ഐ.പി.എല്ലില്‍ ദല്‍ഹി ക്യാപ്പിറ്റല്‍സ് സ്വന്തം തട്ടകത്തില്‍ സണ്റൈസേഴ്സ് ഹൈദരാബാദിനെ നേരിടുകയാണ്. ടോസ് നഷ്ടപ്പെട്ട് ആദ്യംബാറ്റിങ്ങിനിറങ്ങിയ സണ്റൈസേഴ്സ് നിശ്ചിത ഓവറില്‍ ഏഴ് വിക്കറ്റ് നഷ്ടത്തില്‍ 266 റണ്‍സാണ് നേടിയത്.
ട്രാവിസ് ഹെഡ്, ഷഹബാസ് അഹമ്മദ് എന്നിവരുടെ അര്‍ധ സെഞ്ച്വറികളും അഭിഷേക് ശര്‍മയുടെ വെടിക്കെട്ടുമാണ് ടീമിനെ പടുകൂറ്റന്‍ ടോട്ടലിലെത്തിച്ചത്.
മറുപടി ബാറ്റിങ്ങിനിറങ്ങിയ ദല്‍ഹിക്ക് ആദ്യ ഓവറില്‍ തന്നെ സൂപ്പര്‍ താരം പൃഥ്വി ഷായെ നഷ്ടമായിരുന്നു. വാഷിങ്ടണ്‍ സുന്ദര്‍ എറിഞ്ഞ ആദ്യ ഓവറിലെ ആദ്യ നാല് പന്തിലും ബൗണ്ടറി നേടിയ ഷാ അഞ്ചാം പന്തില്‍ അബ്ദുള്‍ സമദിന് ക്യാച്ച് നല്‍കിയാണ് പുറത്തായത്.
ഓസീസ് യുവതാരം ജേക് ഫ്രേസര്‍ മക്ഗൂര്‍ക്കാണ് വണ്‍ ഡൗണായി കളത്തിലെത്തിയത്. ഡേവിഡ് വാര്‍ണറിനൊപ്പം ചേര്‍ന്ന് ഒരു മികച്ച കൂട്ടുകെട്ടുണ്ടാക്കാനുള്ള ശ്രമത്തെ മുളയിലേ നുള്ളി ഭുവനേശ്വര്‍ കുമാര്‍ സണ്‍റൈസേഴ്‌സിന് അടുത്ത ബ്രേക് ത്രൂ നല്‍കി. രണ്ടാം ഓവറിലെ അവസാന പന്തില്‍ വാര്‍ണറിനെ ക്യാപ്റ്റന്‍ പാറ്റ് കമ്മിന്‍സിന്റെ കൈകളിലെത്തിച്ച് ഭുവി മടക്കി.
വാഷിങ്ടണ്‍ എറിഞ്ഞ മൂന്നാം ഓവറില്‍ സണ്‍റൈസേഴ്‌സിനെ നിലം തൊടീക്കാത്ത മക്ഗൂര്‍ക്ക് അടിച്ചുകൂട്ടി. പവര്‍പ്ലേയില്‍ അഭിഷേക് ശര്‍മയും ട്രാവിസ് ഹെഡും ചേര്‍ന്ന് പുറത്തെടുത്ത അതേ വെടിക്കെട്ടാണ് മക്ഗൂര്‍ക്ക് വാഷിങ്ടണിനെതിരെ നടത്തിയത്.
Playing fire with fire in the Powerplay! 🔥🔥
Jake Fraser McGurk departs after an entertaining 65(18) 🙌#DC 109/3 after 7 overs.
ഓവറില്‍ മൂന്ന് സിക്‌സറും മൂന്ന് ബൗണ്ടറിയുമടക്കം 30 റണ്‍സാണ് താരം അടിച്ചുകൂട്ടിയത്. ഐ.പി.എല്ലിന്റെ ചരിത്രത്തില്‍ മൂന്നാം ഓവറില്‍ പിറക്കുന്ന ഏറ്റവുമുയര്‍ന്ന രണ്ടാമത്തെ സ്‌കോറാണിത്.
നേരിട്ട 15ാം പന്തിലാണ് താരം അര്‍ധ സെഞ്ച്വറി പൂര്‍കത്തിയാക്കിയത്. മായങ്ക് മാര്‍ക്കണ്ഡേയെറിഞ്ഞ ഏഴാം ഓവറിലെ മൂന്നാം പന്തില്‍ സണ്റൈസേഴ്സ് സ്പിന്നറിനെ സിക്‌സറിന് പറത്തിയാണ് താരം ഫിഫ്റ്റി പൂര്‍ത്തിയാക്കിയത്.
ഈ മത്സരത്തിലെ വേഗതയേറിയെ അര്‍ധ സെഞ്ച്വറിയാണിത്. സണ്‍റൈസേഴ്‌സിനായി ട്രാവിസ് ഹെഡ് 16 പന്തില്‍ അര്‍ധ സെഞ്ച്വറി പൂര്‍ത്തിയാക്കിയിരുന്നു.
അതേസമയം, 14 ഓവര്‍ പിന്നിടുമ്പോള്‍ അഞ്ച് വിക്കറ്റിന് 159 എന്ന നിലയിലാണ് ദല്‍ഹി. അഞ്ച് പന്തില്‍ മൂന്ന് റണ്‍സുമായി ലളിത് യാദവും 20 പന്തില്‍ 16 റണ്‍സുമായി ക്യാപ്റ്റന്‍ റിഷബ് പന്തുമാണ് ക്രീസില്‍.
