ബെംഗളൂരു: അയോഗ്യരാക്കപ്പെട്ട എം.എല്‍.എമാരെ സ്ഥാനാര്‍ത്ഥികളാക്കി ഉപതെരഞ്ഞെടുപ്പിനെ നേരിടുന്ന ബി.ജെ.പിയെ കാത്തിരിക്കുന്നത് പൂര്‍ണ പരാജയമാണെന്ന് കര്‍ണാടക പ്രദേശ് കമ്മിറ്റി അധ്യക്ഷന്‍ ദിനേഷ് ഗുണ്ടു റാവു.
ഇനി അഥവാ അവരില്‍ ചിലര്‍ ജയിച്ചാല്‍ പോലും കര്‍ണാടകയില്‍ ഭരണത്തിലിരിക്കാന്‍ ബി.ജെ.പിക്ക് ആവില്ലെന്നും സ്ഥിരതയുള്ള സര്‍ക്കാരിനെ നയിക്കാന്‍ അവര്‍ക്കാവില്ലെന്നും ദിനേഷ് ഗുണ്ടു റാവു പറഞ്ഞു. ഡെക്കാണ്‍ ഹെറാള്‍ഡിന് നല്‍കിയ അഭിമുഖത്തില്‍ സംസാരിക്കുകയായിരുന്നു അദ്ദേഹം.
ജനാധിപത്യവിരുദ്ധമായ മാര്‍ഗത്തിലൂടെ കോണ്‍ഗ്രസ് സര്‍ക്കാരിനെ അട്ടിമറിച്ചവരെ എന്തുവിലകൊടുത്തും പരാജയപ്പെടുത്തിയിരിക്കും. അയോഗ്യരാക്കപ്പെട്ട എം.എല്‍.എമാരെല്ലാം കോണ്‍ഗ്രസിന്റെ പ്രധാന നേതാക്കന്‍മാരായിരുന്നു. എല്ലാവര്‍ക്കും ടിക്കറ്റ് കൊടുത്തു. പദവിയും സ്ഥാനവും കൊടുത്തു. എന്നാല്‍ അവര്‍ പാര്‍ട്ടിയെ ചതിച്ചു. അതുകൊണ്ട് തന്നെ അവരെ ഒരു പാഠം പഠിപ്പിക്കേണ്ടതുണ്ട്.- റാവു പറഞ്ഞു.
വാര്‍ത്തകള്‍ ടെലഗ്രാമില്‍ ലഭിക്കാന്‍ ഇവിടെ ക്ലിക്ക് ചെയ്യൂ
ഇത് ഒരു അഭിമാന പ്രശ്‌നമായാണോ പാര്‍ട്ടി എടുത്തത് എന്ന ചോദ്യത്തിന് തീര്‍ച്ചയായും എന്നായിരുന്നു ദിനേഷ് ഗുണ്ടു റാവുവിന്റെ മറുപടി. അവരുടെ നടപടി ഞങ്ങളുടെയൊക്കെ ഹൃദയത്തിന് മുറിപ്പാടുണ്ടാക്കി. അവര്‍ പോയപ്പോള്‍ വളരെ മോശമായി എനിക്ക് തോന്നി. അവരുടെ വിഡ്ഡിത്തപരമായ ഒരു തീരുമാനമായിരുന്നു അത്. ബി.ജെ.പിയില്‍ അവര്‍ക്ക് എന്ത് സംഭവിക്കുമെന്ന് പോലും അറിയില്ല.
