ഐ.പി.എല്ലില്‍ കഴിഞ്ഞ ദിവസം നടന്ന മത്സരത്തില്‍ റോയല്‍ ചലഞ്ചേഴ്‌സ് ബെംഗളൂരുവിനെതിരെ പരാജയപ്പെടുത്തി ദല്‍ഹി ക്യാപ്പിറ്റല്‍സ് സീസണിലെ നാലാം വിജയം സ്വന്തമാക്കിയിരുന്നു. റോയല്‍ ചലഞ്ചേഴ്‌സിന്റെ ഹോം ഗ്രൗണ്ടായ ചിന്നസ്വാമി സ്റ്റേഡിയത്തില്‍ നടന്ന മത്സരത്തില്‍ ആറ് വിക്കറ്റിനാണ് ക്യാപ്പിറ്റല്‍സ് ജയിച്ചുകയറിയത്.
സീസണില്‍ ഒറ്റ മത്സരം പോലും തോല്‍ക്കാതെയാണ് ദല്‍ഹി തങ്ങളുടെ കുതിപ്പ് തുടരുന്നത്.
Vizag ✅
Chennai ✅
Bengaluru ✅Chalo ghar chalein 💙❤️ pic.twitter.com/nhGhsimWpn
— Delhi Capitals (@DelhiCapitals) April 10, 2025
റോയല്‍ ചലഞ്ചേഴ്‌സ് ഉയര്‍ത്തിയ 164 റണ്‍സിന്റെ വിജയലക്ഷ്യം പിന്തുടര്‍ന്നിറങ്ങിയ ക്യാപ്പിറ്റല്‍സ് 13 പന്ത് ബാക്കി നില്‍ക്കെ നാല് വിക്കറ്റ് മാത്രം നഷ്ടപ്പെടുത്തി വിജയം പിടിച്ചടക്കുകയായിരുന്നു.
ഈ പരാജയത്തിന് പിന്നാലെ ഒരു മോശം റെക്കോഡും ബെംഗളൂരുവിനെ തേടിയെത്തി. ഐ.പി.എല്‍ ചരിത്രത്തില്‍ ഒരു ഗ്രൗണ്ടില്‍ ഏറ്റവുമധികം മത്സരങ്ങള്‍ പരാജയപ്പെടുന്ന ടീം എന്ന അനാവശ്യ നേട്ടമാണ് ബെംഗളൂരുവിന്റെ പേരില്‍ കുറിക്കപ്പെട്ടത്. ചിന്നസ്വാമിയില്‍ ഇത് 45ാം തവണയാണ് റോയല്‍ ചലഞ്ചേഴ്‌സ് പരാജയപ്പെടുന്നത്.
(ടീം – എത്ര മത്സരങ്ങളില്‍ പരാജയപ്പെട്ടു – വേദി എന്നീ ക്രമത്തില്‍)
റോയല്‍ ചലഞ്ചേഴ്‌സ് ബെംഗളൂരു – 45 – ചിന്നസ്വാമി സ്റ്റേഡിയം, ബെംഗളൂരു
ദല്‍ഹി ക്യാപ്പിറ്റല്‍സ് – 44 – അരുണ്‍ ജെയ്റ്റ്‌ലി സ്റ്റേഡിയം, ദല്‍ഹി
കൊല്‍ക്കത്ത നൈറ്റ് റൈഡേഴ്‌സ് – 38 – ഈഡന്‍ ഗാര്‍ഡന്‍സ്, കൊല്‍ക്കത്ത
മുംബൈ ഇന്ത്യന്‍സ് – 34 – വാംഖഡെ സ്റ്റേഡിയം
പഞ്ചാബ് കിങ്‌സ് – 30 – മൊഹാലി
സീസണില്‍ കളിച്ച അഞ്ച് മത്സരത്തില്‍ നിന്നും മൂന്ന് വിജയവും രണ്ട് പരാജയവുമായി പോയിന്റ് പട്ടികയില്‍ മൂന്നാം സ്ഥാനത്താണ് റോയല്‍ ചലഞ്ചേഴ്‌സ്.
ചെപ്പോക്കിലും വാംഖഡെയിലും ഇഡന്‍ ഗാര്‍ഡന്‍സിലുമടക്കം എതിരാളികളുടെ തട്ടകത്തില്‍ കളിച്ച മൂന്ന് മത്സരത്തിലും ജയം നേടിയപ്പോള്‍ സ്വന്തം മണ്ണിലെ രണ്ട് മത്സരത്തിലും തോല്‍വി വഴങ്ങി.
ദല്‍ഹി ക്യാപ്പിറ്റല്‍സിന് പുറമെ ഗുജറാത്ത് ടൈറ്റന്‍സാണ് ബെംഗളൂരുവിനെ ബെംഗളൂരുവിലെത്തി പരാജയപ്പെടുത്തിയത്.
ഏപ്രില്‍ 13നാണ് റോയല്‍ ചലഞ്ചേഴ്‌സിന്റെ അടുത്ത മത്സരം. രാജസ്ഥാന്‍ റോയല്‍സാണ് എതിരാളികള്‍. രാജസ്ഥാന്റെ ഹോം ഗ്രൗണ്ടായ ജയ്പൂരിലെ സവായ് മാന്‍സിങ് സ്റ്റേഡിയമാണ് വേദി.
സീസണില്‍ ഇതാദ്യമായാണ് രാജസ്ഥാന്‍ തങ്ങളുടെ ഹോം മത്സരങ്ങള്‍ക്കായി ജയ്പൂരിലെത്തുന്നത്. നേരത്തെ നടന്ന രണ്ട് ഹോം മാച്ചുകളും തങ്ങളുടെ രണ്ടാം ഹോം ഗ്രൗണ്ടായ അസമിലെ ബര്‍സാപര സ്റ്റേഡിയത്തിലാണ് നടന്നത്.
Content Highlight: IPL 2025: Royal Challengers Bengaluru tops the unwanted list of most defeats by a team at a single venue in IPL
