മുംബൈ: ഐ.പി.എല്‍ പന്ത്രണ്ടാം പതിപ്പിന്റെ തിയതി പ്രഖ്യാപിച്ചു. 2019 മാര്‍ച്ച് 29 നായിരിക്കും ഐ.പി.എല്‍ ആരംഭിക്കുക. അടുത്ത വര്‍ഷം ഏകദിന ലോകകപ്പ് ഉള്ളതിനാല്‍ നേരത്തെയാകും സീസണ്‍ തുടങ്ങുക.
കളിക്കാര്‍ക്ക് മതിയായ വിശ്രമം വേണമെന്നതിനാലാണ് ഐ.പി.എല്‍ തിയതി നേരത്തെയാക്കിയത്. സാധാരണഗതിയില്‍ ഏപ്രില്‍ ആദ്യത്തെയോ രണ്ടാമത്തേയോ ആഴ്ചകളിലാണ് ഐ.പി.എല്‍ ആരംഭിക്കുന്നത്.
അതേസമയം അടുത്തവര്‍ഷത്തെ ഐ.പി.എല്‍ ഇന്ത്യയ്ക്ക് പുറത്തായിരിക്കും നടക്കുക എന്നും റിപ്പോര്‍ട്ടുണ്ട്. അടുത്ത വര്‍ഷം ഇന്ത്യയില്‍ പൊതുതെരഞ്ഞെടുപ്പ് നടക്കുന്നതിനാലാണിത്. നേരത്തെ 2009 ലും 2014 ലും യഥാക്രമം ദക്ഷിണാഫ്രിക്കയിലും യു.എ.ഇയിലും മത്സരം നടന്നിരുന്നു.
ഈ സീസണില്‍ ആവേശകരമായ കലാശപ്പോരാട്ടത്തില്‍ 8 വിക്കറ്റിന്റെ തകര്‍പ്പന്‍ ജയമാണ് ചെന്നൈ നേടിയത്. ഷെയിന്‍ വാട്‌സണ്‍ പുറത്താകാതെ നേടിയ 117 റണ്‍സിന്റെ ബലത്തിലാണ് ചെന്നൈ ഹൈദരാബാദ് നല്‍കിയ 179 റണ്‍സ് വിജയലക്ഷ്യം മറികടന്നത്. ചെന്നൈ സൂപ്പര്‍ കിംഗ്‌സിന്റെ മൂന്നാം ഐ.പി.എല്‍ കിരീടമാണ് ഈ സീസണില്‍ സ്വന്തമാക്കിയത്.