കരിയറിന്റെ തുടക്കത്തിൽ തന്നെ മലയാള പ്രേക്ഷകർക്കിടയിൽ തന്റേതായ സ്ഥാനം നേടിയെടുത്ത നടനാണ് ഇന്ദ്രജിത്ത് സുകുമാരൻ. മീശ മാധവൻ, ഊമപ്പെണ്ണിന് ഉരിയാടപയ്യൻ തുടങ്ങിയ സിനിമകളിലെല്ലാം വില്ലൻ വേഷത്തിലെത്തിയ താരം പിന്നീട് കോമഡി കഥാപാത്രങ്ങളിലും കയ്യടി നേടി. പലപ്പോഴും മലയാള സിനിമ വേണ്ടരീതിയിൽ ഇന്ദ്രജിത്തിനെ ഉപയോഗിക്കുന്നില്ലായെന്ന വിമർശനം ഉയർന്നു വരാറുണ്ട്.
വരാനിരിക്കുന്ന തന്റെ ഒരു ഹിന്ദി സിനിമയെ കുറിച്ച് സംസാരിക്കുകയാണ് ഇന്ദ്രജിത്ത്. ഈയിടെ താൻ അനുരാഗ് കശ്യപിന്റെ ഒരു ഹിന്ദി സിനിമ ചെയ്‌തെന്നും അനുരാഗ് കശ്യപിനെ ആരാധനയോടെയാണ് താൻ കാണുന്നതെന്നും ഇന്ദ്രജിത്ത് പറയുന്നു. അദ്ദേഹം സിനിമയെ കുറിച്ച് ഇങ്ങോട്ട് മെസേജ് അയക്കുകയായിരുന്നുവെന്നും ഇതുവരെ ചെയ്യാത്ത ഒരു മികച്ച വേഷമാണ് സിനിമയിലേതെന്നും അദ്ദേഹം കൂട്ടിച്ചേർത്തു.
‘ഈയിടെ ഞാനൊരു ഹിന്ദി സിനിമ ചെയ്തു. ഞാൻ വല്ലാതെ ആരാധിക്കുന്ന അനുരാഗ് കശ്യപാണ് അതിന്റെ സംവിധായകൻ. അനുരാഗ് കശ്യപിന്റെ ഒരു സിനിമയിൽ അഭിനയിക്കണമെന്നത് ഒരുപാട് നാളായിട്ടുള്ള എന്റെ ആഗ്രഹമായിരുന്നു.
എന്റെയടുത്ത് മുംബൈലൊക്കെയുള്ള പല സുഹൃത്തുക്കളും ഇങ്ങോട്ട് പറഞ്ഞിട്ടുണ്ട്, നീ അദ്ദേഹത്തെ പോയി കാണണമെന്നൊക്കെ. അദ്ദേഹത്തിന് നിന്നെ തിരിച്ചറിയാൻ സാധിക്കുമെന്നൊക്കെ അവർ പറയുമായിരുന്നു.
എന്നാൽ അതെല്ലാം എങ്ങനെയോ കറങ്ങി തിരിഞ്ഞ് ഒരു ദിവസം അദ്ദേഹത്തിൽ നിന്ന് എനിക്കൊരു മെസേജ് വന്നു. ഞാൻ അനുരാഗ് കശ്യപാണ്, നിങ്ങളെയൊന്ന് വിളിക്കട്ടെയെന്ന് ചോദിച്ചാണ് ആ മെസേജ് വന്നത്. എന്നെ വിളിച്ചപ്പോൾ അദ്ദേഹം പറഞ്ഞത്, ഒരു സിനിമയുണ്ട്, നല്ല കഥാപാത്രമാണ് ചെയ്യാൻ താത്പര്യമുണ്ടോയെന്നായിരുന്നു.
ശരിക്കും പറഞ്ഞാൽ ഞാൻ ഇതുവരെ ചെയ്തിട്ടുള്ളതിൽ വൺ ഓഫ് ദി ബെസ്ററ് ക്യാരക്ടറാണ് അത്. അങ്ങനെയിരു കഥാപാത്രമാണ് അനുരാഗിന്റെ പടത്തിൽ ഞാൻ ചെയ്തിട്ടുള്ളത്. രണ്ടുമാസം മുമ്പ് അതിന്റെ ഷൂട്ടിങ് കഴിഞ്ഞു. ഞാൻ അത്രയും ആഗ്രഹിച്ചിട്ട് കിട്ടിയ ഒരു കഥാപാത്രമായത് കൊണ്ട് തന്നെ എനിക്ക് വലിയ സന്തോഷം തോന്നിയിരുന്നു,’ഇന്ദ്രജിത്ത് പറയുന്നു.
Content Highlight: Indrajith Sukumaran About His Hindi Film With Anurag Kashyap