ദാവോസ്: ലോക സാമ്പത്തിക വളര്‍ച്ചാസൂചികയുടെ പട്ടിക സ്വിറ്റ്‌സര്‍ലാന്‍ഡില്‍ നടക്കുന്ന വേള്‍ഡ് ഇക്കണോമിക്‌സ് ഫോറം പുറത്തുവിട്ടു. സംഘപരിവാര്‍ ഭരണത്തിലുള്ള ഇന്ത്യ ലോകരാജ്യങ്ങളുടെ പട്ടികയില്‍ 62-ാം സ്ഥാനത്താണ്. സാമ്പത്തികമേഖലയുടെ വളര്‍ച്ചയെ ആധാരമാക്കിയാണ് പട്ടിക തയ്യാറാക്കുന്നത്.
Also Read: പെരിന്തല്‍മണ്ണ ലീഗ്-സി.പി.ഐ.എം സംഘര്‍ഷം: മലപ്പുറം ജില്ലയില്‍ നാളെ യു.ഡി.എഫ് ഹര്‍ത്താല്‍
എല്ലാവര്‍ഷവും തയ്യാറാക്കുന്ന ഈ പട്ടികയില്‍ 103 രാജ്യങ്ങളാണ് ഉള്‍പ്പെട്ടിരിക്കുന്നത്. ഇതില്‍ ഇന്ത്യയുടെ സ്ഥാനം അയല്‍ക്കാരായ ചൈനയേക്കാളും പാകിസ്താനേക്കാളും പിന്നിലാണെന്നതും ശ്രദ്ധേയമാണ്. ചൈന 26-ാം സ്ഥാനത്തും, പാകിസ്താന്‍ 47-ാം സ്ഥാനത്തുമാണ് പട്ടികയില്‍.
പട്ടികയില്‍ ആദ്യ പത്ത് സ്ഥാനങ്ങളില്‍ യൂറോപ്പിനു പുറത്തു നിന്ന് ഓസ്‌ട്രേലിയ മാത്രമാണ് ഉള്ളത്. ഒന്‍പതാം സ്ഥാനമാണ് ഓസ്‌ട്രേലിയയ്ക്ക്. ഈ വര്‍ഷത്തെ പട്ടികയില്‍ ഒന്നാമതെത്തിയത് നോര്‍വ്വേയാണ്. തൊട്ടുപിന്നാലെ അയര്‍ലാന്‍ഡ്, ലക്‌സംബര്‍ഗ്, സ്വിറ്റ്‌സര്‍ലാന്‍ഡ്, ഡെന്മാര്‍ക്ക് എന്നീ രാജ്യങ്ങളാണുള്ളത്.
ജി7 രാജ്യങ്ങളില്‍ മുന്‍പന്തിയിലെത്തിയത് ജര്‍മ്മനിയാണ് (12). കാനഡ (17), ഫ്രാന്‍സ് (18), യു.കെ (21), യു.എസ് (23), ജപ്പാന്‍ (24), ഇറ്റലി (27) എന്നിങ്ങനെയാണ് മറ്റ് ജി7 രാജ്യങ്ങളുടെ പട്ടികയിലെ സ്ഥാനം.