ഹൈദരാബാദ്: ആന്ധ്ര മുഖ്യമന്ത്രിയായിരുന്ന വൈ.എസ്.ആര്‍ ആയി മെഗാസ്റ്റാര്‍ മമ്മൂട്ടി എത്തുന്ന ചിത്രം യാത്രയില്‍ കാര്‍ത്തി അഭിനയിക്കുന്നെന്ന് ഇന്നാണ് പ്രചരിച്ചത്. എന്നാല്‍ ഇത് തെറ്റാണെന്നാണ് കാര്‍ത്തിയുമായി അടുത്ത വൃത്തങ്ങള്‍ വ്യക്തമാക്കി.
വൈ.എസ്.ആറിന്റെ പുത്രന്‍ ജഗന്‍ റെഡ്ഡി യുടെ കഥാപാത്രമാണ് കാര്‍ത്തിയുടെതെന്നായിരുന്നു പുറത്ത് വന്ന വാര്‍ത്തകള്‍. നേരത്തെ ഈ വേഷം കാര്‍ത്തിയുടെ സഹോദരനും നടനുമായ സൂര്യ ചെയ്യുമെന്നായിരുന്നു പറഞ്ഞിരുന്നത്.
എന്നാല്‍ വാര്‍ത്ത അടിസ്ഥാനരഹിതമാണെന്നും അടുത്ത ഒരു മാസം വിദേശത്ത് “ദേവ്” എന്ന സിനിമയുടെ ചിത്രീകരണത്തിനായി കാര്‍ത്തി വിദേശത്തായിരിക്കുമെന്നുമാണ് കാര്‍ത്തിയുമായി അടുത്ത് വൃത്തങ്ങള്‍ അറിയിച്ചത്.
ചിത്രത്തിന്റെ ഷൂട്ടിംഗ് ഹൈദരാബാദില്‍ പുരോഗമിക്കുകയാണ്. ചിത്രത്തിന്റെ ആദ്യ ടീസര്‍ അടുത്തിടെ റിലീസായിരുന്നു. ചിത്രത്തില്‍ വൈ.എസ്. ആറിന്റെ അച്ഛന്‍ കഥാപാത്രത്തെ അവതരിപ്പിക്കുക ജഗപതി ബാബുവാണ്.
1999 മുതല്‍ 2004 വരെയുള്ള കാലഘട്ടത്തിലെ വൈ.എസ്.ആറിന്റെ ജീവിത കഥയാണ് യാത്ര എന്ന് പേരിട്ടിരിക്കുന്ന ബയോപിക്കിലൂടെ പറയുന്നത്. 2004ല്‍ കോണ്‍ഗ്രസിനെ അധികാരത്തിലെത്തിച്ച അദ്ദേഹം നയിച്ച പദയാത്ര സിനിമയിലെ ഒരു മുഖ്യഭാഗമാണ്.
ഇരുപത് വര്‍ഷങ്ങള്‍ക്ക് ശേഷമാണ് മമ്മൂട്ടി ഒരു തെലുങ്ക് ചിത്രത്തില്‍ അഭിനയിക്കുന്നത്. 1998 ല്‍ പുറത്തിറങ്ങിയ റെയില്‍വേ കൂലിയാണ് മമ്മൂട്ടി അവസാനമായി അഭിനയിച്ച തെലുങ്ക് ചിത്രം.