ടെല്‍ അവിവ്: അധിനിവേശ വെസ്റ്റ് ബാങ്കില്‍ വൈദ്യുതി ബന്ധം വിഛേദിക്കുമെന്ന് ഇസ്രഈല്‍ സര്‍ക്കാരിന്റെ കീഴിലുള്ള വൈദ്യുതി കമ്പനി. 120 മില്യണ്‍ വരുന്ന വൈദ്യുതി ബില്‍ ഫലസ്തീന്‍ അതോറിറ്റി അടച്ചില്ലെങ്കില്‍ വൈദ്യുതി നല്‍കുന്നത് നിര്‍ത്തുമെന്നാണ് മുന്നറിയിപ്പ് നല്‍കിയത്.
വെസ്റ്റ് ബാങ്കിന്റെ സാമ്പത്തിക സ്ഥിതി വളരെ മോശമായിരിക്കുന്ന സാഹചര്യത്തിലാണ് ഭീഷണി സ്വരവുമായി ഇസ്രഈല്‍ എത്തിയത്.
ഫലസ്തീന്റെ സാമ്പത്തിക ശേഷി തകര്‍ന്നുകൊണ്ടിരിക്കുകയാണെന്ന് ഐക്യരാഷ്ട്ര സഭയിലെ ഉദ്യോഗസ്ഥന്‍ ഇക്കഴിഞ്ഞ ഒക്ടോബര്‍ 20ന് മുന്നറിയിപ്പ് നല്‍കിയിരുന്നു. ഇത് മുഖവിലയ്‌ക്കെടുക്കാതെയാണ് ഇസ്രഈല്‍ വൈദ്യുതി ബന്ധം വിഛേദിക്കുന്നതടക്കമുള്ള നടപടികളുമായി മുന്നോട്ട് പോകുന്നത്.
വിദേശത്ത് നിന്നുള്ള ഫണ്ടുകളുടെ സഹായത്തോടെയാണ് ഫലസ്തീന്റെ സാമ്പത്തിക രംഗം മുന്നോട്ട് പോകുന്നത്. എന്നാല്‍ കൊവിഡ് മഹാമാരിയും ഇസ്രഇലിന്റെ വര്‍ധിച്ച് വരുന്ന അധിനിവേശവും ആക്രമണങ്ങളും കൂടിയായപ്പോള്‍ ഇവരുടെ സാമ്പത്തിക സ്ഥിതി നശിക്കുകയായിരുന്നു.
കഴിഞ്ഞ വര്‍ഷം ഫലസ്തീന്റെ സാമ്പത്തിക വളര്‍ച്ചയില്‍ 11.5 ശതമാനത്തിന്റെ ഇടിവുണ്ടായെന്ന് ലോകബാങ്ക് ഇക്കഴിഞ്ഞ ഏപ്രിലില്‍ വ്യക്തമാക്കിയിരുന്നു.
ഇതിനിടെ അധിനിവേശ വെസ്റ്റ് ബാങ്കില്‍ ജൂതര്‍ക്ക് വേണ്ടി കൂടുതല്‍ പാര്‍പ്പിടങ്ങള്‍ സ്ഥാപിക്കാനുള്ള പദ്ധതിയുമായും ഇസ്രഈല്‍ മുന്നോട്ട് പോകുന്നുണ്ട്.
3144 കുടിയേറ്റ വീടുകള്‍ വെസ്റ്റ് ബാങ്കില്‍ നിര്‍മിക്കാനുള്ള പദ്ധതിക്കായിരുന്നു ഇസ്രഈല്‍ കണ്‍സ്ട്രക്ഷന്‍ ആന്‍ഡ് ഹൗസിങ് മന്ത്രാലയം അനുമതി നല്‍കിയത്. ഇതില്‍ ഇതില്‍ 1300ലധികം വീടുകള്‍ ഉടന്‍ നിര്‍മിക്കുന്നതിന് ടെന്‍ഡര്‍ ക്ഷണിച്ചിട്ടുണ്ടെന്നും മന്ത്രാലയം അറിയിച്ചിരുന്നു.
മൂന്ന് വര്‍ഷത്തിനിടെ ഇസ്രഈലില്‍ നഫ്താലി ബെന്നറ്റിന്റെ നേതൃത്വത്തിലുള്ള സര്‍ക്കാര്‍ ആദ്യ ബജറ്റ് പാസാക്കിയതോടെ ഇതിന്റെ നടപടികള്‍ കൂടുതല്‍ വേഗത്തിലാവാനുള്ള സാധ്യത വര്‍ധിച്ചിരിക്കുകയാണ്.
ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ
ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം
Content Highlight: Israel threatens to cut power supply in occupied West Bank