ന്യൂദൽഹി: നാല്പത് വർഷങ്ങൾക്ക് മുമ്പുള്ള ബലാത്സംഗ കേസിൽ പ്രതിയുടെ ശിക്ഷ ശരിവെച്ച് സുപ്രീം കോടതി. 1984ൽ സ്കൂൾ വിദ്യാർത്ഥിനിയെ ലൈംഗികമായി പീഡിപ്പിച്ച കേസിൽ ട്യൂഷൻ അധ്യാപകന്റെ ശിക്ഷയാണ് സുപ്രീം കോടതി ശരിവെച്ചത്. സ്വകാര്യ ഭാഗങ്ങളിൽ പരിക്കുകൾ ഉണ്ടോ ഇല്ലയോ എന്നത് പരിഗണിക്കാതെ, അതിജീവിച്ചയാളുടെ മൊഴിയുടെ അടിസ്ഥാനത്തിൽ ശിക്ഷാവിധി മുന്നോട്ട് കൊണ്ടുപോകാമെന്ന് സുപ്രീം കോടതി നിരീക്ഷിച്ചു.

കേസിൽ പ്രതിക്കെതിരെ ശക്തമായ തെളിവുകളില്ലെന്ന് പ്രതിഭാഗം അഭിഭാഷകൻ സുപ്രീം കോടതിയിൽ വാദിച്ചിരുന്നു. കേസ് തെറ്റായ ഗൂഢാലോചനയുടെ ഭാഗമാണെന്നും പ്രോസിക്യൂഷന്റെ അമ്മയുടെ സ്വഭാവം മോശമാണെന്നും അഭിഭാഷകൻ വാദിച്ചു.

പെൺകുട്ടിയുടെ സ്വകാര്യ ഭാഗങ്ങളിൽ പരിക്കുകളൊന്നും കണ്ടെത്തിയിട്ടില്ലാത്തതിനാൽ, രേഖപ്പെടുത്തിയ മെഡിക്കൽ തെളിവുകൾ പ്രോസിക്യൂഷന്റെ മൊഴിയെ സ്ഥിരീകരിക്കുന്നില്ലെന്നും അദ്ദേഹം വാദിച്ചു. അതിനാൽ, ഈ കേസിൽ ശിക്ഷ വിധിക്കേണ്ടതില്ലായിരുന്നുവെന്ന് അദ്ദേഹം വാദിച്ചു. കൂടാതെ, പ്രോസിക്യൂഷന്റെ ഏക സാക്ഷ്യം ഒരു ശിക്ഷ ഉറപ്പാക്കാൻ പര്യാപ്തമല്ലെന്നും അദ്ദേഹം വാദിച്ചു.

കൂടാതെ ബലാത്സംഗം ചെയ്യപ്പെട്ട പെൺകുട്ടിയുടെ അമ്മയെ അപമാനിക്കാൻ ലക്ഷ്യമിട്ടുള്ള ആരോപണങ്ങൾ സുപ്രീം കോടതി തള്ളിക്കളഞ്ഞു. പെൺകുട്ടിക്കുണ്ടായ ആക്രമണത്തിൽ കുട്ടിയുടെ അമ്മയുടെ സ്വഭാവത്തിന് യാതൊരു പ്രസക്തിയുമില്ലെന്ന്കോടതി പറഞ്ഞു.

മെഡിക്കൽ തെളിവുകളിൽ സ്വകാര്യ ഭാഗങ്ങളിൽ കാര്യമായ പരിക്കുകളൊന്നുമില്ലാത്തതിനാൽ, കേസ് തള്ളിക്കളയാൻ സാധിക്കില്ലെന്ന് സുപ്രീം കോടതി പറഞ്ഞു. ജസ്റ്റിസുമാരായ സന്ദീപ് മേത്തയും പ്രസന്ന ബി. വരാലെയും ഉൾപ്പെട്ട ബെഞ്ചിന്റേതാണ് നിരീക്ഷണം.

‘ബലാത്സംഗം ആരോപിക്കപ്പെടുന്ന ഓരോ കേസിലും സ്വകാര്യ ഭാഗങ്ങളിൽ പരിക്ക് ഉണ്ടാകണമെന്നില്ല. ആക്രമിക്കപ്പെട്ട വ്യക്തിയുടെ സ്വകാര്യ ഭാഗങ്ങളിൽ പരിക്ക് ഇല്ല എന്നത് ബലാത്സംഗം നടന്നിട്ടില്ല എന്നല്ല അർത്ഥമാക്കുന്നത്,’ കോടതി പറഞ്ഞു. ആക്രമിക്കപ്പെട്ട വ്യക്തി നൽകുന്ന സാക്ഷ്യത്തിന് സാക്ഷി മൊഴിയുടെ അതേ പ്രാധാന്യമുണ്ടെന്നും അതിനാൽ ഈ സാക്ഷ്യത്തെ മാത്രം അടിസ്ഥാനമാക്കി കുറ്റം ചുമത്താൻ കഴിയുമെന്നും ബെഞ്ച് പറഞ്ഞു.

1984 മാർച്ചിലാണ് കേസിനാസ്പദമായ സംഭവം നടന്നത്. കുറ്റാരോപിതനായ അധ്യാപകൻ മറ്റ് വിദ്യാർത്ഥികളെ പറഞ്ഞയച്ച് മുറി പൂട്ടിയ ശേഷം പെൺകുട്ടിയെ ലൈംഗികമായി പീഡിപ്പിക്കുകയായിരുന്നു. മറ്റ് വിദ്യാർത്ഥികൾ അറിയിച്ചതിനെ തുടർന്ന് മുത്തശ്ശിയാണ് പെൺകുട്ടിയെ രക്ഷിച്ചത്. എഫ്.ഐ.ആർ രജിസ്റ്റർ ചെയ്യാനുള്ള ശ്രമത്തിൽ കുടുംബത്തിന് ഭീഷണി നേരിട്ടെങ്കിലും കുട്ടിയുടെ കുടുംബം കേസുമായി മുന്നോട്ട് പോവുകയായിരുന്നു.

Content Highlight: Injury to private parts not always must for conviction in rape cases: SC upholds conviction in 1984 case