ലണ്ടന്‍: ഇരുടീമുകള്‍ക്കും സെമി പ്രവേശനത്തിന് ജയം അനിവാര്യമായ മത്സരത്തില്‍ ദക്ഷിണാഫ്രിക്കയ്ക്ക ബാറ്റിങ്ങ് തകര്‍ച്ച. ആദ്യം ബാറ്റുചെയ്ത ദക്ഷിണാഫ്രിക്ക മികച്ച തുടക്കത്തിനു ശേഷം തകര്‍ന്നടിയുകയായിരുന്നു. 44.3 ഓവറില്‍ 191 റണ്‍സിനാണ് ആഫ്രിക്കന്‍ താരങ്ങള്‍ കൂടാരം കയറിയത്.
ഡി കോക്കും ഹാഷിം അംലയും നല്‍കിയ മികച്ച തുടക്കം മുതലാക്കാനാകാതെ പോയതാണ് ടീം ചെറിയ സ്‌കോറില്‍ പുറത്താകാന്‍ കാരണമായത്. ഡി കോക്ക് 53, അംല 35, ഡുപ്ലെസിസ് 36 എന്നിവര്‍ക്ക് പുറമേ മറ്റ് താരങ്ങള്‍ക്കൊന്നും ടീമിനായി മികച്ച പ്രകടം പുറത്തെടുക്കാന്‍ കഴിഞ്ഞില്ല.
കഴിഞ്ഞ മത്സരത്തില്‍ തോല്‍വിയുടെ ഉത്തരവാദിത്വം ഏല്‍ക്കേണ്ടി വന്ന ബൗളിങ്ങ് ഡിപ്പാര്‍ട്ട്‌മെന്റ് കൃത്യതയോടെ പന്തെറിഞ്ഞതാണ് ദക്ഷിണാഫ്രിക്കയെ പ്രതിരോധത്തിലാക്കിയത്. ടീമില്‍ തിരിച്ചെത്തിയ ആര്‍. അശ്വിനും മികച്ച പ്രകടനമാണ് പുറത്തെടുത്തത്. രണ്ട് വിക്കറ്റ് വീതം വീഴ്ത്തിയ ഭുവനേശ്വര്‍ കുമാറും ജസ്പ്രീത് ഭൂംറയുമാണ് ഇന്ത്യന്‍ ബൗളര്‍മാരില്‍ മികച്ചുനിന്നത്. അശ്വിനും പാണ്ഡ്യയും ജഡേജയും ഓരോ വിക്കറ്റുകളും സ്വന്തമാക്കി.