failure of his movie Winter during Makal promotion
