ഇന്ത്യയുടെ ബംഗ്ലാദേശ് പര്യടനടത്തിലെ ആദ്യ മത്സരം ഞായറാഴ്ച നടക്കുകയാണ്. മത്സരത്തിന് മുമ്പ് ഇന്ത്യന്‍ സൂപ്പര്‍ താരം ദീപക് ചഹറിന് കരിയറിലെ തന്നെ മോശം യാത്രാ അനുഭവമാണ് ഉണ്ടായിരിക്കുന്നത്. മലേഷ്യ എയര്‍ലൈന്‍സിന്റെ ഫ്‌ളൈറ്റിലാണ് താരത്തിന് മോശം അനുഭവമുണ്ടായത്.
ശിഖര്‍ ധവാന്‍, ശ്രേയസ് അയ്യര്‍, ഷര്‍ദുല്‍ താക്കൂര്‍, റിഷബ് പന്ത്, വാഷിങ്ടണ്‍ സുന്ദര്‍ എന്നിവര്‍ക്കൊപ്പം ക്രൈസ്റ്റ് ചര്‍ച്ചില്‍ നിന്നും കോലാലംപൂര്‍ വഴി ധാക്കയിലേക്ക് വരവെയാണ് താരത്തിന് മോശം അനുഭവം ഉണ്ടായത്.
ഒരു മുന്നറിയിപ്പും കൂടാതെ ഫ്‌ളൈറ്റ് മാറിയെന്നും ബിസിനസ് ക്ലാസില്‍ ആയിരുന്നിട്ടുകൂടിയും ഭക്ഷണം ലഭിച്ചില്ലെന്നും താരം പറയുന്നു. മിര്‍പൂരില്‍ ഇന്ത്യന്‍ സ്‌ക്വാഡിനൊപ്പം ചേര്‍ന്നെങ്കിലും ഇവരുടെ ലഗേജ് ഇനിയും എത്തിയിട്ടില്ല.
‘ഏറ്റവും മോശം യാത്രാനുഭവമാണ് മലേഷ്യന്‍ എയര്‍ലൈന്‍സിനൊപ്പം ഉണ്ടായത്. അവര്‍ ഒരക്ഷരം പോലും പറയാതെ ഫ്‌ളൈറ്റ് ചെയ്ഞ്ച് ചെയ്തു. ബിസിനസ് ക്ലാസിലായിരുന്നിട്ടും ഭക്ഷണം ലഭിച്ചില്ല. കഴിഞ്ഞ 24 മണിക്കൂറായി ഞങ്ങള്‍ ലഗേജിനായി കാത്തിരിക്കുകയാണ്. നാളെ ഞങ്ങള്‍ക്കൊരു മാച്ച് കളിക്കാനുള്ളതാണ്,’ താരം ട്വീറ്റ് ചെയ്തു.
Had a worse experience traveling with Malaysia airlines @MAS .first they changed our flight without telling us and no food in Business class now we have been waiting for our luggage from last 24hours .imagine we have a game to play tomorrow 😃 #worse#experience#flyingcar
മൂന്ന് ഏകദിനവും രണ്ട് ടെസ്റ്റുമാണ് ഇന്ത്യയുടെ ബംഗ്ലാദേശ് പര്യടനത്തിലുള്ളത്. മത്സരത്തിലെ ആദ്യ ഏകദിനം ഞായറാഴ്ച ഇന്ത്യന്‍ സമയം പകല്‍ 11.30ന് നടക്കും. ഷേര്‍ ഇ ബംഗ്ലായാണ് വേദി.
