ജയ് ഭീമിലെ രംഗം; നടന്‍ പ്രകാശ് രാജിനെതിരെ ട്വിറ്ററില്‍ പ്രതിഷേധവുമായി തീവ്രവലതുപക്ഷ സംഘങ്ങള്‍; പ്രൊപ്പഗാണ്ട നടപ്പാക്കുന്നെന്ന് ആരോപണം

മുംബൈ: നടന്‍ പ്രകാശ് രാജിനെതിരെ ട്വിറ്ററില്‍  തീവ്രവലതുപക്ഷ സംഘങ്ങളുടെ പ്രതിഷേധം. ജയ് ഭീം സിനിമയിലെ ഒരു സീന്‍ പങ്കുവെച്ചുകൊണ്ടാണ് അദ്ദേഹത്തിനെതിരെയുള്ള വിമര്‍ശനം.

സിനിമയെക്കുറിച്ച് മികച്ച അഭിപ്രായം ഉയര്‍ന്നുവരുന്നതിനിടെയാണ് പ്രകാശ് രാജിനെതിരെ ആരോപണങ്ങളുമായി   തീവ്രവലതുപക്ഷ സംഘങ്ങള്‍ രംഗത്തെത്തിയത്.

പൊലീസ് ഉദ്യോഗസ്ഥനായ പ്രകാശ് രാജിന്റെ കഥാപാത്രം തമിഴ് സംസാരിക്കാതെ ഹിന്ദി സംസാരിക്കുന്ന ആളെ അടിക്കുന്നതാണ് രംഗം. പ്രകാശ് രാജിന്റെ കഥാപാത്രം ഹിന്ദി സംസാരിച്ച കഥാപാത്രത്തോട് തമിഴ് സംസാരിക്കാനും ആവശ്യപ്പെടുന്നുണ്ട്.

ഈ രംഗം പങ്കുവെച്ചുകൊണ്ടാണ് പ്രകാശ് രാജിനെതിരെ തീവ്രവലതുപക്ഷ സംഘങ്ങള്‍ തിരിഞ്ഞിരിക്കുന്നത്. ഹിന്ദിക്കുമേല്‍ വിദ്വേഷം ജനിപ്പിക്കാനുള്ള ശ്രമമാണ് പ്രകാശ് രാജ് നടത്തുന്നതെന്നും ജയ് ഭീമിലൂടെ പ്രകാശ് രാജ് തന്റെ പ്രൊപ്പഗാണ്ട നടപ്പാക്കുകയാണെന്നുമൊക്കെയാണ് അദ്ദേഹത്തിനെതിരെ ഉയരുന്ന ആരോപണം.

എന്നാല്‍, കഥാപാത്രത്തിന്റെ പേരില്‍ പ്രകാശ് രാജിനെ വിമര്‍ശിക്കേണ്ടതുണ്ടോ എന്നും ഹിന്ദിക്കെതിരെയല്ല ആ ഡയലോഗ് മറിച്ച് ഹിന്ദി മനസ്സിലാവാത്ത ഓഫീസര്‍ തമിഴില്‍ സംസാരിക്കാന്‍ ആവശ്യപ്പെടുന്നതാണെന്നും ചിലര്‍ പറയുന്നു.

സൂര്യയെ നായകനാക്കി ടി.ജെ. ജ്ഞാനവേല്‍ സംവിധാനം ചെയ്ത ജയ് ഭീം നവംബര്‍ 2ന് ആമസോണ്‍ പ്രൈമിലാണ്  റിലീസ് ചെയ്തത്. തമിഴ്നാട്ടിലെ ഇരുള സമുദായത്തിലെ ജനങ്ങള്‍ അനുഭവിച്ച് പൊലീസ് ക്രൂരതയെ കുറിച്ചാണ് സിനിമ പറയുന്നത്. മദ്രാസ് ഹൈക്കോടതി ജഡ്ജിയായിരുന്നു ജസ്റ്റിസ് ചന്ദ്രുവിന്റെ ജീവിതത്തില്‍ നിന്നും പ്രചോദനം ഉള്‍ക്കൊണ്ടാണ് ജയ് ഭീം തയ്യാറാക്കിയിരിക്കുന്നത്. 1993ല്‍ അഭിഭാഷകനായിരിക്കെ ജസ്റ്റിസ് ചന്ദ്രു ഒരു ആദിവാസി സ്ത്രീക്ക് വേണ്ടി നടത്തിയ കേസിനെ ആസ്പദമാക്കിയാണ് ചിത്രത്തിന്റെ കഥ.

സര്‍ക്കാരിനെതിരെയുള്ള സിനിമയാണ് ജയ് ഭീം എന്ന തരത്തിലുള്ള ആരോപണങ്ങളും ഉയര്‍ന്നുവന്നിരുന്നു. എന്നാല്‍ സര്‍ക്കാരിനെതിരെയുള്ള സമരമല്ല ജയ് ഭീം എന്നാണ് സംവിധായകന്‍ ജ്ഞാനവേല്‍ പറഞ്ഞത്. സമൂഹത്തിലെ നിശ്ശബ്ദതയ്ക്കെതിരെയാണ് ഈ സിനിമ. അടിച്ചമര്‍ത്തപ്പെട്ടവരുടെ ശബ്ദമാണിത്. സമൂഹത്തില്‍ പലതരം ക്രൂരകൃത്യങ്ങള്‍ നടക്കുന്നുണ്ട്. എല്ലാം സിനിമ കണ്ടാല്‍ മനസിലാവുമെന്നും അദ്ദേഹം പറഞ്ഞിരുന്നു.

ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ 

ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും  ഫോളോ ചെയ്യാം

Content Highlights: Jai Bhim: Twitter Reacts to Prakash Raj Slapping a Man For ‘Speaking in Hindi’