മലയാളികള്‍ക്ക് പ്രിയപ്പെട്ട നടനാണ് ജയറാം. പത്മരാജന്‍ മലയാളികള്‍ക്ക് സമ്മാനിച്ച നടന്മാരില്‍ ഒരാളാണ് അദ്ദേഹം. മലയാളത്തിന് പുറമെ തമിഴ്, തെലുങ്ക്, കന്നഡ ഭാഷകളില്‍ അദ്ദേഹം തന്റെ സാന്നിധ്യമറിയിച്ചിട്ടുണ്ട്.
മലയാളത്തിലെ ഏറ്റവും പ്രശസ്തമായ ഒരു പത്രം തന്നെ വിദ്യാരംഭത്തിന്റെ ദിവസം വിദ്യ കുറിക്കാന്‍ വേണ്ടി വിളിച്ചതിനെ കുറിച്ചും ഒടുവില്‍ അവര്‍ ഒഴിവാക്കിയതിനെ കുറിച്ചും പറയുകയാണ് ജയറാം.
‘മലയാളത്തിലെ ഏറ്റവും പ്രശസ്തമായ ഒരു പത്രം, എറണാകുളത്ത് വിദ്യാരംഭത്തിന്റെ ദിവസം വിദ്യ കുറിക്കാന്‍ വേണ്ടി എന്നെ വിളിക്കാറുണ്ടായിരുന്നു. രണ്ടോമൂന്നോ വര്‍ഷങ്ങളോളം എന്നെ വിളിച്ചിരുന്നു. പിന്നീട് കൂടെ ഇരിക്കുന്നവരൊക്കെ ജയറാം വരികയാണെങ്കില്‍ ഞങ്ങള്‍ വരില്ലെന്ന് പറഞ്ഞത് കൊണ്ട് എന്നെ ഒഴിവാക്കുകയായിരുന്നു.
ആ മൂന്ന് വര്‍ഷവും വിദ്യ കുറിച്ചു കൊടുക്കാന്‍ അവിടെ വന്നവരില്‍ ഞാന്‍ ഒഴികെ ബാക്കിയുള്ള എല്ലാവരും വലിയ വിദ്യഭ്യാസമുള്ളവര്‍ ആയിരുന്നു. ഐ.എ.എസും അതുപോലെയുള്ള വലിയവരുമാണ്. ഞാന്‍ ഉള്‍പ്പെടെ 11 ആളുകളായിരുന്നു ഉണ്ടാവാറ്. കൂട്ടത്തില്‍ ഞാനാണ് ഏറ്റവും വിദ്യാഭ്യാസം ഇല്ലാത്ത ആള്‍.
എല്ലാ തവണയും അവിടെ ആയിരത്തോളം കുട്ടികള്‍ വരുമായിരുന്നു. അതില്‍ എണ്ണൂറോളം കുട്ടികള്‍ എന്റെ അടുത്താണ് വരിക. ബാക്കി ഇരുന്നോറം ആളുകളാണ് അവരുടെ അടുത്തേക്ക് പോകുന്നത്.
എന്റെ മുന്നില്‍ വലിയ ക്യൂ നില്‍ക്കുമ്പോള്‍ അവര്‍ അവിടെ വെറുതെ സ്വയം അരിയില്‍ വരച്ചു കൊണ്ടിരിക്കുകയാകും. ആളില്ലാത്തത് കൊണ്ട് ഇരിക്കുന്നതാണ് അവര്‍. പിന്നെ രണ്ട് വര്‍ഷം കഴിഞ്ഞതും ‘ജയറാം ഉണ്ടെങ്കില്‍ ഞങ്ങള്‍ ഉണ്ടാവില്ല’ എന്ന് പറഞ്ഞു. അങ്ങനെ എന്നെ അതില്‍ നിന്നും ഒഴിവാക്കി.
അവിടെ വരുന്ന കുട്ടികളുടെ മാതാപിതാക്കളോട് ഞാന്‍ അപ്പോള്‍ ചോദിക്കുന്ന ഒരു ചോദ്യമുണ്ട്. ‘അപ്പുറത്ത് ഒരുപാട് നല്ല വിദ്യാഭ്യാസമുള്ള ആളുകളാണ് ഉള്ളത്. അവിടേക്ക് കൊണ്ടുപോയാല്‍ കുട്ടികള്‍ നന്നായി പഠിക്കില്ലേ’യെന്ന് ചോദിക്കും. ‘ഞങ്ങളുടെ മോന്‍ ജയറാം ആയാല്‍ മതി’ എന്നായിരുന്നു അതിനുള്ള മറുപടി,’ ജയറാം പറഞ്ഞു.
Content Highlight: Jayaram Talks About A Bad Experience That He Face