ഈ വര്‍ഷത്തെ ഐ.സി.സി പുരസ്‌കാരങ്ങള്‍ക്കുള്ള നോമിനേഷന്‍ അന്താരാഷ്ട്ര ക്രിക്കറ്റ് കൗണ്‍സില്‍ ഇതിനോടകം പുറത്തുവിട്ടിട്ടുണ്ട്. പുരുഷ-വനിതാ വിഭാഗങ്ങളിലായി ഒമ്പത് പുരസ്‌കാരങ്ങള്‍ക്കുള്ള ചുരുക്കപ്പട്ടികയാണ് ഐ.സി.സി പുറത്തുവിട്ടിരിക്കുന്നത്.
ക്രിക്കറ്റര്‍ ഓഫ് ദി ഇയര്‍, ടെസ്റ്റ് ക്രിക്കറ്റര്‍ ഓഫ് ദി ഇയര്‍, ഒ.ഡി.ഐ ക്രിക്കറ്റര്‍ ഓഫ് ദി ഇയര്‍, ടി-20ഐ ക്രിക്കറ്റര്‍ ഓഫ് ദി ഇയര്‍ എന്നീ പുരസ്‌കാരങ്ങളാണ് ഐ.സി.സി ഈ വര്‍ഷം മികച്ച പ്രകടനം പുറത്തെടുത്ത താരങ്ങള്‍ക്ക് നല്‍കുന്നത്. ഒപ്പം രണ്ട് വിഭാഗങ്ങളിലെയും എമേര്‍ജിങ് താരങ്ങള്‍ക്കും ഐ.സി.സി അംഗീകാരം നല്‍കുന്നുണ്ട്.
ഇന്ത്യന്‍ സൂപ്പര്‍ താരം ജസ്പ്രീത് ബുംറ രണ്ട് പുരസ്‌കാരങ്ങള്‍ക്കുള്ള ചുരുക്കപ്പട്ടികയിലാണ് ഇടം നേടിയിരിക്കുന്നത്. ഈ വര്‍ഷത്തെ ഏറ്റവും മികച്ച പുരുഷ ക്രിക്കറ്റര്‍ക്ക് സമ്മാനിക്കുന്ന ഐ.സി.സി മെന്‍സ് ക്രിക്കറ്റര്‍ ഓഫ് ദി ഇയറിനും ഏറ്റവും മികച്ച പുരുഷ ടെസ്റ്റ് താരത്തിന് നല്‍കുന്ന ഐ.സി.സി മെന്‍സ് ടെസ്റ്റ് ക്രിക്കറ്റര്‍ ഓഫ് ദി ഇയറിനും വേണ്ടിയാണ് ബുംറ മത്സരിക്കുന്നത്.
എന്നാല്‍ ഈ പോരാട്ടങ്ങള്‍ ഒട്ടും എളുപ്പമല്ല, കാരണം എതിരാളികള്‍ അത്ര കണ്ട് ശക്തരാണ് എന്നതുതന്നെയാണ് ഇതിന് കാരണവും.
ഈ വര്‍ഷം ടെസ്റ്റ് ഫോര്‍മാറ്റില്‍ ഏറ്റവുമധികം റണ്‍സ് നേടിയ താരവും നിലവിലെ ടെസ്റ്റ് ബാറ്റര്‍മാരിലെ ഒന്നാം റാങ്കുകാരനും ഫ്യൂച്ചര്‍ ലെജന്‍ഡും ഫാബ് ഫോറിലെ കരുത്തനുമായ ജോ റൂട്ടാണ് ഇതിലെ പ്രധാനി.
ഈ വര്‍ഷം കളിച്ച 31 ഇന്നിങ്സില് നിന്നും 1556 റണ്‍സാണ് റൂട്ട് സ്വന്തമാക്കിയത്. 55.57 എന്ന മികച്ച ശരാശരിയില്‍ ബാറ്റ് വീശിയ താരം ഈ വര്‍ഷം ആറ് സെഞ്ച്വറിയും അഞ്ച് അര്‍ധ സെഞ്ച്വറിയും അടിച്ചെടുത്തിട്ടുണ്ട്.
റൂട്ടിന്റെ ക്രൈം പാര്‍ട്ണും നിലവിലെ ഐ.സി.സി ടെസ്റ്റ് ബാറ്റര്‍മാരുടെ റാങ്കിലെ രണ്ടാമനുമായ ഹാരി ബ്രൂക്കാണ് നോമിനേഷന്‍ ലിസ്റ്റില്‍ ഇടം നേടിയ രണ്ടാമന്‍. 20 ഇന്നിങ്സില് നിന്നും 55.00 ശരാശരിയില്‍ രണ്ട് സെഞ്ച്വറിയും ആറ് അര്‍ധ സെഞ്ച്വറിയുമടക്കം 1100 റണ്‍സാണ് താരം സ്വന്തമാക്കിയത്. പാകിസ്ഥാന്‍ പര്യടനത്തില്‍ നേടിയ 317 റണ്‍സാണ് ഉയര്‍ന്ന സ്‌കോര്‍.
