ഇന്ത്യന്‍ പ്രീമിയര്‍ ലീഗിന്റെ 17ാം സീസണിനാണ് മാര്‍ച്ച് 22ന് തുടക്കമാകുന്നത്. റെയ്‌നിങ് ചാമ്പ്യന്‍മാരായ ചെന്നൈ സൂപ്പര്‍ കിങ്‌സ് റോയല്‍ ചലഞ്ചേഴ്‌സ് ബെംഗളൂരുവിനെ നേരിടുന്നതോടെയാണ് പുതിയ സീസണിന്റെ ആവേശത്തിന് തുടക്കമാകുന്നത്.
വിരാട് കോഹ്‌ലിയെ ടി-20 ലോകകപ്പ് സ്‌ക്വാഡില്‍ നിന്നും ഒഴിവാക്കിയേക്കുമെന്ന അഭ്യൂഹങ്ങള്‍ക്കിടെയാണ് താരം റോയല്‍ ചലഞ്ചേഴ്‌സിനൊപ്പം ഐ.പി.എല്ലില്‍ തകര്‍ത്തടിക്കാന്‍ ഇറങ്ങുന്നത്.
മാര്‍ച്ച് 22ന് ചെപ്പോക്കിലേക്കിറങ്ങുന്ന വിരാടിനെ ഒരു തകര്‍പ്പന്‍ നേട്ടമാണ് കാത്തിരിക്കുന്നത്. ടി-20യില്‍ 12,000 റണ്‍സ് എന്ന നാഴികക്കല്ലാണ് വിരാടിന് മുമ്പില്‍ തലയയുര്‍ത്തി നില്‍ക്കുന്നത്. വെറും ആറ് റണ്‍സ് കൂടി കണ്ടെത്താന്‍ സാധിച്ചാല്‍ ഈ ഐതിഹാസിക നേട്ടത്തില്‍ വിരാടിന്റെ പേരും എഴുതിവെക്കപ്പെടും.
ഈ നേട്ടം സ്വന്തമാക്കുന്ന ആറാമത് മാത്രം താരമെന്ന നേട്ടവും ആദ്യ ഇന്ത്യന്‍ താരം എന്ന റെക്കോഡും ഇതിനൊപ്പം വിരാടിന് തന്റെ പേരിന് നേരെ കുറിക്കാന്‍ സാധിക്കും.
2007ലാണ് വിരാട് തന്റെ ടി-20 കരിയര്‍ ആരംഭിച്ചത്. അന്നു മുതല്‍ ഇന്ന് വരെ 359 ഇന്നിങ്‌സില്‍ നിന്നും 11,994 റണ്‍സാണ് കുട്ടി ക്രിക്കറ്റില്‍ വിരാട് തന്റെ പേരില്‍ കുറിച്ചത്.
41.21 എന്ന ആവറേജിലും 133.42 എന്ന പ്രഹരശേഷിയിലുമാണ് വിരാട് റണ്‍സടിച്ചുകൂട്ടുന്നത് ഏഷ്യാ കപ്പില്‍ അഫ്ഗനെതിരെ 122* ആണ് മികച്ച സ്‌കോര്‍.
ടി-20 ഫോര്‍മാറ്റില്‍ എട്ട് സെഞ്ച്വറി പൂര്‍ത്തിയാക്കിയ വിരാട് 91 അര്‍ധ സെഞ്ച്വറിയും തന്റെ പേരില്‍ കുറിച്ചിട്ടുണ്ട്. 1074 ബൗണ്ടറികളും 371 സിക്‌സറുകളുമാണ് ടി-20യില്‍ വിരാടിന്റെ സമ്പാദ്യം.
ടി-20 ഫോര്‍മാറ്റില്‍ ഏറ്റവുമധികം റണ്‍സ് നേടുന്ന താരങ്ങള്‍
(താരം – റണ്‍സ് എന്നീ ക്രമത്തില്‍)
ക്രിസ് ഗെയ്ല്‍ – 14,562
ഷോയ്ബ് മാലിക് – 13,010
കെയ്‌റോണ്‍ പൊള്ളാര്‍ഡ് – 12,454
അലക്‌സ് ഹെയ്ല്‍സ് – 12,277
ഡേവിഡ് വാര്‍ണര്‍ – 12,065
വിരാട് കോഹ്‌ലി – 11,994
ആരോണ്‍ ഫിഞ്ച് – 11,454
രോഹിത് ശര്‍മ – 11,156
ടി-20 ഫോര്‍മാറ്റില്‍ ഇന്ത്യന്‍ ദേശീയ ടീമിനും റോയല്‍ ചലഞ്ചേഴ്‌സ് ബെംഗളൂരുവിനും ആഭ്യന്തര തലത്തില്‍ ദല്‍ഹിക്കുമടക്കം നാല് ടീമുകള്‍ക്ക് വേണ്ടി മാത്രമാണ് വിരാട് ബാറ്റേന്തിയിട്ടുള്ളത്.
അതേസമയം, ടി-20യില്‍ ഏറ്റവുമധികം റണ്‍സ് നേടിയ കരീബിയന്‍ സൂപ്പര്‍ താരം ക്രിസ് ഗെയ്ല്‍ ഐ.പി.എല്ലും സി.പി.എല്ലും, ബി.പി.എല്ലും ബി.ബി.എല്ലും അടക്കം വിവിധ ഫ്രാഞ്ചൈസി ലീഗുകളിലായി 32 ടീമുകള്‍ക്കായും രണ്ടാം സ്ഥാനത്തുള്ള ഷോയ്ബ് മാലിക് 28 ടീമുകള്‍ക്ക് വേണ്ടിയും കളത്തിലിറങ്ങിയിട്ടുണ്ട് എന്ന് വ്യക്തമാകുമ്പോഴാണ് വിരാടിന്റെ ഈ നേട്ടത്തിന് പ്രസക്തിയേറുന്നത്.
ഒരുപക്ഷേ മറ്റ് ടി-20 ലീഗുകളിലും കളിച്ചിരുന്നെങ്കില്‍ ഈ നേട്ടം മുമ്പ് തന്നെ ഇന്ത്യന്‍ ലെജന്‍ഡിന്റെ പേരില്‍ കുറിക്കപ്പെടുമായിരുന്നു.
ഇതിന് പുറമെ മറ്റൊരു തകര്‍പ്പന്‍ നേട്ടവും മുന്‍ ഇന്ത്യന്‍ നായകനെ തേടിയെത്തും ടി-20 ഫോര്‍മാറ്റില്‍ 12,000 റണ്‍സും അന്താരാഷ്ട്ര ടി-20യില്‍ 4,000 റണ്‍സും നേടുന്ന ആദ്യ താരം എന്ന ചരിത്ര റെക്കോഡാണ് ആര്‍.സി.ബി ഇതിഹാസത്തിന്റെ പേരില്‍ കുറിക്കപ്പെടുക.
Content highlight: IPL, Virat Kohli need 6 runs to complete 12,000 T20 runs