ആരാധകര്‍ കാത്തിരിക്കുന്നത് ആ 15 റണ്‍സിന്; വാംഖഡെ കീഴടക്കാന്‍ സഞ്ജു

ഐ.പി.എല്ലില്‍ തങ്ങളുടെ മൂന്നാം മത്സരത്തിനാണ് സഞ്ജു സാംസണും രാജസ്ഥാന്‍ റോയല്‍സും ഇറങ്ങുന്നത്. മുംബൈ വാംഖഡെ സ്‌റ്റേഡിയത്തില്‍ നടക്കുന്ന മത്സരത്തില്‍ ഹോം ടീമായ മുംബൈ ഇന്ത്യന്‍സാണ് എതിരാളികള്‍.

സീസണില്‍ മികച്ച പ്രകടനമാണ് രാജസ്ഥാന്‍ റോയല്‍സ് പുറത്തെടുക്കുന്നത്. കളിച്ച രണ്ട് മത്സരത്തിലും വിജയിച്ചാണ് സഞ്ജുവും കൂട്ടരും ക്യാംപെയ്‌ന് തുടക്കമിട്ടിരിക്കുന്നത്. വാംഖഡെ സ്‌റ്റേഡിയത്തില്‍ നടക്കുന്ന മത്സരത്തിലും വിജയിച്ച് പോയിന്റ് പട്ടികയില്‍ ഒന്നാം സ്ഥാനത്തെത്താനാണ് രാജസ്ഥാന്‍ റോയല്‍സ് ഒരുങ്ങുന്നത്.

അതേസമയം, സീസണില്‍ കളിച്ച മത്സരത്തില്‍ ഒന്നുപോലും വിജയിക്കാന്‍ സാധിക്കാതെ പോയിന്റ് പട്ടികയില്‍ അവസാനസ്ഥാനത്താണ് മുംബൈ. സ്വന്തം മണ്ണില്‍ നടക്കുന്ന മത്സരത്തില്‍ വിജയിച്ച് അക്കൗണ്ട് തുറക്കാനാണ് പുതിയ ക്യാപ്റ്റന് കീഴില്‍ മുംബൈ ഒരുങ്ങുന്നത്.

മുംബൈക്കെതിരെ കളത്തിലിറങ്ങുന്ന രാജസ്ഥാന്‍ നായകന്‍ സഞ്ജു സാംസണെ ഒരു ഐതിഹാസിക നേട്ടം കാത്തിരിക്കുന്നുണ്ട്. ഐ.പി.എല്ലില്‍ 4,000 റണ്‍സ് പൂര്‍ത്തിയാക്കുന്ന താരം എന്ന നേട്ടമാണ് സഞ്ജുവിനെ കാത്തിരിക്കുന്നത്. വാംഖഡെയില്‍ 15 റണ്‍സ് കണ്ടെത്താന്‍ സാധിച്ചാല്‍ ഐ.പി.എല്ലിലെ എലീറ്റ് ലിസ്റ്റില്‍ കാലെടുത്ത് വെക്കാന്‍ സഞ്ജുവിന് സാധിക്കും.

രാജസ്ഥാന്‍ റോയല്‍സിനും ദല്‍ഹി ഡെയര്‍ഡെവിള്‍സിനും വേണ്ടി 154 മത്സരങ്ങളാണ് സഞ്ജു ഇതുവരെ കളിച്ചിട്ടുള്ളത്. ബാറ്റെടുത്ത 150 ഇന്നിങ്സില്‍ നിന്നും 29.73 എന്ന ശരാശരിയിലും 137.41 സ്ട്രൈക്ക് റേറ്റിലും 3,985 റണ്‍സാണ് താരം ഇതുവരെ സ്വന്തമാക്കിയത്. മൂന്ന് സെഞ്ച്വറിയും 21 അര്‍ധ സെഞ്ച്വറിയുമാണ് സഞ്ജുവിന്റെ പേരിലുള്ളത്.

മത്സരത്തില്‍ 15 റണ്‍സ് കൂടി കണ്ടെത്താന്‍ സാധിച്ചാല്‍ 4,000 ഐ.പി.എല്‍ റണ്‍സ് എന്ന നേട്ടത്തിലെത്തുന്ന 16ാം താരം എന്ന നേട്ടമാണ് സഞ്ജുവിനെ കാത്തിരിക്കുന്നത്.

ഐ.പി.എല്ലില്‍ ഏറ്റവുമധികം റണ്‍സ് നേടിയ താരം

(താരം – റണ്‍സ് എന്നീ ക്രമത്തില്‍)

വിരാട് കോഹ്‌ലി – 7,444
ശിഖര്‍ ധവാന്‍ – 6,754
ഡേവിഡ് വാര്‍ണര്‍ – 6,527
രോഹിത് ശര്‍മ – 6,280
സുരേഷ് റെയ്‌ന – 5,528
എ.ബി. ഡി വില്ലിയേഴ്‌സ് – 5,126
എം.എസ്. ധോണി – 5,119
ക്രിസ് ഗെയ്ല്‍ – 4,965
റോബിന്‍ ഉത്തപ്പ – 4,925
ദിനേഷ് കാര്‍ത്തിക് – 4,602
അജിന്‍ക്യ രഹാനെ – 4,484
അംബാട്ടി റായിഡു – 4,348
കെ.എല്‍. രാഹുല്‍ – 4,236
ഗൗതം ഗംഭീര്‍ – 4,217
ഫാഫ് ഡു പ്ലെസി – 4,179
സഞ്ജു സാംസണ്‍ – 3,985

കഴിഞ്ഞ മത്സരത്തില്‍ ഈ നേട്ടത്തിലെത്താന്‍ സഞ്ജുവിന് അവസരമുണ്ടായിരുന്നു. ദല്‍ഹി ക്യാപ്പിറ്റല്‍സിനെതിരായ മത്സരത്തില്‍ 30 റണ്‍സ് കണ്ടെത്തിയാല്‍ 4,000 ഐ.പി.എല്‍ റണ്‍സ് എന്ന കരിയര്‍ മൈല്‍സ്റ്റോണിലെത്താന്‍ സഞ്ജുവിന് സാധിക്കുമായിരുന്നു. എന്നാല്‍ താരം 15 റണ്‍സിന് പുറത്താവുകയായിരുന്നു.

എന്നാല്‍ മുംബൈക്കെതിരെ, സീസണിലെ ആദ്യ എവേ മാച്ചില്‍ സഞ്ജു ഈ നേട്ടം കൈപ്പിടിയിലൊതുക്കുമെന്നാണ് ആരാധകര്‍ ഉറച്ചുവിശ്വസിക്കുന്നത്.

Content Highlight: IPL 2024: MI vs RR: Sanju Samson need 15 runs to complete 4,000 IPL runs