ഫോര്‍മാറ്റ് ഏതുതന്നെയായാലും രോഹിത് ശര്‍മയുടെ ടീമിനെതിരെ വെടിക്കെട്ട് പുറത്തെടുക്കുന്ന ഓസ്‌ട്രേലിയയുടെ മീശക്കാരന്‍ ട്രാവിസ് ഹെഡാണ് ഈ വര്‍ഷത്തെ മികച്ച താരമാകാന്‍ കച്ചമുറുക്കുന്നത്.
ഈ മൂന്ന് ബാറ്റര്‍മാര്‍ക്കും ഒരുപോലെ ചെക്ക് വെക്കാന്‍ പോന്ന ട്രാക്ക് റെക്കോഡുകളുമായാണ് ബുംറ ഈ വര്‍ഷം അവസാനിപ്പിച്ചത്.
ഓസ്‌ട്രേലിയക്കെതിരായ ബോക്‌സിങ് ഡേ ടെസ്റ്റിന്റെ രണ്ടാം ഇന്നിങ്സിലെ അഞ്ച് വിക്കറ്റ് നേട്ടത്തിന് പിന്നാലെ ബുംറ 2024 കലണ്ടര്‍ ഇയറില്‍ തന്റെ വിക്കറ്റ് നേട്ടം 71 ആയി ഉയര്‍ത്തുകയും ചെയ്തിരുന്നു. ഈ വര്‍ഷത്തെ ടെസ്റ്റ് വിക്കറ്റ് വേട്ടക്കാരില്‍ ഒന്നാമനായാണ് ബുംറ ചരിത്രമെഴുതിയത്. 26 ഇന്നിങ്സില് നിന്നും 14.92 ശരാശരിയില്‍ പന്തെറിയുന്ന ബുംറ നാല് തവണ നാല് വിക്കറ്റ് നേട്ടവും അഞ്ച് വിക്കറ്റ് നേട്ടം അഞ്ച് തവണയും സ്വന്തമാക്കി.
വിക്കറ്റ് വേട്ടയില്‍ രണ്ടാം സ്ഥാനത്തുള്ള ഇംഗ്ലണ്ട് സൂപ്പര്‍ താരം ഗസ് ആറ്റ്കിന്‍സണ്‍ 52 വിക്കറ്റ് മാത്രമാണ് നേടിയത് എന്ന മനസിലാക്കുമ്പോഴാണ് ബുംറയുടെ ഡോമിനേഷന്‍ എത്രത്തോളമാണെന്ന് വ്യക്തമാവുക.
ഈ വര്‍ഷം ഇന്ത്യയെ ടി-20 ലോകകപ്പ് കിരീടം ചൂടിക്കുന്നതില്‍ നിര്‍മായക പങ്കുവഹിച്ച താരം ടൂര്‍ണമെന്റിന്റെ താരമായും തെരഞ്ഞെടുക്കപ്പെട്ടിരുന്നു. ഈ നേട്ടങ്ങള്‍ ബുംറയ്ക്ക് ഐ.സി.സി പുരസ്‌കാര വേദിയിലും തുണയായേക്കും.
ഐ.സി.സി ടെസ്റ്റ് താരങ്ങളുടെ നോമിനേഷന്‍ ലിസ്റ്റിലും ബുംറയ്ക്ക് ഭീഷണിയുമായി റൂട്ടും ബ്രൂക്കുമുണ്ട്. ശ്രീലങ്കന്‍ സൂപ്പര്‍ താരം കാമിന്ദു മെന്‍ഡിസാണ് പുരസ്‌കാരത്തിനായി ഷോര്‍ട്ട് ലിസ്റ്റ് ചെയ്യപ്പെട്ട നാലാമത് താരം.
ഇന്ത്യയ്ക്കായി കളിക്കളത്തില്‍ തിളങ്ങുന്ന ബുംറയ്ക്ക് ഐ.സി.സി പുരസ്‌കാര വേദിയിലും തിളങ്ങാന്‍ സാധിക്കുമോ എന്നാണ് ആരാധകര്‍ ഉറ്റുനോക്കുന്നത്.
