സെന്റ് പിറ്റേഴ്‌സ്ബര്‍ഗ്: ഗ്രൂപ്പ് ബി യിലെ ലോകകപ്പ് പോരാട്ടത്തില്‍ ഇറാനെതിരെ മൊറോക്കോയ്ക്കു തോല്‍വി. നിരന്തരം ഇറാന് ഗോള്‍മുഖത്ത് ഭീതി ജനിപ്പിച്ച മൊറോക്കോയ്ക്ക് നിരവധി ഗോളവസരങ്ങള്‍ ലഭിച്ചെങ്കിലും ലക്ഷ്യത്തിലെത്തിക്കാനായില്ല.
അവസാനനിമിഷം വരെ ഗോള്‍ വഴങ്ങാതെ പിടിച്ചുനിന്ന ഇറാന് മോറോക്കോ താരം അസിസ് ബൗഹാഡോസിന്റെ പിഴവാണ് വിജയം സമ്മാനിച്ചത്. ഇഞ്ചുറിടൈമിലെ അഞ്ചാംമിനിറ്റിലാണ് അസീസിന്റെ സെല്‍ഫ് ഗോള്‍.
കളിയിലുടനീളം ഇറാനേക്കാള്‍ മികച്ചുനിന്ന മൊറോക്കോയ്ക്ക് നിരാശ നല്‍കുന്നതായി മത്സരഫലം.
മൊറാക്കോയുടെ മുന്നേറ്റത്തോടെയാണ് കളി തുടങ്ങിയത്. ആദ്യ അഞ്ച് മിനിറ്റിനുള്ളില്‍ തന്നെ കോര്‍ണറുകള്‍ ലഭിച്ചെങ്കിലും ഗോളാക്കിമാറ്റാന്‍ മൊറാക്കോ താരങ്ങള്‍ക്കായില്ല. ആദ്യ പകുതി അവസാനിക്കാന്‍ മിനിട്ടുകള്‍ മാത്രം ശേഷിക്കെ മൊറാക്കോ ഗോള്‍മുഖത്ത് ഇറാന് പ്രത്യാക്രമണം നടത്തിയെങ്കിലും വലകുലുക്കാനായില്ല.
രണ്ടാം പകുതിയിലും ഗോള്‍ശ്രമങ്ങളുമായി മോറോക്കോ നിറഞ്ഞുകളിച്ചെങ്കിലും ഗോള്‍മാത്രം വിട്ടുനിന്നു.