ഇന്ത്യയുടെ വിന്‍ഡീസ് പര്യടനത്തിലെ രണ്ടാം മത്സരത്തിനുള്ള മുന്നൊരുക്കത്തിലാണ് ഇന്ത്യന്‍ ടീം. ഗയാനയിലെ പ്രൊവിഡന്‍സ് സ്റ്റേഡിയത്തിലാണ് രണ്ടാം മത്സരം അരങ്ങേറുന്നത്.
ആദ്യ മത്സരത്തിലേറ്റ പരാജയത്തിന്റെ അപമാന ഭാരം ചുമലില്‍ നിന്നും ഇറക്കിവെക്കാനാകും ഇന്ത്യ രണ്ടാം മത്സരത്തിനിറങ്ങുക. പരമ്പരയില്‍ തിരിച്ചുവരണമെങ്കില്‍ പ്രൊവിഡന്‍സ് സ്റ്റേഡിയത്തില്‍ നടക്കുന്ന രണ്ടാം ടി-20യില്‍ ഇന്ത്യക്ക് വിജയം അനിവാര്യമാണ്.
മത്സരത്തിന് മുമ്പ് ബി.സി.സി.ഐ തങ്ങളുടെ സമൂഹമാധ്യമ അക്കൗണ്ടുകളിലൂടെ പങ്കുവെച്ച വീഡിയോ ആരാധകര്‍ക്കിടയില്‍ തരംഗമാവുകരയാണ്. ഇന്ത്യന്‍ താരങ്ങളുടെ നെറ്റ്‌സ് സെഷന്റെ വീഡിയോ ആണ് ബി.സി.സി.ഐ പങ്കുവെച്ചിരിക്കുന്നത്.
അവസാന നെറ്റ്‌സ് സെഷനില്‍ ക്യാപ്റ്റന്‍ ഹര്‍ദിക് പാണ്ഡ്യ, വിക്കറ്റ് കീപ്പര്‍ ബാറ്റര്‍ സഞ്ജു സാംസണ്‍, ടി-20 സ്‌പെഷ്യലിസ്റ്റ് സൂര്യകുമാര്‍ യാദവ്, ശുഭ്മന്‍ ഗില്‍ എന്നിവര്‍ ഏറെ നേരം ബാറ്റ് ചെയ്തിരുന്നു.
ബാറ്റിങ്ങിനെ തുണയ്ക്കുന്ന പ്രൊവിന്‍ഡന്‍സ് സ്റ്റേഡിയത്തിന്റെ സകല അഡ്വാന്റേജും മുതലാക്കാന്‍ വേണ്ടിയാകും ഇന്ത്യയൊരുങ്ങുക. ബാറ്റിങ്ങിനെ തുണയ്ക്കുന്ന പിച്ച് ആണെങ്കില്‍ക്കൂടിയും 50 റണ്‍സിന്റെ കുറഞ്ഞ ടോട്ടല്‍ ഡിഫന്‍ഡ് ചെയ്ത് വിജയിച്ച ചരിത്രവും പ്രൊവിഡന്‍സിലെ പിച്ചിനുണ്ട്. അതിനാല്‍ തന്നെ മത്സരത്തിന് മുമ്പ് സാധ്യതകള്‍ വിലയിരുത്തുക അസാധ്യമാണ്.
ഓഗസ്റ്റ് മൂന്നിന് ബ്രയാന്‍ ലാറ ക്രിക്കറ്റ് അക്കാദമിയില്‍ നടന്ന മത്സരത്തില്‍ ഇന്ത്യ നാല് റണ്‍സിന് പരാജയപ്പെട്ടിരുന്നു. വിന്‍ഡീസ് ഉയര്‍ത്തിയ 149 റണ്‍സിന്റെ ടോട്ടല്‍ ചെയ്‌സ് ചെയ്തിറങ്ങിയ ഇന്ത്യക്ക് 145 റണ്‍സ് മാത്രമാണ് നേടാന്‍ സാദിച്ചത്.
West Indies win the first #WIvIND T20I.#TeamIndia will look to bounce back in the second T20I in Guyana. 👍 👍
ടോസ് നേടി ബാറ്റിങ് തെരഞ്ഞെടുത്ത വിന്‍ഡീസിനെ 149 എന്ന താരതമ്യേന ചെറിയ സ്‌കോറില്‍ ഒതുക്കിയെങ്കിലും ആ അഡ്വാന്റേജ് മുതലാക്കാന്‍ ഇന്ത്യന്‍ ബാറ്റര്‍മാര്‍ക്ക് സാധിച്ചില്ല. അരങ്ങേറ്റക്കാരന്‍ തിലക് വര്‍മയടക്കമുള്ള താരങ്ങള്‍ പ്രതീക്ഷ തെറ്റിച്ചപ്പോള്‍ ഇന്ത്യ ആദ്യ മത്സരത്തില്‍ പരാജയം ചോദിച്ചുവാങ്ങി.
പരമ്പര സജീവമാക്കി നിര്‍ത്താനുള്ള ഇന്ത്യക്ക് വിലങ്ങുതടിയാകാന്‍ തന്നെയാണ് വിന്‍ഡീസും ഒരുങ്ങുന്നത്. ജയപരാജയങ്ങള്‍ അപ്രവചനീയമായ പ്രൊവിഡന്‍സില്‍ പോരാട്ടം തീ പാറുമെന്നുറപ്പാണ്.
