ഇന്ത്യയുടെ പ്രഥമ സൗരദൗത്യത്തിന് തുടക്കമായി; ആദിത്യ എൽ-1 വിജയകരമായി വിക്ഷേപിച്ചു
ശ്രീഹരിക്കോട്ട: ഇന്ത്യയുടെ പ്രഥമ സൗരദൗത്യമായ ആദിത്യ എൽ-1 വിജയകരമായി വിക്ഷേപിച്ചു. ശ്രീഹരിക്കോട്ടയിലെ സതീഷ് ധവാൻ സ്പേസ് സെന്ററിലെ രണ്ടാം നമ്പർ ലോഞ്ച് പാഡിൽ നിന്ന് രാവിലെ 11.50നായിരുന്നു വിക്ഷേപണം. വിക്ഷേപണത്തിനുള്ള 23 മണിക്കൂർ 40 മിനുട്ട് കൗണ്ട് ഡൗൺ ഇന്നലെ ഉച്ചയ്ക്ക് 12.10ന് തുടങ്ങിയിരുന്നു.
ഇതോടെ ആഗോള തലത്തിൽ സൗരദൗത്യത്തിൽ ഏർപ്പെടുന്ന അഞ്ചാമത്തെ ബഹിരാകാശ ഏജൻസിയായി ഇസ്രോ മാറി. യൂറോപ്പ്, ജപ്പാൻ, ചൈന, യു.എസ് എന്നിവയുടെ ബഹിരാകാശ ഏജൻസികളാണ് മുമ്പ് സൗരദൗത്യം നടത്തിയിട്ടുള്ളത്. ചന്ദ്രന്റെ ദക്ഷിണ ധ്രുവത്തിലിറങ്ങുന്ന ആദ്യത്തെ ഉപഗ്രഹമെന്ന അഭിമാനനേട്ടം ചന്ദ്രയാൻ-3 കൈവരിച്ച് ദിവസങ്ങൾ മാത്രം പിന്നിടുമ്പോഴാണ് ഇന്ത്യ സൂര്യനിലേക്കുള്ള പേടകം വിജയകരമായി വിക്ഷേപിച്ചത്.
വിക്ഷേപിച്ച് കഴിഞ്ഞ് 64ാം മിനിറ്റിലാണ് പേടകം വിക്ഷേപണ വാഹനമായ പി.എസ്.എൽ.വി സി57ൽ നിന്ന് പൂർണമായി വേർപെട്ടത്. നിലവിൽ ഭൂമിയിൽ നിന്ന് 648 കി.മി അകലെയുള്ള ഭ്രമണപഥത്തിലാണ് പേടകമുള്ളത്. സൂര്യന്റേയും ഭൂമിയുടേയും ആകർഷണ വലയത്തിൽ പെടാത്ത ഹാലോ ഓർബിറ്റിലാണ് ഉപഗ്രഹം സഞ്ചരിക്കുക. ഭൂമിയോടടുത്ത ഭ്രമണ പഥത്തിൽ 16 ദിവസം തുടരുന്ന ഉപഗ്രഹത്തിന്റെ ഭ്രമണ പഥം അഞ്ച് തവണയായി ഉയർത്തുകയും ലക്ഷ്യസ്ഥാനത്തേക്കുള്ള സഞ്ചാര വേഗം കൈവരിക്കുകയും ചെയ്യും.
125 ദിവസത്തെ യാത്രക്ക് ശേഷം, ഭൂമിയിൽ നിന്ന് 15 ലക്ഷം കിമീ അകലെയുള്ള ലഗ്രാഞ്ച് പോയന്റ് 1 (എൽ 1) ലാണ് ഉപഗ്രഹത്തെ എത്തിക്കുക. സൂര്യനെ മികച്ച രീതിയിൽ കാണാൻ സാധിക്കുമെന്നതിനാൽ, എൽ-1 സൗര പ്രവർത്തനവും ബഹിരാകാശ കാലാവസ്ഥയും നിരീക്ഷിക്കുന്നതിനുള്ള ഏറ്റവും അനുയോജ്യമായ പോയിന്റാണ്. ദൗത്യ കാലാവധി അഞ്ച് വർഷവും രണ്ട് മാസവുമാണ്.
സൂര്യന്റെ പുറംഭാഗത്തെ താപവ്യതിയാനം, ബഹിരാകാശ കാലാവസ്ഥ ഉൾപ്പടെ സൂര്യനെ കുറിച്ചുള്ള വിശദ പഠനമാണ് ഐ.എസ്.ആർ.ഒ ലക്ഷ്യമിടുന്നത്. സൂര്യന്റെ റേഡിയേഷനും കാന്തിക വികിരണങ്ങളും ഭൂമിയെ ബാധിക്കുന്നതിന് മുമ്പ് അതിനെക്കുറിച്ച് മനസ്സിലാക്കാൻ ഈ ദൗത്യത്തിലൂടെ സാധിക്കുമെന്നാണ് പ്രതീക്ഷിക്കുന്നത്. സൂര്യന്റെ പുറംഭാഗത്തെ കുറിച്ചുള്ള പഠനത്തോടൊപ്പം അത് ഭൂമിയുടെ കാലാവസ്ഥയെ എങ്ങനെ ബാധിക്കുന്നു എന്നും പഠന വിധേയമാക്കും.
ഏഴ് പേലോഡുകളുള്ള ആദിത്യ എൽ-1ന് 1500 കിഗ്രാം ഭാരമുണ്ട്. ഭൂമിയുടെ സാങ്കേതിക വിദ്യയെയും ബഹിരാകാശ പരിസ്ഥിതിയെയും സ്വാധീനിക്കുന്ന സൗര രശ്മികൾ, കൊറോണൽ മാസ് ഇജക്ഷനുകൾ (സി.എം.ഇകൾ), മറ്റ് സൗര വ്യതിയാനങ്ങൾ എന്നിവയെ കുറിച്ചുള്ള മുന്നറിയിപ്പ് നൽകാൻ ആദിത്യ എൽ-1ന് സാധിക്കുമെന്നാണ് പ്രതീക്ഷിക്കുന്നത്.
Content Highlight: ISRO launched it’s first solar mission Aditya L-1 successfully
വിക്ഷേപിച്ച് കഴിഞ്ഞ് 64ാം മിനിറ്റിലാണ് പേടകം വിക്ഷേപണ വാഹനമായ പി.എസ്.എൽ.വി സി57ൽ നിന്ന് പൂർണമായി വേർപെട്ടത്. നിലവിൽ ഭൂമിയിൽ നിന്ന് 648 കി.മി അകലെയുള്ള ഭ്രമണപഥത്തിലാണ് പേടകമുള്ളത്. സൂര്യന്റേയും ഭൂമിയുടേയും ആകർഷണ വലയത്തിൽ പെടാത്ത ഹാലോ ഓർബിറ്റിലാണ് ഉപഗ്രഹം സഞ്ചരിക്കുക. ഭൂമിയോടടുത്ത ഭ്രമണ പഥത്തിൽ 16 ദിവസം തുടരുന്ന ഉപഗ്രഹത്തിന്റെ ഭ്രമണ പഥം അഞ്ച് തവണയായി ഉയർത്തുകയും ലക്ഷ്യസ്ഥാനത്തേക്കുള്ള സഞ്ചാര വേഗം കൈവരിക്കുകയും ചെയ്യും.
