ഐ.പി.എല്‍ 2024ലെ 19ാം മത്സരത്തില്‍ രാജസ്ഥാന്‍ റോയല്‍സ് റോയല്‍ ചലഞ്ചേഴ്‌സ് ബെംഗളൂരുവിനെ നേരിടുകയാണ്. രാജസ്ഥാന്റെ കോട്ടയായ സവായ് മാന്‍സിങ് സ്‌റ്റേഡിയത്തില്‍ നടക്കുന്ന മത്സരത്തില്‍ ടോസ് നേടിയ സഞ്ജു സാംസണ്‍ എതിരാളികളെ ബാറ്റിങ്ങിനയച്ചു.
ഈ മത്സരത്തില്‍ ഒരു ചരിത്ര നേട്ടമാണ് ബെംഗളൂരു ലെജന്‍ഡ് വിരാട് കോഹ്‌ലിയെ കാത്തിരിക്കുന്നത്. ആ നേട്ടം സ്വന്തമാക്കാന്‍ വിരാടിന് വേണ്ടത് 110 റണ്‍സാണ്.
ടി-20 ഫോര്‍മാറ്റില്‍ ഒരു ടീമിന് വേണ്ടി മാത്രമായി 8,000 റണ്‍സ് നേടുന്ന താരം എന്ന നേട്ടമാണ് വിരാടിനെ കാത്തിരിക്കുന്നത്. ടി-20 ഫോര്‍മാറ്റില്‍ ഏറ്റവുമധികം റണ്‍സ് നേടിയ ക്രിസ് ഗെയ്ല്‍ അടക്കമുള്ള സൂപ്പര്‍ താരങ്ങള്‍ക്കൊന്നും തന്നെ നേടാന്‍ സാധിക്കാത്ത നേട്ടമാണ് വിരാടിന് മുമ്പിലുള്ളത്.
ഐ.പി.എല്ലില്‍ കളിച്ച 241 മത്സരത്തില്‍ നിന്നും 130.29 എന്ന മികച്ച സ്‌ട്രൈക്ക് റേറ്റിലും 37.7 ശരാശരിയിലും 7,466 റണ്‍സാണ് വിരാട് നേടിയത്. ഏഴ് സെഞ്ച്വറിയും 52 അര്‍ധ സെഞ്ച്വറിയുമാണ് വിരാടിന്റെ പേരില്‍ ഐ.പി.എല്ലില്‍ കുറിക്കപ്പെട്ടത്.
ശേഷിക്കുന്ന 424 റണ്‍സ് ചാമ്പ്യന്‍സ് ലീഗിലെ 15 മത്സരത്തില്‍ നിന്നുമാണ് വിരാട് അടിച്ചെടുത്തത്. 38.54 എന്ന ശരാശരിയും 150.35 എന്ന സ്‌ട്രൈക്ക് റേറ്റുമാണ് ചാമ്പ്യന്‍സ് ലീഗില്‍ വിരാടിനുള്ളത്. രണ്ട് അര്‍ധ സെഞ്ച്വറിയാണ് ചാമ്പ്യന്‍സ് ലീഗില്‍ വിരാട് സ്വന്തമാക്കിയത്. 84* ആണ് ഉയര്‍ന്ന സ്‌കോര്‍.
അതേസമയം, രാജസ്ഥാനെതിരായ മത്സരത്തില്‍ മൂന്ന് ഓവര്‍ പിന്നിടുമ്പോള്‍ വിക്കറ്റൊന്നും നഷ്ടപ്പെടാതെ 29 എന്ന നിലയിലാണ് ബെംഗളൂരു. 12 പന്തില്‍ 16 റണ്‍സുമായി വിരാടും ആറ് പന്തില്‍ ആറ് റണ്‍സുമായി ഫാഫ് ഡു പ്ലെസിയുമാണ് ക്രീസില്‍.
റോയല്‍ ചലഞ്ചേഴ്‌സ് ബെംഗളൂരു പ്ലെയിങ് ഇലവന്‍
വിരാട് കോഹ്‌ലി, ഫാഫ് ഡു പ്ലെസി (ക്യാപ്റ്റന്‍), രജത് പാടിദാര്‍, ഗ്ലെന്‍ മാക്‌സ്‌വെല്‍, കാമറൂണ്‍ ഗ്രീന്‍, സൗരഭ് ചൗഹാന്‍, ദിനേഷ് കാര്‍ത്തിക് (വിക്കറ്റ് കീപ്പര്‍), മായങ്ക് ഡാഗര്‍, റീസ് ടോപ്‌ലി, മുഹമമ്ദ് സിറാജ്, യാഷ് ദയാല്‍.
രാജസ്ഥാന്‍ റോയല്‍സ് പ്ലെയിങ് ഇലവന്‍
ജോഷ് ബട്‌ലര്‍, യശസ്വി ജെയ്‌സ്വാള്‍, സഞ്ജു സാംസണ്‍ (ക്യാപ്റ്റന്‍, വിക്കറ്റ് കീപ്പര്‍), റിയാന്‍ പരാഗ്, ധ്രുവ് ജുറെല്‍, ഷിംറോണ്‍ ഹെറ്റ്‌മെയര്‍, ആര്‍. അശ്വിന്‍, യൂസ്വേന്ദ്ര ചഹല്‍, നാന്ദ്രേ ബര്‍ഗര്‍, ആവേശ് ഖാന്‍, ട്രെന്റ് ബോള്‍ട്ട്.
Content highlight: IPL 2024: RCB vs RR: Virat Kohli needs 110 runs to complete 8,000 runs for Royal Challengers