ഐ.പി.എല്‍ 2024ലെ 56ാം മത്സരം ദല്‍ഹിയിലെ അരുണ്‍ ജെയ്റ്റ്ലി സ്റ്റേഡിയത്തില്‍ പുരോഗമിക്കുകയാണ്. പോയിന്റ് പട്ടികയില്‍ രണ്ടാം സ്ഥാനത്തുള്ള രാജസ്ഥാന് റോയല്‍സാണ് ഹോം ടീമായ ദല്‍ഹി ക്യാപ്പിറ്റല്‍സിന്റെ എതിരാളികള്‍.
മത്സരത്തില്‍ ടോസ് നേടിയ രാജസ്ഥാന് നായകന്‍ സഞ്ജു സാംസണ്‍ എതിരാളികളെ ബാറ്റിങ്ങിനക്കുകയായിരുന്നു.
ആദ്യം ബാറ്റിങ്ങിനിറങ്ങിയ ദല്‍ഹി ക്യാപ്പിറ്റല്‍സ് നിശ്ചിത ഓവറില്‍ എട്ട് വിക്കറ്റ് നഷ്ടത്തില്‍ 221 റണ്‍സാണ് അടിച്ചെടുത്തത്. ഓപ്പണര്‍മാരായ അഭിഷേക് പോരലിന്റെയും ജേക് ഫ്രേസര്‍ മക്ഗൂര്‍ക്കിന്റെയും അര്‍ധ സെഞ്ച്വറികളുടെ കരുത്തിലാണ് ടീം മികച്ച സ്‌കോര്‍ കണ്ടെത്തിയത്.
222 റണ്‍സ് വിജയലക്ഷ്യവുമായി കളത്തിലിറങ്ങിയ രാജസ്ഥാന് തുടക്കത്തിലേ പിഴച്ചിരുന്നു. ആദ്യ ഓവറിലെ രണ്ടാം പന്തില്‍ യശസ്വി ജെയ്‌സ്വാളിനെ ടീമിന് നഷ്ടമായി.
ഖലീല്‍ അഹമ്മദ് എറിഞ്ഞ ആദ്യം ഓവറിലെ ആദ്യ പന്തില്‍ ബൗണ്ടറി നേടിക്കൊണ്ടായിരുന്നു ജെയ്‌സ്വാള്‍ തുടങ്ങിയത്. എന്നാല്‍ തൊട്ടുത്ത പന്തില്‍ വമ്പനടിക്ക് ശ്രമിച്ച താരത്തിന് പിഴച്ചു. അക്‌സര്‍ പട്ടേലിന്റെ കയ്യിലൊതുങ്ങി ജെയ്‌സ്വാള്‍ മടങ്ങി.
വണ്‍ ഡൗണായി ക്യാപ്റ്റന്‍ സഞ്ജു സാംസണാണ് കളത്തിലിറങ്ങിയത്. നേരിട്ട ആദ്യ പന്തുകളില്‍ പതിഞ്ഞ് തുടങ്ങിയ സഞ്ജു പോകെ പോകെ മൊമെന്റം കണ്ടെടുത്തു. ഒന്നിന് പിന്നാലെ ഒന്നായി പന്തുകള്‍ അതിര്‍ത്തി കടന്നപ്പോള്‍ രാജസ്ഥാന് സ്‌കോര്‍ ബോര്‍ഡും അതിവേഗം ചലിച്ചു.
ഇതിനിടെ താരം ഒരു തകര്‍പ്പന്‍ റെക്കോഡും സ്വന്തമാക്കിയിരുന്നു. മൂന്നാം ഓവറിലെ രണ്ടാം പന്തില്‍ ഖലീല്‍ അഹമ്മദിനെ ഗ്യാലറിയിലെത്തിച്ചതോടെയാണ് സഞ്ജു ഐ.പി.എല്ലിലെ ഒരു എലീറ്റ് ലിസ്റ്റിന്റെ ഭാഗവുമായിരുന്നു. ഐ.പി.എല്ലില്‍ 200ാം സിക്‌സര്‍ പൂര്‍ത്തിയാക്കുന്ന താരങ്ങളുടെ പട്ടികയില്‍ ഇടം നേടിയാണ് സഞ്ജു കളം നിറഞ്ഞാടിയത്.