ഐ.സി.സി പുരസ്‌കാരങ്ങളും നോമിനേറ്റ് ചെയ്യപ്പെട്ട താരങ്ങളും,
ഐ.സി.സി മെന്‍സ് ക്രിക്കറ്റര്‍ ഓഫ് ദി ഇയര്‍/ സര്‍ ഗാരി സോബേഴ്‌സ് ട്രോഫി
ജോ റൂട്ട് (ഇംഗ്ലണ്ട്)
ഹാരി ബ്രൂക്ക് (ഇംഗ്ലണ്ട്)
ട്രാവിസ് ഹെഡ് (ഓസ്‌ട്രേലിയ)
ജസ്പ്രീത് ബുംറ (ഇന്ത്യ)
ഐ.സി.സി മെന്‍സ് ടെസ്റ്റ് ക്രിക്കറ്റര്‍ ഓഫ് ദി ഇയര്‍
ജോ റൂട്ട് (ഇംഗ്ലണ്ട്)
ഹാരി ബ്രൂക്ക് (ഇംഗ്ലണ്ട്)
ജസ്പ്രീത് ബുംറ (ഇന്ത്യ)
കാമിന്ദു മെന്‍ഡിസ് (ശ്രീലങ്ക)
ഐ.സി.സി മെന്‍സ് ഒ.ഡി.ഐ ക്രിക്കറ്റര്‍ ഓഫ് ദി ഇയര്‍
അസ്മത്തുള്ള ഒമര്‍സായ് (അഫ്ഗാനിസ്ഥാന്‍)
വാനിന്ദു ഹസരങ്ക (ശ്രീലങ്ക)
കുശാല്‍ മെന്‍ഡിസ് (ശ്രീലങ്ക)
ഷെര്‍ഫാന്‍ റൂഥര്‍ഫോര്‍ഡ് (വെസ്റ്റ് ഇന്‍ഡീസ്)
ഐ.സി.സി മെന്‍സ് ടി-20ഐ ക്രിക്കറ്റര്‍ ഓഫ് ദി ഇയര്‍
ട്രാവിസ് ഹെഡ് (ഓസ്‌ട്രേലിയ)
അര്‍ഷ്ദീപ് സിങ് (ഇന്ത്യ)
ബാബര്‍ അസം (പാകിസ്ഥാന്‍)
സിക്കന്ദര്‍ റാസ (സിംബാബ്‌വേ)
ഐ.സി.സി എമേര്‍ജിങ് മെന്‍സ് ക്രിക്കറ്റര്‍ ഓഫ് ദി ഇയര്‍
സയീം അയ്യൂബ് (പാകിസ്ഥാന്‍)
കാമിന്ദു മെന്‍ഡിസ് (ശ്രീലങ്ക)
ഷമര്‍ ജോസഫ് (വെസ്റ്റ് ഇന്‍ഡീസ്)
ഗസ് ആറ്റ്കിന്‍സണ്‍ (ഇംഗ്ലണ്ട്)
ഐ.സി.സി വിമെന്‍സ് ക്രിക്കറ്റര്‍ ഓഫ് ദി ഇയര്‍/ റേച്ചല്‍ ഹെയ്‌ഹോ ഫ്‌ളിന്റ് ട്രോഫി
ലോറ വോള്‍വാര്‍ഡ് (സൗത്ത് ആഫ്രിക്ക)
ചമാരി അത്തപ്പത്തു (ശ്രീലങ്ക)
അന്നബെല്‍ സതര്‍ലാന്‍ഡ് (ഓസ്‌ട്രേലിയ)
അമേലിയ കേര്‍ (ന്യൂസിലാന്‍ഡ്)
ഐ.സി.സി വിമെന്‍സ് ഒ.ഡി.ഐ ക്രിക്കറ്റര്‍ ഓഫ് ദി ഇയര്‍
ലോറ വോള്‍വാര്‍ഡ് (സൗത്ത് ആഫ്രിക്ക)
ചമാരി അത്തപ്പത്തു (ശ്രീലങ്ക)
അന്നബെല്‍ സതര്‍ലാന്‍ഡ് (ഓസ്‌ട്രേലിയ)
സ്മൃതി മന്ഥാന (ഇന്ത്യ)
ഐ.സി.സി വിമെന്‍സ് ടി-20ഐ ക്രിക്കറ്റര്‍ ഓഫ് ദി ഇയര്‍
ലോറ വോള്‍വാര്‍ഡ് (സൗത്ത് ആഫ്രിക്ക)
ചമാരി അത്തപ്പത്തു (ശ്രീലങ്ക)
ഓര്‍ല പ്രെന്‍ഡര്‍ഗസ്റ്റ് (അയര്‍ലന്‍ഡ്)
അമേലിയ കേര്‍ (ന്യൂസിലാന്‍ഡ്)
ഐ.സി.സി എമേര്‍ജിങ് വിമെന്‍സ് ക്രിക്കറ്റര്‍ ഓഫ് ദി ഇയര്‍
ശ്രേയാങ്ക പാട്ടീല്‍ (ഇന്ത്യ)
സസ്‌ക ഹോര്‍ലി (സ്‌കോട്‌ലാന്‍ഡ്)
അനെറി ഡെറക്‌സണ്‍ (സൗത്ത് ആഫ്രിക്ക)
ഫ്രെയ സാര്‍ജന്റ് (അയര്‍ലന്‍ഡ്)
Content Highlight: Jasprit Bumrah included in the nomination list of ICC Men’s Cricketer Of The Year and ICC Men’s Test Cricketer Of The Year 2024