മലയാളികള്‍ക്ക് ഏറെ പ്രിയപ്പെട്ട നടനാണ് ജഗദീഷ്. മൈ ഡിയര്‍ കുട്ടിച്ചാത്തന്‍ എന്ന ചിത്രത്തിലൂടെ തന്റെ സിനിമ കരിയര്‍ ആരംഭിച്ച നടന് നിരവധി സിനിമകളുടെ ഭാഗമായിട്ടുണ്ട്. തുടക്കത്തില്‍ ഹാസ്യ നടനായിരുന്ന ജഗദീഷ് ഇന്ന് വ്യത്യസ്ത കഥാപാത്രങ്ങളിലൂടെ ഞെട്ടിക്കുകയാണ്.
തന്റെയും സംവിധായകനും അഭിനേതാവുമായ ജോണി ആന്റണിയുടെയും വിജയത്തിന്റെ കാരണം പറയുകയാണ് ജഗദീഷ്. ഒരിക്കല്‍ ജോണി ആന്റണി തന്റെ അടുത്ത് വന്ന് ഇരുവരുടെയും വിജയത്തിന്റെ രഹസ്യം അറിയുമോയെന്ന് ചോദിച്ചെന്നും അതിന് കാരണം പേരിലുള്ള ‘ജെ’ എന്ന അക്ഷരമാണെന്ന് പറഞ്ഞെന്നും ജഗദീഷ് തമാശ രൂപത്തില്‍ പറഞ്ഞു.
വിജയ്, അജിത്, രജിനികാന്ത്, കെ.ജെ യേശുദാസ്, ജയചന്ദ്രന്‍ തുടങ്ങിയ കുറേ ആളുകളുടെ പേരുകള്‍ ഉദാഹരണമായി പറഞ്ഞെന്നും കേട്ടപ്പോള്‍ ശരിയായിരിക്കുമെന്ന് തനിക്കും തോന്നിയെന്ന് അദ്ദേഹം കൂട്ടിച്ചേര്‍ത്തു. വണ്‍ 2 ടോക്ക്‌സ് ഓണ്‍ലൈന് നല്‍കിയ അഭിമുഖത്തില്‍ സംസാരിക്കുകയായിരുന്നു ജഗദീഷ്.
‘ഒരു ദിവസം ജോണി എന്റെ അടുത്തുവന്ന് പറഞ്ഞു, ‘ജഗദീഷേട്ടാ നമ്മുടെ സക്‌സസ് എന്തുകൊണ്ടാണെന്ന് അറിയാമോ’, ഞാന്‍ പറഞ്ഞു എനിക്കറിയില്ല, എന്താ ജോണി എന്ന്. ‘നമ്മുടെ പേരില്‍ ജെ ഉണ്ട്. ഈ ജെ എന്ന അക്ഷരം പേരിലുള്ളവരൊക്കെ വിജയിക്കും’ എന്ന് ജോണി പറഞ്ഞു. എന്നിട്ട് പേരില്‍ ജെ വരുന്ന കുറേ അഭിനേതാക്കളുടെയും അല്ലാത്തവരുടെയും എല്ലാം പേരുകള്‍ എന്നോട് നിരത്തി പറഞ്ഞു.
ഞാന്‍ നോക്കുമ്പോള്‍ ശരിയാണ്. വിജയ്, അജിത്, രജിനികാന്ത്, ശിവാജി ഗണേശന്‍ അങ്ങനെ കുറേ ആളുകളുടെ പേരില്‍ ജെ ഉണ്ട്. കെ.ജെ യേശുദാസ്, ജയചന്ദ്രന്‍, അവരൊക്കെ പാട്ടില്‍ വിജയിച്ചു.
അമേരിക്കന്‍ പ്രസിഡന്റാണെങ്കില്‍ ഡൊണാള്‍ഡ് ട്രംപ്. അല്ല, ഡൊണാള്‍ഡ് ട്രംപില്‍ എവിടെയാ ജെ എന്ന് ഞാന്‍ ചോദിച്ചു. അദ്ദേഹത്തിന്റെ മുഴുവന്‍ പേര് ഡൊണാള്‍ഡ് ജോണ്‍ ട്രംപ് എന്നാണെന്ന് അവന്‍ പറഞ്ഞു. ആലോചിച്ചപ്പോള്‍ ശരിയാണല്ലോ അതുകൊണ്ടായിരിക്കും ഞാനെല്ലാം വിജയിച്ചതെന്ന് തോന്നുന്നു (ചിരി),’ ജഗദീഷ് പറയുന്നു.
Content Highlight: Jagdish Talks About The Reason Of His And Johny Antony’s Success