ഒരു ഹാസ്യ താരമായി സിനിമയിലെത്തി നിരവധി മികച്ച കഥാപാത്രങ്ങളിലൂടെ പ്രേക്ഷകരെ ചിരിപ്പിച്ചിട്ടുള്ള നടനാണ് ജഗദീഷ്. 1984ല്‍ പുറത്തിറങ്ങിയ മൈ ഡിയര്‍ കുട്ടിച്ചാത്തന്‍ എന്ന ചിത്രത്തിലൂടെയാണ് അദ്ദേഹം തന്റെ സിനിമാ കരിയര്‍ ആരംഭിക്കുന്നത്. പിന്നീട് നിരവധി മികച്ച സിനിമകളുടെ ഭാഗമാകാന്‍ അദ്ദേഹത്തിന് സാധിച്ചിട്ടുണ്ട്.

2022ല്‍ മമ്മൂട്ടിയെ നായകനാക്കി നിസാം ബഷീര്‍ സംവിധാനം ചെയ്ത റോഷാക്കിലും ജഗദീഷ് അഭിനയിച്ചിരുന്നു. മമ്മൂട്ടി കമ്പനിയുടെ കീഴില്‍ ഒരുങ്ങിയ ഈ സിനിമ വ്യത്യസ്തത കൊണ്ടും ക്വാളിറ്റി കൊണ്ടും മികച്ച് നിന്ന ചിത്രമായിരുന്നു. മമ്മൂട്ടിയുടെ പ്രകടനം കൊണ്ടും റോഷാക്ക് വലിയ രീതിയില്‍ ശ്രദ്ധിക്കപ്പെട്ടിരുന്നു.

മലയാള മനോരമ ദിനപത്രത്തിന് നല്‍കിയ അഭിമുഖത്തില്‍ താന്‍ റോഷാക്കില്‍ എത്തിയതിനെ കുറിച്ച് പറയുകയാണ് ജഗദീഷ്. 2016ല്‍ പുറത്തിറങ്ങിയ തന്റെ ലീല എന്ന സിനിമ കണ്ട് മമ്മൂട്ടി വിളിച്ചിരുന്നെന്നും പിന്നീട് അദ്ദേഹം നിര്‍മിച്ച റോഷാക്കില്‍ അതിനേക്കാള്‍ ഗംഭീരമെന്ന് പറയാവുന്ന ഒരു വേഷം തന്നെന്നുമാണ് നടന്‍ പറയുന്നത്.

അന്ന് റോഷാക്കിന്റെ സംവിധായകന്‍ നിസാം ബഷീറും എഴുത്തുകാരന്‍ സമീറും തന്നെ കാണാന്‍ വന്നപ്പോള്‍ ലീലയിലെ അഭിനയത്തെപ്പറ്റിയാണ് പറഞ്ഞതെന്നും ജഗദീഷ് പറഞ്ഞു. ആ വേഷം മികച്ചതാക്കാന്‍ പറ്റിയെന്നാണ് തന്റെ വിശ്വാസമെന്നും അതോടെ ഏതു വേഷവും ചെയ്യാമെന്ന ആത്മവിശ്വാസമായെന്നും ജഗദീഷ് കൂട്ടിച്ചേര്‍ത്തു.

‘ലീല സിനിമ കണ്ടിട്ട് മമ്മൂട്ടി വിളിച്ചിരുന്നു. എന്നെ വിളിച്ചെന്ന് മാത്രമല്ല, പിന്നീട് അദ്ദേഹം നിര്‍മിച്ച റോഷാക്ക് എന്ന സിനിമയില്‍ എനിക്ക് അതിനേക്കാള്‍ ഗംഭീരമെന്ന് പറയാവുന്ന ഒരു വേഷവും തന്നു. അന്ന് സംവിധായകന്‍ നിസാം ബഷീറും എഴുത്തുകാരന്‍ സമീറും കൂടി എന്നെ കാണാന്‍ വന്നപ്പോള്‍ ലീലയിലെ അഭിനയത്തെപ്പറ്റിയാണ് പറഞ്ഞത്.

എന്നില്‍നിന്ന് എന്ത് വേണമെന്ന് അവര്‍ക്ക് കൃത്യതയുണ്ടായിരുന്നു. എന്നെക്കൊണ്ട് പറ്റുന്നത് പോലെ ആ വേഷം മികച്ചതാക്കാന്‍ പറ്റിയെന്നാണ് എന്റെ വിശ്വാസം. റോഷാക്ക് തിയേറ്ററിലും നിറഞ്ഞോടിയിരുന്നു. അതോടെ, ഏതു വേഷവും ചെയ്യാമെന്ന ആത്മവിശ്വാസമായി,’ ജഗദീഷ് പറയുന്നു.

Content Highlight: Jagadish Talks About Mammootty And Rorschach Movie