ലോകസിനിമയില്‍ തന്നെ പുതിയ ചരിത്രം സൃഷ്ടിച്ച് കൊണ്ടാണ് സി.ബി.ഐ അഞ്ചാം ഭാഗം പ്രഖ്യാപിക്കപ്പെട്ടത്. ഒരു സിനിമക്ക് ഒരേ നായകനും ഒരേ തിരക്കഥാകൃത്തും ഒരേ സംവിധായകനുമായി ലോകത്ത് മറ്റൊരിടത്തും തുടര്‍ ചിത്രങ്ങളുണ്ടായി കാണില്ല.
സി.ബി.ഐ ചിത്രത്തിലെ മമ്മൂട്ടി-മുകേഷ്-ജഗതി കോമ്പോ മലയാളത്തിലെ തന്നെ ഏറ്റവും മികച്ച കോമ്പോകളിലൊന്നായിരുന്നു. എന്നാല്‍ അഞ്ചാം ഭാഗം പ്രഖ്യാപിച്ചപ്പോള്‍ അതില്‍ ജഗതി ഉണ്ടാകുമോ എന്ന ആശങ്കയാണ് പ്രേക്ഷകരെല്ലാം ഒരുപോലെ ഉന്നയിച്ചത്.
പ്രേക്ഷകരുടെ ആശങ്കകള്‍ക്ക് ഉത്തരം നല്‍കിക്കൊണ്ടായിരുന്നു അഞ്ചാം ഭാഗത്തിലും ജഗതി ഉണ്ടാകുമെന്ന് അണിയറപ്രവര്‍ത്തകര്‍ അറിയിച്ചത്. ചിത്രത്തിലെ ജഗതിയുടെ ലുക്കും കഴിഞ്ഞ ദിവസം പുറത്ത് വന്നിരുന്നു. സി.ബി.ഐ. ദി ബ്രെയ്‌നിന്റെ പുതിയ പോസ്റ്റര്‍ പങ്കുവെച്ചിരിക്കുകയാണ് ജഗതി.
ഫേസ്ബുക്ക് അക്കൗണ്ടിലൂടെ പുറത്തുവിട്ട പോസ്റ്ററിന് നിരവധി പേരാണ് ആശംസകളുമായി കമന്റ് ബോക്‌സിലെത്തിയത്.
കഴിഞ്ഞ ഫെബ്രുവരി 27 നാണ് ജഗതി സി.ബി.ഐ ടീമിനൊപ്പം ജോയിന്‍ ചെയ്തത്. ശക്തമായ കഥാപാത്രത്തെയാവും ജഗതി അവതരിപ്പിക്കുക എന്ന് തിരക്കഥാകൃത്ത് എസ്.എന്‍ സ്വാമി പറഞ്ഞിരുന്നു.
2012 മാര്‍ച്ച് മാസം തേഞ്ഞിപ്പലത്ത് വച്ച് നടന്ന വാഹനാപകടത്തിലാണ് ജഗതിക്ക് ഗുരുതരമായ പരിക്ക് പറ്റുകയും അഭിനയരംഗത്ത് തുടരാന്‍ കഴിയാത്ത അവസ്ഥ വരികയും ചെയ്തത്. അപകടത്തിന് ശേഷം ഏഴു വര്‍ഷത്തോളം നീണ്ട ചികിത്സയ്ക്ക് ശേഷമാണ് ജഗതി ശ്രീകുമാര്‍ വീണ്ടും ജീവിതത്തിലേക്ക് മടങ്ങി വന്നത്.
Content Highlight: jagathy sreekumar shares the poster of cbi the brain