ക്രിക്കറ്റില്‍ മെഡല്‍ ഉറപ്പിച്ച് ഇന്ത്യ; റോയലായി ഫൈനലിലേക്ക്
സ്പോര്‍ട്സ് ഡെസ്‌ക്
Sunday, 24th September 2023, 10:38 am
ഏഷ്യന്‍ ഗെയിംസിലെ വനിതാ ക്രിക്കറ്റില്‍ ഫൈനലില്‍ പ്രവേശിച്ച് ഇന്ത്യ. സെമി ഫൈനലില്‍ ബംഗ്ലാദേശിനെ എട്ട് വിക്കറ്റിന് തകര്‍ത്താണ് ഇന്ത്യന്‍ ടീം ഫൈനലില്‍ പ്രവേശിച്ചിരിക്കുന്നത്. ഇതോടെ ക്രിക്കറ്റില്‍ നിന്നും ഇന്ത്യ മെഡല്‍ ഉറപ്പിച്ചിരിക്കുകയാണ്.
ഇന്ത്യന്‍ സ്റ്റാര്‍ സ്പിന്നര്‍ പൂജ വസ്ത്രാര്‍ക്കറിന്റെ ബൗളിങ് മികവിലാണ് ഇന്ത്യ അനായാസ ജയം സ്വന്തമാക്കിയത്. നാല് ഓവറില്‍ വെറും 17 റണ്‍സ് മാത്രം വഴങ്ങിയ പൂജ നാല് മുന്‍നിര വിക്കറ്റുകളാണ് പിഴുതെറിഞ്ഞത്.
മത്സരത്തില്‍ ടോസ് നേടി ബാറ്റിങ് തെരഞ്ഞെടുത്ത ബംഗ്ലാദേശിന് തുടക്കത്തിലേ പിഴച്ചു. ഒരു റണ്‍സിന് ആദ്യ രണ്ട് വിക്കറ്റുകളും വീണ ബംഗ്ലാദേശ് റണ്‍സ് കൂട്ടിച്ചേര്‍ത്താന്‍ കഷ്ടപ്പെടുകയായിരുന്നു.
