ചണ്ഡീഗഢ്: ഒക്ടോബര്‍ എട്ടിന് ഹരിയാനയിലെ റെവാരി റെയില്‍വേ സ്റ്റേഷനിലും വിവിധ ക്ഷേത്രങ്ങളിലും സ്‌ഫോടനം നടത്തുമെന്ന ഭീഷണിയുമായി ഭീകരസംഘടനയായ ജെയ്‌ഷെ മുഹമ്മദ്. കറാച്ചിയില്‍ നിന്ന് മസൂദ് എന്നയാളുടെ പേരില്‍ അയച്ച ഭീഷണിക്കത്ത് ലഭിച്ചതായി പൊലീസ് സ്ഥിരീകരിച്ചു.
കത്തയച്ചിരിക്കുന്നത് ജെയ്‌ഷെ മുഹമ്മദ് തലവന്‍ മസൂദ് അസ്ഹറാണ് കത്തയച്ചിരിക്കുന്നതെന്നാണ് പൊലീസ് നിഗമനം. കഴിഞ്ഞദിവസം വീട്ടുതടങ്കലിലായിരുന്ന മസൂദിനെ പാക്കിസ്ഥാന്‍ മോചിപ്പിച്ചെന്ന റിപ്പോര്‍ട്ടുകള്‍ പുറത്തുവന്നിരുന്നു.
കത്ത് ലഭിച്ചതോടെ റെവാരി സ്റ്റേഷനില്‍ സുരക്ഷ വര്‍ധിപ്പിച്ചിട്ടുണ്ട്.
മസൂദ് അസ്ഹറിനെ മോചിപ്പിച്ചെന്ന റിപ്പോര്‍ട്ട് വന്നതിനെത്തുടര്‍ന്ന് ഇന്ത്യയില്‍ സുരക്ഷ ശക്തമാക്കിയിരുന്നു. പാക്കിസ്ഥാന്റെ പിന്തുണയോടെ രാജ്യത്തു ഭീകരാക്രമണങ്ങള്‍ക്കു സാധ്യതയുണ്ടെന്ന് രഹസ്യാന്വേഷണ ഏജന്‍സികളുടെ മുന്നറിയിപ്പ് വന്നതിനെത്തുടര്‍ന്നു കൂടിയാണിത്.
ജമ്മു കശ്മീരിന്റെ പ്രത്യേക പദവി എടുത്തുകളഞ്ഞ നീക്കത്തിനു മറുപടിയായി കഴിഞ്ഞ ദിവസങ്ങളില്‍ സിയാല്‍കോട്ട്-ജമ്മു കശ്മീര്‍ മേഖലയില്‍ വലിയ രീതിയില്‍ സൈനിക വിന്യാസവും മറ്റു പ്രവര്‍ത്തനങ്ങളും നടക്കുന്നുണ്ടെന്ന റിപ്പോര്‍ട്ടുകളും പുറത്തുവന്നിരുന്നു.
